XWM TXHEEJ TAUG KEV 29

Kevcai Tshuab Raj Kub Yaj

(Levis Tej Kevcai 23:23-25)

1 Lub xya hli, hnub xiab ib, yuav tuaj txoos ua ke ua kevcai dawb huv, nej tsis txhob ua ib yam haujlwm nyhav li.  Yog hnub uas nej tshuab raj kub yaj.   

2 Nej yuav muab tej no ua kevcai hlawv huvsi xyeem kom muaj pa tsw qab haum (יחוח)Yahweh lub siab, yog ib tug thav txiv nyuj, ib tug txiv yaj, xya tus menyuam txiv yaj uas muaj ib xyoos tsis muaj chaw thuam li,

3 thiab muab cov hmoov mog zoo zoo ntse roj xyeem nrog cov tsiaj no, ib tug txiv nyuj mas muab peb feem kaum hauv ib efas, ib tug txiv yaj mas muab ob feem kaum hauv ib efas,

4 thiab xya tus menyuam yaj mas ib tug muab ib feem kaum hauv ib efas,

5 thiab muab ib tug txiv tshis ua kevcai xyeem daws txim ntxuav nej kev txhaum. 

6 Yuav muab tej no xyeem tsav rau tej uas ua kevcai hlawv xyeem rau hnub hli xiab thiab tej uas ua kevcai xyeem qoob loo thiab tej uas niaj hnub muab ua kevcai hlawv xyeem thiab tej cawv txiv hmab uas hliv xyeem mus li, raws li txoj kevcai, kom muaj pa tsw qab haum (יחוח)Yahweh lub siab, yog yam uas hlawv kub nyhiab xyeem rau (יחוח)Yahweh. 

​

Hnub Uas Ntxuav Kev Txhaum

(Levis Tej Kevcai 23:26-32)

7 Lub xya hli, hnub xiab kaum, nej yuav tuaj txoos ua ke ua kevcai dawb huv thiab tswj nej lub siab tsis txhob ua ib yam haujlwm li. 

8 Nej yuav tau muab tej no ua kevcai hlawv xyeem rau (יחוח)Yahweh kom muaj pa tsw qab haum (יחוח)Yahweh lub siab, yog ib tug thav txiv nyuj, ib tug txiv yaj, xya tus me nyuam txiv yaj uas muaj ib xyoos tsis tseev muaj chaw thuam li,

9 thiab muab cov hmoov mog zoo zoo ntse roj ua kevcai xyeem qoob loo xyeem nrog cov tsiaj no, ib tug txiv nyuj mas muab peb feem kaum hauv ib efas, ib tug txiv yaj mas muab ob feem kaum hauv ib efas,

10 thiab xya tus menyuam yaj mas ib tug muab ib feem kaum hauv ib efas,

11 thiab muab ib tug txiv tshis ua kevcai xyeem daws txim tsav rau tej uas xyeem ua kevcai xyeem daws txim ntxuav kev txhaum thiab tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li. 

​

Ua Kevcai Tsev Pheej Suab

(Levis Tej Kevcai 23:33-44)

12 Lub xya hli, hnub xiab kaum tsib, yuav tuaj txoos ua ke ua kevcai dawb huv, nej tsis txhob ua ib yam haujlwm nyhav li, nej yuav ua kevcai noj haus xya hnub. 13 Nej yuav muab tej no xyeem ua kevcai hlawv huvsi xyeem, yog yam uas hlawv kub nyhiab xyeem kom muaj pa tsw qab haum (יחוח)Yahweh lub siab, yog kaum peb tug thav txiv nyuj, ob tug txiv yaj, kaum plaub tug menyuam txiv yaj uas muaj ib xyoos tsis tseev muaj chaw thuam li,

14 thiab muab cov hmoov mog zoo zoo ntse roj uas ua kevcai xyeem qoob loo xyeem ua ke nrog cov tsiaj no, kaum peb tug txiv nyuj mas ib tug muab peb feem kaum hauv ib efas, ob tug txiv yaj mas ib tug muab ob feem kaum hauv ib efas, 15 kaum plaub tug menyuam yaj mas ib tug muab ib feem kaum hauv ib efas xyeem ua ke,

16 thiab muab ib tug txiv tshis ua kevcai xyeem daws txim tsav rau tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li. 

17 Hnub uas ob mas xyeem kaum ob tug thav txiv nyuj, ob tug txiv yaj, kaum plaub tug menyuam txiv yaj uas muaj ib xyoos tsis muaj chaw thuam li,

18 thiab tej uas ua kevcai xyeem qoob loo thiab tej cawv txiv hmab uas hliv xyeem ua ke nrog tej txiv nyuj thiab tej txiv yaj thiab tej menyuam yaj npaum li uas kevcai yuav tau xyeem,

19 thiab muab ib tug txiv tshis ua kevcai xyeem daws txim tsav rau tej uas niaj hnub muab ua kevcai hlawv huvsi xyeem mus li thiab tej uas ua kevcai xyeem qoob loo thiab tej cawv txiv hmab uas hliv xyeem. 

