Rooj Ntug Qheb

1 Dhau ntawd kuv ntsia pom ib lub qhov rooj saum ntuj qheb lug cia. Thiab lub suab uas kuv tau hnov ntawd, hais rau kuv ib yam li lub suab raj xyu hais tias, cia li nce tuaj saum no, kuv yuav qhia rau koj paub txog tej uas yuav tsum muaj tshwm los rau thaum dhau qhov no lawd. 2 Tamsim ntawd, Tus Ntsuj Plig Dawbhuv kav tag nrho kuv lub siab, kuv txawm pom muaj ib lub zwm txwv nyob saum ntuj, thiab muaj ib tug zaum saum lub zwm txwv ntawd. 3 Tus uas zaum ntawd, saib mas ci zoo li qe zeb hlaws daj, thiab qe zeb hlaws liab, thiab muaj zaj sawv puag ncig lub zwm txwv ntawd, ci zoo li qe zeb hlaws ntsuab txho. 4 Thiab ib ncig lub zwm txwv ntawd, muaj nees nkaum plaub lub zwm txwv, thiab muaj nees nkaum plaub tug kev txwj laug, nyob saum tej zwm txwv ntawd. Lawv hnav tsoos tsho dawb paug thiab ntoo lub mom kub saum taubhau. 5 Muaj xob laim liab pes vog, thiab xob nroo, xob nthe, tawm ntawm lub zwm txwv ntawd tuaj, thiab muaj xya teg tsau cig lam lug rau ntawm lub zwm txwv ntawd sab xubntiag. Tej teg tsau ntawd, yog Abba (יחוח)Yahweh xya tus ntsuj plig. 6 Ncaj ntawm lub zwm txwv xubntiag, muaj ib yam zoo li hiavtxwv, ntshiab li iav, ci zoo yam li qe zeb dawb. Ib ncig ntawm ob sab lub zwm txwv, muaj plaub tug tsiaj ciaj sia, muaj qhov muag puv nkaus sab nrob qaum thiab sab xubntiag. 7 Cov tsiaj ciaj sia ntawd, tus ib, zoo li tsov ntxhuav, tus ob, zoo li txiv nyuj, tus peb, muaj ntsej muag li tibneeg, tus plaub, zoo li ib tug dav uas tabtom ya. 8 Plaub tug tsiaj ciaj sia ntawd, txhua tus muaj rau phab kooj tis, thiab muaj qhov muag puv nkaus ib ncig sab saud, sab hauv, thiab lawv hu nkauj nruab hnub, hmo ntuj, tsis tu li hais tias, dawb huv, dawb huv, dawb huv, yog Abba (יחוח)Yahweh uas muaj hwjchim loj kawg nkaus, yog tus uas ib txwm muaj nyob, thiab muaj txojsia nyob nimno, thiab tseem yuav los rau yav tom ntej.

9 Thaum cov tsiaj ciaj sia hu nkauj qhuas, thiab hwm, thiab ua tsaug, rau tus uas zaum saum lub zwm txwv, uas yog tus muaj txojsia nyob mus ib txhis tsis kawg. 10 Ces nees nkaum plaub tug kev txwj laug ntawd, txawm khwb nkaus rau ntawm tus uas zaum saum lub zwm txwv xubntiag, thiab pe hawm tus uas muaj txojsia nyob mus ib txhis tsis kawg, thiab hle lawv lub mom kub, txawb rau ntawm lub zwm txwv lub xubntiag, thiab hais tias, 11 Au Abba (יחוח)Yahweh uas yog peb Tus Tswv, koj tsim nyog tau meej mom, thiab koob meej, thiab hwjchim loj kawg, vim koj tsim ib puas tsav yam, thiab ib puas tsav yam muaj nyob, thiab raug tsim los raws li koj twb xav tseg lawm.