Lub Cim Uas Ib

1 Kuv pom tus Menyuam Yaj muab xya lub cim ntawd, ib lub tev, thiab kuv hnov plaub tug tsiaj ciaj sia, ib tug qw nrov yam nkaus li xob quaj hais tias, cia li los.

2 Kuv saib mas pom ib tug nees dawb, thiab tus uas caij nees ntawd, tuav rawv rab hneev, thiab muab ib lub mom kub pub rau nws, mas nws tawm mus yam nkaus li tus kov yeej uas yuav mus ntaus yeej.

​

Lub Cim Uas Ob

3 Thaum tus Menyuam Yaj tev lub cim uas ob, kuv hnov tus tsiaj ciaj sia thib ob hais tias, cia li los. 4 Mas muaj dua ib tug nees liab ploog tawm los. Tso cai rau tus uas caij nees rho txojkev thaj yeeb tawm hauv lub ntiajteb mus, kom tibneeg thiaj sib ntaus sib tua, thiab muab ib rab ntaj loj pub rau nws.

​

Lub Cim Uas Peb

5 Thaum tus Menyuam Yaj tev lub cim uas peb, kuv hnov tus tsiaj ciaj sia thib peb hais tias, cia li los. Kuv saib mas pom ib tug nees dub thiab tus uas caij nees tuav rawv rab teev hauv nws txhais tes. 6 Thiab kuv hnov yam nkaus li ib lub suab nrov hauv nruab nrab plaub tug tsiaj ciaj sia ntawd hais tias, ib lib mog, muag ib denalias, thiab peb lib qeb, muag ib denalias. Tiamsis tsis txhob ua li cas rau tej roj thiab tej cawv txiv hmab.

​

Lub Cim Uas Plaub

7 Thaum tus Menyuam Yaj tev lub cim uas plaub, kuv hnov tus tsiaj ciaj sia thib plaub lub suab hais tias, cia li los. 8 Kuv saib mas pom ib tug nees txheeb thiab tus uas caij nees ntawd, npe hu ua Kev Tuag, thiab Tub Tuag Teb kuj raws nws qab los. Twb muab hwjchim rau nkawv kav lub ntiajteb ntawm ib feem hauv plaub lawm. Nkawv yuav xuas ntaj thiab kev tshaib kev nqhis, thiab kev mob kev nkeeg, thiab tsiaj qus hauv lub ntiajteb tua tibneeg pov tseg.

​

Lub Cim Uas Tsib

9 Thaum tus Menyuam Yaj tev lub cim uas tsib, kuv pom cov ntsuj plig uas nyob hauv lub qab thaj xyeem, yog cov tibneeg uas raug muab tua, vim tim Abba (יחוח)Yahweh txoj-lus thiab tej lus timkhawv uas lawv tuav rawv cov ntsuj plig. 10 Lawv qw nrov hais tias, Au Abba (יחוח)Yahweh, tus uas dawb huv thiab muaj tseeb, tshuav ntev npaum li cas,koj mam txiav txim thiab pauj peb cov ntshav rau cov uas nyob hauv lub ntiajteb? 

11 Thiab muab lub tsho ntev dawb pub rau cov uas raug tua ntawd txhua tus, thiab hais kom lawv so ib nyuag ntu ntxiv, mus kom txog thaum cov uas nrog lawv koom ua tub qhe, thiab lawv cov kwvtij raug muab tua ib yam li lawv kom tiav.

Lub Cim Uas Rau

12 Thaum tus Menyuam Yaj tev lub cim uas rau, kuv saib mas pom lub ntuj qeeg, ntiajteb ua zog koog. Lub hnub cia li tsaus ntais, yam li tej ntaub dub thiab lub hli ntxeev liab ploog li ntshav, 13 thiab tej hnub qub, poob zom zaws rau hauv ntiajteb, yam li tsob txiv cev uas raug cua ntsawj, tej txiv uas tsis siav zeeg los.

14 Lub ntuj kuj ploj mus yam nkaus li thooj ntawv uas muab kauv cia, thiab txhua lub roob, thiab txhua lub koog povtxwv, raug muab rho ntawm tej qub chaw lawm. 15 Thaum ntawd tej vajntxwv hauv ntiajteb, thiab cov uas ua loj, thiab cov thawj rog, thiab cov nplua nuj, thiab cov uas muaj hwjchim, thiab txhua tus tag nrho cov uas ua qhev, thiab cov uas nyob ywj pheej, puavleej mus khiav nka-um rau hauv tej qhov tsua thiab tej kem zeb saum tej roob, 16 thiab hu tej roob thiab tej pob zeb hais tias, cia li pob los tsuam peb, muab peb zais ntawm tus uas zaum saum lub zwm txwv lub xubntiag, thiab ntawm tus Menyuam Yaj txojkev npau taws. 17 Rau qhov hnub tseem ceeb uas Abba (יחוח)Yahweh npau taws rau tibneeg los txog lawm, mas leejtwg yuav thev nyob tau?