1 Ib tsoom kwvtij, neejtsa, thiab tsoom niam, tsoom txiv sawvdaws, thov nej mloog, kuv yuav hais daws kuv zaj rau nej.

2 Thaum lawv hnov nws hais lus Hebrew rau lawv, ces lawv txawm nyob ntsiag to lawm. Nws hais tias, 3 kuv yog tibneeg Yah-daim, yug hauv lub moos Thaxas hauv lub xeev Khilikias, loj hlob hauv lub nroog no thiab kawm tiav ntawm tus xibhwb Kamali‑ees. Kuv tau txais kev cob qhia nruj raws li peb tej poj koob yawm txwv txoj kevcai, thiab kuv kub siab lug rau txoj kev ntseeg Abba (יחוח)Yahweh, ib yam li nej sawvdaws niaj hnub nimno. 4 Yav tag los, kuv yog ib tug uas tau tsim txom cov ntseeg, mas ua kom lawv tuag nkaus xwb. Kuv muab cov pojniam thiab cov txivneej khi coj mus kaw rau hauv tsev lojfaj, 

5 raws li tus tuam pov thawj hlob thiab tag nrho cov thawj nyob hauv lub rooj sablaj sawvdaws ua tau timkhawv. Kuv nqa ntawv ntawm lawv mus rau lawv cov kwvtij hauv lub nroog Damaxakas, thiab yuav mus ntes cov uas ntseeg nyob hauv lub nroog ntawd, yuav muab saw hlau khi cab los rau txim rau hauv lub nroog Yeluxalees no.

Sha-ul Hloov Siab

(Tubtxib 9:1-19, 26:12-18)

6 Thaum kuv tabtom taug kev mus yuav luag txog lub nroog Damaxakas, kwvlam li tav su, txawm muaj ib tug duab ci nplas saum ntuj tuaj vij nkaus kuv tamsid. 7 Kuv txawm ntog vau hlo rau hauv pem teb thiab hnov ib lub suab hais rau kuv tias, Sha-ul, Sha-ul es, ua cas koj tsim txom kuv? 8 Ces kuv teb tias, Yawg Hlob, koj yog leejtwg? Ces nws hais rau kuv tias, kuv yog (יהושע)Yahshua uas yog tibneeg Naxales, yog tus uas koj tabtom tsim txom. 9 Cov tibneeg uas nrog kuv ua ke pom tus duab ci tiamsis tsis hnov lub suab uas hais lus rau kuv.

10 Kuv thiaj hais tias, Yawg Hlob, koj xav kom kuv ua abtsi? (יהושע)Yahshua hais rau kuv tias, cia li sawv tsees nkag mus rau hauv lub nroog Damaxakas, yuav muaj tibneeg qhia rau koj paub txog txhua yam uas tu rau koj ua. 11 Thaum ntawd kuv cia li tsis pom kev kiag li lawm, vim tus duab uas ci nplas rau kuv ntawd ci heev li, mas cov uas nrog kuv ua ke thiaj tuav kuv tes, coj kuv mus rau hauv lub nroog Damaxakas.

12 Muaj ib tug yawg npe hu ua Ananias, nws yog ib tug coj Abba (יחוח)Yahweh kevcai nruj thiab muaj koob meej hauv cov Yahdaim uas nyob ntawd. 13 Nws tuaj cuag kuv thiab los sawv ze ze hais tias, kwv Sha-ul es, cia li rov pom kev. Ces tamsim ntawd, kuv txawm rov pom kev thiab kuv thiaj pom nws. 14 Nws hais rau kuv hais tias, peb tej poj koob yawm txwv Abba (יחוח)Yahweh twb xaiv koj ua tus uas paub txog nws lub siab nyiam, thiab pom tus uas Ncaj Ncees, thiab hnov lub suab ntawm nws lub qhov ncauj. 15 Vim koj yuav ua nws tus timkhawv rau ib tsoom tibneeg txog tej uas koj tau pom thiab hnov lawd. 16 Nimno koj tseem tos ua abtsi? Cia li sawv tsees ua kevcai raus dej thiab tuav (יהושע)Yahshua lub npe thov thiaj ntxuav tau koj lub txim pov tseg. 17 Thaum kuv rov los rau hauv Yeluxalees thiab tabtom thov Abba (יחוח)Yahweh hauv lub tuam tsev, kuv ua yog toog 18 pom Abba (יחוח)Yahweh hais rau kuv tias, cia li tawm hauv Yeluxalees mus tamsim no, vim lawv yuav tsis lees yuav koj tej lus timkhawv uas hais txog kuv. 19 Kuv hais tias, Yawg Hlob, lawv yeej paub zoo tias kuv ntes cov uas ntseeg koj hauv tej tsev sablaj coj mus kaw thiab muab nplawm.

