Hais Rau Lub Moos Sardis

1 Cia li sau xa mus rau tus tubtxib saum ntuj uas saib pawg ntseeg hauv lub moos Sardis li no: Tus uas muaj Abba (יחוח)Yahweh xya tus ntsuj plig thiab muaj xya lub hnub qub, hais li no tias, kuv paub koj tes haujlwm. Koj muaj lub npe hais tias muaj txojsia nyob, tiamsis qhov tseeb, koj twb tuag lawm. 2 Yog li ntawd, koj cia li tsim dheev los, thiab yam uas koj tseem tshuav, twb yuav tuag, koj yuav tsum txhawb kom rov muaj zog tuaj, rau qhov kuv pom hais tias, tej uas koj ua lawm, koj tseem ua tsis tau zoo raws li Abba (יחוח)Yahweh lub siab nyiam.

3 Vim li no, cia li nco txog tej uas koj tau txais thiab tau hnov lawm. Cia li tuav rawv tej ntawd thiab ntxeev dua siab tshiab. Yog koj tsis tsim dheev los, kuv yuav los ib yam li tub sab tuaj, mas koj yuav tsis paub tias, kuv yuav los txog koj rau lub sijhawm twg. 4 Tiamsis koj tseem muaj ob peb leeg hauv lub moos Sardis uas tsis tau ua rau lawv tej tsoos tsho qias puas tsuas. Lawv yuav hnav cev tsoos dawb nrog kuv mus ua ke, vim tsim nyog lawv tau li ntawd. 5 Tus uas kov yeej yuav tau hnav cev tsoos dawb ib yam li lawv, thiab kuv yuav tsis rhuav nws lub npe hauv phau ntawv txojsia. Kuv yuav lees nws lub npe tab meeg ntawm kuv Leej Txiv lub xubntiag thiab tab meeg ntawm Leej Txiv cov tubtxib saum ntuj.

6 Tus uas muaj pobntseg cia li mloog tej uas Tus Ntsuj Plig Dawbhuv qhia rau cov pawg ntseeg.

​

Hais Rau Lub Moos Philadelphia

7 Cia li sau xa mus rau tus tubtxib saum ntuj uas saib pawg ntseeg hauv lub moos Philadelphia hais tias, tus uas dawb huv thiab muaj tseeb, nws tuav rawv Daviv tus yuam sij, yog nws qheb lawm tsis muaj leejtwg kaw tau, yog nws kaw lawm tsis muaj leejtwg qheb tau, nws hais li no tias, 8 Kuv paub koj tes haujlwm. Saib maj, kuv muab lub qhov rooj qheb cia rau ntawm koj lub xubntiag, tsis muaj leejtwg kaw tau. Kuv paub tias koj lub zog me me, tiamsis koj tseem tuav rawv kuv tej lus thiab tsis tso kuv lub npe tseg.

9 Saib maj, kuv yuav ua rau cov uas yog Xatas lub tsev sablaj uas hais tias, lawv yog Yahdaim tiamsis tsis yog, yog lawv dag xwb, mas kuv yuav ua kom lawv los txhos caug rau ntawm koj kotaw pe koj, thiab lawv yuav paub tias kuv hlub koj. 10 Vim koj ua raws li kuv tej lus uas hais tias, yuav tsum ua siab ntev thev, kuv yuav tsom kwm koj kom dim lub sijhawm uas raug kev sim siab uas yuav los raug lub ntiajteb huvsi, xwv thiaj sim tau cov tibneeg uas nyob hauv lub ntiajteb.

11 Kuv yuav los sai sai no. Cia li tuav rawv tej uas koj muaj, kom thiaj tsis muaj leejtwg txeeb tau koj lub mom kub mus. 12 Tus uas kov yeej mas kuv yuav tsa nws ua ib tug ncej zeb nres kuv Tus Tswv lub tuam tsev. Nws yuav tsis tawm hauv lub tuam tsev mus li thiab kuv yuav muab kuv Tus Tswv lub npe thiab muab kuv Tus Tswv lub nroog lub npe, yog lub nroog Yeluxalees tshiab uas yuav nqes saum ntuj ntawm kuv Tus Tswv los, thiab muab kuv lub npe tshiab sau rau ntawm nws lub cev. 13 Tus uas muaj pobntseg cia li mloog tej uas Tus Ntsuj Plig Dawbhuv hais rau cov pawg ntseeg.

​

Hais Rau Lub Moos Laodicea

14 Cia li sau xa rau tus tubtxib saum ntuj hauv pawg ntseeg Laodicea hais tias, tus uas yog Amen! yog tus timkhawv uas tso siab tau thiab muaj tseeb, yog txhua yam uas Abba (יחוח)Yahweh tsim lub hauv paus, hais li no tias, 15 Kuv paub koj tes haujlwm. Koj tsis txias tsis kub. Kuv xav kom koj txias kiag lossis kub kiag. 16 Yog li ntawd vim koj sov sem so xwb, tsis kub tsis txias, kuv yuav muab koj nti tawm hauv kuv qhov ncauj. 17 Koj hais tias, Kuv nplua nuj, kuv muaj txiag lawm, kuv tsis cheem tsum abtsi li. Koj tsis paub tias koj twb txom nyem kawg thiab ntxim khuvleej, koj pluag, dig muag thiab liab qab. 18 Vim li no kuv qhia kom koj yuav cov kub ntawm kuv uas muab nchuav hauv cub thee lawm xwv koj thiaj li nplua nuj, thiab yuav tej tsoos tsho dawb los hnav kom thiaj tsis pom koj lub cev liab qab uas txaj muag, thiab yuav cov tshuaj los teev koj lub qhov muag kom koj thiaj pom kev. 19 Cov uas kuv hlub kuv yeej qhuab ntuas thiab nplawm. Vim li no cia li kub siab lug thiab ntxeev dua siab tshiab. 20 Saib maj, kuv sawv nraum qhov rooj khob. Yog leejtwg hnov kuv lub suab thiab qheb qhov rooj, kuv yuav nkag mus rau hauv thiab nrog nws noj mov ua ke thiab nws yuav nrog kuv noj mov ua ke. 21 Tus uas kov yeej kuv yuav pub nws nrog kuv zaum saum kuv lub zwm txwv, ib yam li uas kuv kov yeej lawm thiab nrog kuv Leej Txiv zaum saum nws lub zwm txwv.

22 Tus uas muaj pobntseg cia li mloog tej uas Tus Ntsuj Plig Dawbhuv hais rau cov pawg ntseeg.