20 Hnub uas peb muab kaum ib tug txiv nyuj, ob tug txiv yaj, kaum plaub tug menyuam txiv yaj uas muaj ib xyoos tsis muaj chaw thuam li,

21 thiab tej uas ua kevcai xyeem qoob loo thiab tej cawv txiv hmab uas hliv xyeem ua ke nrog tej txiv nyuj thiab tej txiv yaj thiab tej menyuam yaj npaum li uas kevcai yuav tau xyeem,

22 thiab muab ib tug txiv tshis ua kevcai xyeem daws txim tsav rau tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li. 

23 Hnub uas plaub muab kaum tus txiv nyuj, ob tug txiv yaj, kaum plaub tug menyuam txiv yaj uas muaj ib xyoos tsis muaj chaw thuam li,

24 thiab tej uas ua kevcai xyeem qoob loo thiab tej cawv txiv hmab uas hliv xyeem ua ke nrog tej txiv nyuj thiab tej txiv yaj thiab tej menyuam yaj npaum li uas kevcai yuav tau xyeem,

25 thiab muab ib tug txiv tshis ua kevcai xyeem daws txim tsav rau tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li.

26 Hnub uas tsib muab cuaj tug txiv nyuj, ob tug txiv yaj, kaum plaub tug menyuam txiv yaj uas muaj ib xyoos tsis muaj chaw thuam li,

27 thiab tej uas ua kevcai xyeem qoob loo thiab tej cawv txiv hmab uas hliv xyeem ua ke nrog tej txiv nyuj thiab tej txiv yaj thiab tej menyuam yaj npaum li uas kevcai yuav tau xyeem,

28 thiab muab ib tug txiv tshis ua kevcai xyeem daws txim tsav rau tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li.   

29 Hnub uas rau muab yim tus txiv nyuj, ob tug txiv yaj, kaum plaub tug menyuam txiv yaj uas muaj ib xyoos tsis muaj chaw thuam li,

30 thiab tej uas ua kevcai xyeem qoob loo thiab tej cawv txiv hmab uas hliv xyeem ua ke nrog tej txiv nyuj thiab tej txiv yaj thiab tej menyuam yaj npaum li uas kevcai yuav tau xyeem,

31 thiab muab ib tug txiv tshis ua kevcai xyeem daws txim tsav rau tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li. 

32 Hnub uas xya muab xya tus txiv nyuj, ob tug txiv yaj, kaum plaub tug menyuam txiv yaj uas muaj ib xyoos tsis muaj chaw thuam li,

33 thiab tej uas ua kevcai xyeem qoob loo thiab tej cawv txiv hmab uas hliv xyeem ua ke nrog tej txiv nyuj thiab tej txiv yaj thiab tej menyuam yaj npaum li uas kevcai yuav tau xyeem,

34 thiab muab ib tug txiv tshis ua kevcai xyeem daws txim tsav rau tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li. 

35 Hnub uas yim nej yuav tuaj txoos ua ke caiv so tiag tiag li, nej tsis txhob ua ib yam haujlwm nyhav li. 

36 Tiamsis nej yuav muab tej no ua kevcai hlawv huvsi xyeem yog yam uas hlawv kub nyhiab xyeem kom muaj pa tsw qab haum (יחוח)Yahweh lub siab, mas yog ib tug txiv nyuj, ib tug txiv yaj, xya tus menyuam txiv yaj uas muaj ib xyoos tsis muaj chaw thuam li,

37 thiab tej uas ua kevcai xyeem qoob loo thiab tej cawv txiv hmab uas hliv xyeem ua ke nrog tus txiv nyuj thiab tus txiv yaj thiab tej menyuam yaj npaum li uas kevcai yuav tau xyeem,

38 thiab muab ib tug txiv tshis ua kevcai xyeem daws txim tsav rau tej uas niaj hnub ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem mus li.

39 Tej no nej yuav muab xyeem rau (יחוח)Yahweh rau tej kevcai noj haus raws tej sijhawm uas teem cia, yog xyeem tsav rau tej uas nej xyeem pauj tej uas nej fiv cia tseg rau (יחוח)Yahweh lawd thiab tej uas nej zoo siab muab xyeem pub xwb thiab tej uas ua kevcai hlawv huvsi xyeem thiab tej uas ua kevcai xyeem qoob loo thiab tej cawv txiv hmab uas hliv xyeem thiab tej uas ua kevcai xyeem sib raug zoo.

40 Mas Mauxes hais rau cov Ixayees raws li uas (יחוח)Yahweh tau hais rau nws txhua yam.