20 Thaum Xatefanaus uas yog koj tus timkhawv cov ntshav ntws los, kuv kuj sawv ntsug ze ntawd thiab pom zoo, thiab kuv tseem zov cov uas tua nws ntawd tej ris tsho. 21 Ces Abba (יחוח)Yahweh hais rau kuv tias, cia li mus, rau qhov kuv yuav txib koj mus kom deb ntawm no, mus txawv tebchaws.

​

Sha-ul Thiab Tus Thawj Rog Romans

 22 Lawv mloog Sha-ul hais hais lus txog qhov no ces lawv txawm qw nrov nrov hais tias, tus tibneeg zoo li no, cia li muab nws tua kom ploj ntais hauv lub ntiajteb mus. Tsis tsim nyog cia nws muaj txojsia nyob lawm.

23 Thaum uas lawv tabtom qw thiab hle lawv cov tsho los co thiab w hmoov av rau saum ntuj, 24 tus thawj rog uas kav ib txhiab leej hais kom coj Sha-ul mus rau hauv cov tub rog lub yeej thiab hais kom lawv muab nws nplawm thiab nug nws saib yog nws ua li cas rau cov Yahdaim es lawv thiaj li yuav qw tawm tsam nws heev ua luaj li. 25 Thaum lawv muab hlua tawv khi Sha-ul, nws txawm nug tus thawj uas kav ib puas leej uas sawv ze ntawd tias, qhov uas muab ib tug tibneeg Romans nplawm ua ntej uas tsis tau txiav txim raug cai thiab lov? 

26 Thaum tus thawj kav ib puas leej hnov li ntawd nws txawm mus hais rau tus thawj rog uas kav ib txhiab leej tias, koj yuav ua li cas rau nws? Rau qhov tus yawg ntawd yog tibneeg Romans thiab laiv. 27 Tus thawj uas kav ib txhiab leej txawm mus cuag Sha-ul thiab nug nws hais tias, cia li qhia kuv saib, koj yog tibneeg Romans lov? Sha-ul teb tias, yog lawm. 28 Tus thawj uas kav ib txhiab leej teb tias, kuv them nyiaj ntau heev kuv thiaj ua tau tibneeg Romans. Sha-ul hais tias, tiamsis kuv yeej yug los yog tibneeg Romans. 29 Ces thaum cov tibneeg uas tseem tabtom yuav tshuaj Sha-ul zaj txawm thim ntawm nws mus tamsid. Thaum tus thawj uas kav ib txhiab leej paub tias Sha-ul yog tibneeg Romans, nws kuj ntshai heev, vim nws twb muab Sha-ul khi lawm.

​

Sha-ul Nyob Ntawm Yahdaim Cov Thawj Lub Rooj Sablaj

 30 Hnub tom qab tus thawj uas kav ib txhiab leej xav paub qhov tseeb saib yog vim li cas, cov Yahdaim thiaj li tawm tsam Sha-ul. Nws txawm muab Sha-ul daws thiab hais kom cov pov thawj hlob thiab cov thawj sawvdaws mus sablaj ua ke thiab coj Sha-ul mus sawv rau ntawm rooj sablaj.

​