Sha-ul Taug Kev Mus Yeluxalees

(Tubtxhib 9:1-22, 26:9-18)

1 Thaum peb ncaim lawv mus lawm, peb txawm caij nkoj mus ncaj nraim rau lub koog povtxwv Khaus, hnub tom qab mus rau lub koog povtxwv Laudes, dhau ntawd peb mus rau lub moos Pathalas.

2 Thaum peb ntsib ib lub nkoj tabtom yuav hla mus rau lub xeev Finikias, peb txawm nce lub nkoj ntawd mus. 3 Thaum peb mus pom lub koog povtxwv Cyprus lawm, peb txawm hla dhau plaws mus rau sab laug mus rau lub xeev Syria, mas nres nkoj rau ntawm lub nroog Thailab, rau qhov yuav thau nra rau qhov ntawd. 4 Thaum nrhiav tau cov thwjtim lawm, peb nrog lawv nyob qhov ntawd tau xya hnub. Lawv cheem Sha-ul raws li Tus Ntsuj Plig Dawbhuv qhia rau lawv kom tsis txhob pub nws mus rau Yeluxalees. 5 Thaum puv xya hnub lawm, peb txawm sawv kev ncaim lawv mus. Lawv thiab lawv tej pojniam menyuam huvsi, puav leej xa peb mus txog ntua thaum uas peb tawm hauv lub nroog lawm. Mas thaum peb mus txog ntawm ntug hiavtxwv, peb sawvdaws thiaj txhos caug thov Abba (יחוח)Yahweh ua ke. 6 Thaum peb sib fim ncaim tag, peb nce nkoj lawm, ces lawv mam rov mus tsev. 7 Thaum peb caij nkoj ntawm lub nroog Thailab mus txog lub moos Tauleme‑is, peb txawm mus saib cov kwvtij thiab nrog lawv nyob ib hnub. 8 Hnub tom qab peb tawm qhov ntawd mus txog lub moos Xixalias. Peb nkag mus rau hauv Philip uas ua tus qhia txoj hmoo zoo lub tsev. Philip yog ib tug ntawm xya leej uas cov ntseeg nram lub nroog Yeluxalees tau xaiv los ua haujlwm, mas peb so hauv nws.  9 Philip muaj plaub tug ntxhais uas tsis tau yuav txiv, puavleej txawj cev Abba (יחוח)Yahweh lus.

10 Thaum peb nyob ntawd tau ntau hnub lawm, muaj ib tug yawg xibhwb cev Abba (יחוח)Yahweh lus npe hu ua Akanpas tuaj lub xeev Yahdah tuaj.

11 Thaum nws tuaj txog ntawm peb, nws txawm muab Sha-ul txoj siv tawv los khi nws tes, nws taw, ces nws hais tias, Tus Ntsuj Plig Dawbhuv hais li no tias, cov Yahdaim hauv Yeluxalees, yuav muab Tus Tswv ntawm xoj siv tawv no, khi thiab muab nws cob rau hauv lwm haiv neeg txhais tes. 12 Thaum peb tau hnov li ntawd, peb thiab cov uas nyob ua ke txawm cheem Sha-ul kom tsis txhob mus rau hauv Yeluxalees.

13 Sha-ul teb tias, ua li cas nej yuav quaj thiab ua rau kuv ntxhov siab ua luaj? Kuv tsis yog npaj txhij rau lawv khi xwb, tiamsis tseem npaj txhij yuav tuag rau hauv Yeluxalees vim saib rau (יהושע)Yahshua Messiah lub npe. 14 Thaum peb cheem tsis tau nws lawm, peb txawm tso tseg thiab hais tias, thov cia ua raws li Abba (יחוח)Yahweh lub siab. 15 Dhau ntawd, peb npaj txhij thiab mus rau hauv Yeluxalees. 16 Cov thwjtim uas nyob hauv Xixalias, muaj qee leej nrog peb mus thiab. Lawv coj peb mus rau hauv Manaxoos tsev, mas peb so hauv nws. Nws yog ib tug ntseeg ntxov los lawm thiab yog tibneeg Cyprus.

​

Sha-ul Mus Tsham Yaaqob

17 Thaum peb tuaj txog lub nroog Yeluxalees lawm, cov kwvtij kuj zoo siab txais tos peb. 18 Hnub tom qab Sha-ul nrog peb mus saib Yaaqob. Cov txwjlaug uas saib cov ntseeg puav leej tuaj ntawd thiab. 19 Thaum Sha-ul zeem lawv tag lawm, nws txawm qhia txhua yam uas Abba (יחוח)Yahweh siv Sha-ul ua hauv nruab nrab lwm haiv neeg ntawd ib yam zuj zus rau lawv mloog.

20 Thaum lawv hnov nws qhia tag, lawv kuj qhuas Abba (יחוח)Yahweh heev. Lawv hais rau nws tias, tijlaug, koj twb pom tias cov Yahdaim uas los ntseeg muaj ntau txhiab leej, thiab lawv yog cov uas coj Mauxes txoj kevcai nruj.

