Thooj Ntawv Thiab Tus Menyuam Yaj Nrog Rau Xya Lub Cim

1 Hauv tus uas zaum saum lub zwm txwv txhais tes xis, kuv pom muaj ib thooj ntawv, sau sab hauv thiab sab nraud huvsi, thiab ntaus xya lub cim rau. 2 Thiab kuv pom ib tug tubtxib saum ntuj uas muaj hwjchim, tshaj tawm nrov nrov hais tias, Leejtwg yog tus uas tsim nyog qheb thooj ntawv thiab tev tej cim tseg? 

3 Tsis muaj leejtwg uas nyob saum ntuj, lossis hauv lub ntiajteb, lossis hauv nruab tiv txwv, yuav qheb tau thiab saib hauv thooj ntawv. 4 Ces kuv txawm quaj heev, vim nrhiav tsis tau leejtwg uas tsim nyog qheb thooj ntawv, thiab saib thooj ntawv ntawd.

5 Cov kev txwj laug ib tug txawm hais rau kuv tias, tsis txhob quaj. Saib maj, xeem Yahdah tus Tsov Ntxhuav, yog Daviv caj ces, twb kov yeej lawm, nws thiaj qheb tau thooj ntawv thiab tev xya lub cim tau. 6 Hauv ntu nruab nrab ntawm lub zwm txwv, thiab plaub tug tsiaj ciaj sia, thiab hauv nruab nrab cov kev txwj laug, kuv pom ib tug menyuam yaj sawv ntsug, zoo yam nkaus li twb raug muab tua lawm. Nws muaj xya tus kub thiab xya lub qhov muag, uas yog Abba (יחוח)Yahweh xya tus ntsuj plig, uas muab txib mus thoob plaws lub ntiajteb.

7 Nws mus muab thooj ntawv, ntawm tus uas zaum saum lub zwm txwv txhais tes xis. 8 Thaum nws txais thooj ntawv lawm, plaub tug tsiaj ciaj sia, thiab nees nkaum plaub tug kev txwj laug, txawm khwb nkaus rau ntawm tus menyuam yaj xubntiag, txhua tus tuav rawv nkauj nog ncas, thiab lub phaj kub rau tshuaj tsw qab puv nkaus, uas yog Abba (יחוח)Yahweh cov neeg dawb huv tej lus thov.

9 Lawv hu ib zaj nkauj tshiab hais tias, koj yog tus uas tsim nyog txais thooj ntawv ntawd, thiab tev tej cim tseg, vim koj raug muab tua thiab koj muab koj cov ntshav, txhiv tibneeg ntawm txhua lub xeem, txhua yam lus, txhua haiv neeg, thiab txhua lub tebchaws, los rau Abba (יחוח)Yahweh, 10 thiab tsa lawv ua ib lub tebchaws thiab ua pov thawj ua koom tu peb tus Abba (יחוח)Yahweh, thiab lawv yuav kav lub ntiajteb. 11 Mas kuv saib thiab hnov cov tubtxib saum ntuj coob coob lub suab, suav muaj qas txhiab qas vam leej nyob puag ncig lub zwm txwv, thiab tej tsiaj ciaj sia thiab cov kev txwj laug. 12 Lawv qw nrov hais tias, Tus Menyuam Yaj uas raug muab tua, tsim nyog txais hwjchim, thiab nyiaj txiag, thiab tswvyim, thiab nqe zog, thiab meej mom, thiab koob meej, thiab tej lus qhuas.

13 Thiab kuv hnov txhua yam muaj sia uas tsim los lub suab, tsis hais saum ntuj, hauv ntiajteb, hauv nruab tiv txwv, hauv hiavtxwv, thiab txhua yam uas nyob ntawd qw hais tias, thov kom tus uas zaum saum lub zwm txwv, thiab tus Menyuam Yaj, tau tej lus qhuas thiab meej mom, thiab koob meej, thiab hwjchim mus ib txhis tsis kawg. 14 Plaub tug tsiaj ciaj sia kuj hais tias, Amen!, thiab cov kev txwj laug kuj khwb nkaus pe.