144,000 Leej Ixayees

1 Dhau ntawd, kuv pom plaub tug tubtxib saum ntuj sawv ntawm plaub ceg kaum ntuj, tswj plaub fab cua hauv ntiajteb cia, tsis kheev cua ntsawj saum nruab nqhuab, hauv hiavtxwv thiab tej xyoob ntoo huvsi.

2 Ces kuv txawm pom dua ib tug tubtxib saum ntuj, tshwm sab hnub tuaj los tuav rawv Abba (יחוח)Yahweh uas muaj txojsia nyob lub cim, thiab nws qw nrov rau plaub tug tubtxib saum ntuj uas muaj cai ua rau ntiajteb thiab hiavtxwv raug txom nyem ntawd, 3 hais tias, tsis txhob ua rau ntiajteb, thiab hiavtxwv, thiab tej xyoob ntoo, raug txom nyem mus txog thaum peb nias cim rau Abba  (יחוח)Yahweh cov tub qhe hauv pliaj.

4 Thiab kuv hnov tias, cov uas raug nias cim muaj 144,000 leej yog los ntawm txhua xeem Ixayees. 5 Xeem Yahdah muaj 12,000 leej uas raug nias cim, xeem Lunpees muaj 12,000 leej, xeem Kas muaj 12,000 leej, 6 xeem Asaws muaj 12,000 leej, xeem Nathalis muaj 12,000 leej, xeem Manaxes muaj 12,000 leej, 

7 xeem Xime‑oos muaj 12,000 leej, xeem Levis muaj 12,000 leej, xeem Ixakhas muaj 12,000 leej, 8 xeem Xenpuloos muaj 12,000 leej, xeem Yauxej muaj 12,000 leej, thiab xeem Npeeyamees muaj 12,000 leej uas raug nias cim.

​

Txhua Haiv Neeg Hauv Ntiajteb

9 Dhau ntawd, kuv saib mas pom ib pab tibneeg coob heev, suav tsis txheeb, tuaj hauv txhua lub tebchaws, txhua xeem, txhua haiv neeg, thiab txhua yam lus, tuaj sawv rau ntawm lub zwm txwv xubntiag, thiab tab meeg tus Menyuam Yaj. Lawv hnav tsoos tsho dawb paug thiab tuav rawv tej rev nplooj toov laj hauv txhais tes, 10 thiab lawv qw nrov hais tias, txojkev dim nyob ntawm Abba (יחוח)Yahweh uas zaum saum lub zwm txwv, thiab nyob ntawm tus Menyuam Yaj. 

11 Cov tubtxib saum ntuj sawvdaws sawv vij lub zwm txwv, thiab vij cov kev txwj laug, thiab cov tsiaj ciaj sia, thiab lawv khwb nkaus rau ntawm lub zwm txwv xubntiag pe hawm Abba (יחוח)Yahweh, 12 hais tias, Thov kom Abba (יחוח)Yahweh tau tej lus qhuas, thiab koob meej, thiab tswvyim, thiab tej lus ua tsaug, thiab meej mom, thiab hwjchim, thiab lub zog mus ib txhis tsis kawg. Haleluyah! Amen!  13 Ib tug kev txwj laug nug kuv hais tias, cov uas hnav tsoos tsho dawb paug ntawd yog leejtwg thiab tuaj qhovtwg tuaj? 14 Kuv teb nws tias, Yawg hlob, koj thiaj paub. Nws txawm hais rau kuv tias, cov tibneeg ntawd, yog cov uas tuaj hauv txojkev tsim txom loj kawg tuaj. Lawv twb ntxhua lawv tej tsoos tsho hauv tus Menyuam Yaj cov ntshav kom dawb paug. 15 Vim li no lawv thiaj nyob ntawm Abba (יחוח)Yahweh lub zwm txwv xubntiag, thiab ua koom tu nws hauv nws lub tuam tsev nruab hnub hmo ntuj. Tus uas zaum saum lub zwm txwv yuav nrog nraim lawv roos lawv. 16 Lawv yuav tsis tshaib tsis nqhis dua li lawm. Lub hnub yuav tsis kub lawv dua li lawm.

17 Rau qhov tus Menyuam Yaj uas nyob hauv nruab nrab lub zwm txwv, yuav yug lawv thiab coj lawv mus rau tej qhov dej cag uas pub txojsia. Thiab Abba (יחוח)Yahweh yuav so lawv txhua ncos kua muag ntawm lawv qhov muag.