21 Lawv tau hnov txog koj tias, koj qhuab qhia rau cov Yahdaim uas nyob hauv lwm haiv neeg tej tebchaws kom tso Mauxes tej kevcai tseg, thiab hais kom lawv tsis txhob muab lawv cov menyuam tub ua kevcai txiav lossis coj raws li qub kevcai. 22 Yuav ua li cas thiaj zoo? Lawv yeej yuav hnov hais tias koj tuaj txog ntawm no lawm. 23 Vim li no, koj cia li ua raws li peb hais rau koj. Peb muaj plaub tug txivneej uas twb cog lus cais lawm.

24 Koj cia li coj cov txivneej ntawd nrog koj mus ua kevcai ntxuav ua ke thiab them lawv cov nqi kom lawv thiaj chais tau plaubhau. Yog ua li no, sawvdaws thiaj paub tias tej uas lawv tau hnov txog koj tsis muaj tseeb, tiamsis koj yeej tuav rawv thiab ua raws li txoj kevcai. 25 Lwm haiv neeg uas ntseeg ntawd, peb twb sau ntawv qhia tej uas peb txiav txim siab lawm hais tias, kom lawv tsis txhob noj tej uas xyeem rau dab, thiab tsis txhob noj ntshav, thiab tsis txhob noj tej tsiaj uas zawm caj dab tuag, thiab tsis txhob ua nkauj, ua nraug. 26 Sha-ul txawm coj cov txivneej ntawd mus, mas hnub tom qab, nws nrog lawv ua kevcai ntxuav li nkag mus rau hauv lub tuam tsev, thiab nws qhia tias, lub sijhawm uas ua kevcai ntxuav, yuav tiav rau hnub twg thiab yuav muab qhov txhia chaw xyeem ua txhua tus li feem rau hnub ntawd.

​

Sha-ul Raug Ntes Hauv Lub Tuam Tsev

 27 Thaum twb yuav puv xya hnub ntawd, cov Yahdaim uas tuaj hauv lub xeev Asia tuaj pomSha-ul nyob hauv lub tuam tsev, ces lawv txawm tshum ib tsoom pejxeem thiab ntes nws. 28 Lawv qw hais tias, cov Ixayees, cia li pab peb. Tus yawg no yog tus uas qhia tibneeg txhua qhov kom tawm tsam peb haiv neeg thiab txoj kevcai thiab lub chaw no. Tsis tag li ntawd, nws tseem coj cov Greek los rau hauv lub tuam tsev, thiab ua qias puas tsuas lub chaw dawb huv no.

29 Vim ua ntej ntawd lawv pom Rhaufimas uas yog tibneeg Efexau nrog Sha-ul ua ke hauv lub nroog thiab xav tias Sha-ul coj tus ntawd nkag rau hauv lub tuam tsev lawm. 30 Ces tag nrho lub nroog txawm muaj kev kub ntxhov, cov pejxeem khiav ua ke mus ntes Sha-ul thiab cab nws tawm hauv lub tuam tsev mus. Ces tamsim ntawd, lawv txawm muab tej rooj loog tuam tsev kaw tag nrho.

31 Thaum lawv tabtom nrhiav kev tua Sha-ul, txawm nrov mus txog tus thawj rog uas kav ib txhiab leej tias, lub nroog Yeluxalees tabtom kub ntxhov heev.

32 Nws txawm coj cov tub rog thiab cov uas kav ib puas leej khiav mus rau hauv cov tibneeg tamsim ntawd. Thaum lawv pom tus thawj rog uas kav ib txhiab leej thiab nws cov tub rog tuaj lawm, lawv txawm tseg tsis ntaus Sha-ul lawm. 33 Tus thawj rog txawm txav mus ze, thiab ntes Sha-ul, thiab hais kom muab ob txoj saw hlau khi nws, mas nug tias, nws yog leejtwg thiab nws tau ua abtsi. 34 Cov tibneeg ntawd ib txhia qw li ub ib txhia qw li no. Thaum tus thawj rog uas kav ib txhiab leej ntawd nrhiav tsis tau qhov tseeb, vim ntxhov heev, nws hais kom coj     Sha-ul mus rau hauv cov tub rog lub yeej. 35 Thaum los txog ntawm tus ntaiv lawm, cov tub rog txawm nqa Sha-ul vim cov tibneeg ua nruj ua tsiv heev.

36 Cov tibneeg coob coob uas raws lawv qab kuj qw hais tias, Coj nws mus tua.

 

Sha-ul Hais Daws Nws Zaj

 37 Thaum coj Sha-ul mus yuav dhau rau hauv cov tub rog lub yeej, Sha-ul txawm hais rau tus thawj rog uas kav ib txhiab leej ntawd hais tias, kuv thov hais ib los rau koj puas tau? Tus thawj rog hais tias, koj paub lus Greek thiab lov? 

38 Koj yog tus Iziv uas tsis ntev ntawd tsim kev kub ntxhov thiab coj plaub txhiab leej tuav ntaj riam khiav mus rau hauv tebchaws moj sab qhua los tsis yog? 

39 Sha-ul  teb tias, Kuv yog tibneeg Yahdaim, nyob hauv lub moos Thaxas hauv lub xeev Khilikias, kuv yog ib tug pejxeem hauv lub moos tseem ceeb. Kuv thov koj cia kuv hais rau cov tibneeg no. 40 Thaum tus thawj rog tso cai rau nws lawm, Sha-ul txawm sawv saum tus ntaiv co tes rau cov tibneeg. Thaum sawvdaws nyob twjywm lawm, nws txawm ua lus Hebrew hais rau lawv tias,