Ob Tug Timkhawv

1 Thiab muab ib tug pas ntsuas uas zoo li ib tug pas nrig, pub rau kuv thiab hais rau kuv tias, cia li sawv tsees mus ntsuas Abba (יחוח)Yahweh lub tuam tsev, thiab lub thaj xyeem, thiab suav cov tibneeg uas pe hawm Abba (יחוח)Yahweh hauv lub tuam tsev. 2 Tiamsis tsis txhob ntsuas lub tshav puam sab nraum lub tuam tsev. Tsis txhob ntsuas, vim qhov ntawd muab rau lwm haiv neeg lawm, mas lawv yuav tsuj lub nroog dawb huv mus kom tag plaub caug ob lub hlis.

3 Thiab kuv yuav pub kuv ob tug timkhawv uas hnav ntaub seev tsaj, muaj hwjchim cev lus mus kom txog ib txhiab ob puas rau caum hnub. 4 Ob tug timkhawv ntawd yog ob tsob txiv aulib, thiab ob tug ncej txawb teeb uas txawb rau ntawm Tus Tswv uas kav ntiajteb lub xubntiag. 5 Yog leejtwg yuav ua phem rau ob tug timkhawv ntawd, hluavtaws yuav tawm plaws hauv nkawv qhov ncauj hlawv cov yeeb ncuab ntawd. Leejtwg xav ua phem rau nkawv, kuj yuav tsum raug muab tua li ntawd.

6 Nkawv muaj hwjchim kaw tau lub ntuj tsis pub nag los rau ncua sijhawm uas nkawv tabtom cev lus, thiab nkawv muaj hwjchim ua kom tej dej txia ua ntshav, thiab tso vij sub vij sw txhua yam los raug lub ntiajteb tsawg zaum, kuj tau raws li nkawv siab xav.

​

Ob Tug Timkhawv Raug Tua

7 Thaum nkawv tej haujlwm ua timkhawv tiav lawm, tus tsiaj qus uas tawm hauv lub niag qhov tob tob los, yuav tawm tsam nkawv, thiab yuav kov yeej, thiab muab nkawv tua pov tseg. 8 Nkawv ob lub cev tuag, yuav nyob saum txojkev, hauv lub nroog loj uas ua piv lus hu tias, Xaudoos thiab Iziv, yog lub nroog uas nkawv Tus Tswv raug teem rau saum ntoo ntsi tes. 9 Muaj tibneeg hauv txhua haiv, txhua xeem, txhua yam lus, thiab txhua lub tebchaws, ntsia ntsoov nkawv lub cev tuag peb hnub, thiab ib tav su, thiab tsis kheev kom muab tso rau hauv qhov ntxa li.

10 Ib tsoom tibneeg hauv ntiajteb yuav hnyos nkawv, thiab yuav xyiv fab, thiab ib leeg pub tshav ntuj rau ib leeg, vim ob tug uas cev lus ntawd, tau tsim txom cov tibneeg hauv ntiajteb. 11 Dhau peb hnub thiab ib tav su ntawd, Abba (יחוח)Yahweh tej pa uas pub txojsia txawm nkag rau hauv ob tug ntawd, ces nkawv txawm sawv tsees nres nroos thiab cov tibneeg uas pom nkawv ntshai kawg nkaus.

12 Nkawv txawm hnov ib lub suab hais saum ntuj tuaj rau nkawv hais tias, cia li nce los saum no lauj. Thaum cov yeeb ncuab tseem saib ntsoov, nkawv txawm mus hauv ib tauv huab nce rau saum ntuj lawm. 13 Lub sijhawm ntawd, ntuj txawm qeeg heev thiab lub nroog ntawd pob tag ib feem hauv kaum. Tibneeg tuag xya txhiab leej rau thaum ntuj qeeg ntawd, mas cov tibneeg uas tseem tshuav nyob ntshai heev kawg, thiab qhuas Abba (יחוח)Yahweh. 14 Kev txom nyem yam ob dhau lawm. Saib maj, kev txom nyem yam peb yuav tuaj txog sai sai no.

​

Lub Raj Xyu Uas Xya

15 Tus tubtxib saum ntuj uas xya, kuj tshuab nws lub raj xyu, muaj ntau lub suab nrov nrov saum ntuj hais tias, Lub ntiajteb ntxeev ua Abba (יחוח)Yahweh thiab nws tus Tub (יהושע)Yahshua Messiah lub tebchaws, mas nws yuav kav mus ib txhis tsis kawg. 16 Nees nkaum plaub tug kev txwj laug uas zaum saum tej zwm txwv ntawm Abba (יחוח)Yahweh lub xubntiag, txawm khwb nkaus pe hawm Abba (יחוח)Yahweh.

17 Thiab hais tias, Abba (יחוח)Yahweh, Tus Tswv uas muaj hwjchim loj kawg nkaus, tus uas muaj txojsia thiab ib txwm yeej los muaj nyob, peb ua koj tsaug, vim koj siv koj lub hwjchim loj kawg pib kav lawm. 18 Ib tsoom tebchaws kuj chim heev, tiamsis koj txojkev npau taws los txog lawm, thiab txog lub sij-hawm uas koj txiav txim rau cov tibneeg uas tuag lawm, thiab pub nqe zog rau koj cov tub qhe, uas yog cov xibhwb cev lus, thiab pub rau koj cov neeg dawb huv, thiab cov uas paub ntshai koj lub npe, tsis hais tus hlob tus yau, thiab txog sijhawm uas koj yuav rhuav tshem cov uas rhuav tshem lub ntiajteb. 19 Ces Abba (יחוח)Yahweh lub tuam tsev saum ntuj txawm qheb kiag thiab pom nws lub phij xab sib cog lus nyob hauv lub tuam tsev ntawd.

Ces txawm muaj xob laim liab pes vog, xob nroo nthe tej niag rhev, ntuj qeeg thiab los lawg hlob heev.