Tej Uas Niaj Hnub Xyeem

1 (יחוח)Yahweh hais rau Mauxes tias,

2 cia li hais rau cov Ixayees tias, tej uas muab xyeem rau kuv, yog tej zaub mov uas yog muab hlawv kub nyhiab xyeem kom muaj pa tsw qab haum kuv lub siab, mas nej  yuav tau mob siab xyeem rau kuv raws li tej sijhawm uas teem cia.

3 Koj hais rau lawv tias, tej no yog tej uas yuav muab hlawv kub nyhiab xyeem rau (יחוח)Yahweh, yog ob tug menyuam txiv yaj uas muaj ib xyoos tsis muaj chaw thuam li uas yuav tau niaj hnub xyeem mus li. 

4 Thaum tagkis nej yuav xyeem ib tug menyuam yaj, thaum yuav tsaus ntuj nej yuav xyeem dua ib tug.

5 Thiab muab ib feem kaum hauv ib efas hmoov mog zoo zoo ntse ib feem plaub hauv ib hees roj uas tsuam tau zoo zoo xyeem ua kevcai xyeem qoob loo.

6 No yog tej uas niaj hnub yuav ua kevcai hlawv huvsi xyeem mus li uas twb muab cob rau nej ntawm roob Xinais, kom muaj pa tsw qab haum (יחוח)Yahweh lub siab, ua yam uas hlawv kub nyhiab xyeem rau (יחוח)Yahweh.

7 Tej uas yuav hliv xyeem mas muab ib feem plaub hauv ib hees cawv txiv hmab nrog ib tug menyuam yaj ua ke, muab cawv ntxwg hliv xyeem rau (יחוח)Yahweh rau hauv lub chaw uas dawb huv.

8 Muab ib tug menyuam yaj xyeem rau thaum yuav tsaus ntuj, ib yam nkaus li uas muab xyeem thaum tagkis ua kevcai xyeem qoob loo thiab ua kevcai hliv cawv txiv hmab xyeem, yuav muab hlawv kub nyhiab xyeem kom muaj pa tsw qab haum (יחוח)Yahweh lub siab. 

​

Tej Uas Xyeem Rau Hnub Sabbath Thiab Xyeem Txhua Lub Hli

9 Hnub Sabbath muab ob tug menyuam txiv yaj uas muaj ib xyoos tsis muaj chaw thuam li thiab ob feem kaum hauv ib efas hmoov mog zoo zoo ntse roj ua kevcai xyeem qoob loo nrog tej cawv txiv hmab uas hliv xyeem ua ke. 

10 No yog tej uas ua kevcai hlawv huvsi xyeem rau txhua hnub Sabbath, yog ua los tsav rau tej uas niaj hnub muab ua kevcai hlawv xyeem thiab tej cawv txiv hmab uas hliv xyeem mus li.

11 Txhua lub hli, hnub xiab ib, muab tej no ua kevcai hlawv huvsi xyeem rau (יחוח)Yahweh, yog ob tug thav txiv nyuj, ib tug txiv yaj, xya tus menyuam txiv yaj uas muaj ib xyoos tsis muaj chaw thuam li,

12 thiab muab peb feem kaum hauv ib efas hmoov mog zoo zoo ntse roj xyeem nrog ib tug txiv nyuj ua kevcai xyeem qoob loo, thiab ob feem kaum hauv ib efas hmoov mog zoo zoo ntse roj xyeem nrog ib tug txiv yaj,

13 thiab ib feem kaum hauv ib efas hmoov mog zoo zoo ntse roj ua kevcai xyeem qoob loo xyeem nrog ib tug menyuam yaj ua ke, ua kevcai hlawv huvsi xyeem yog yam uas hlawv kub nyhiab xyeem kom muaj pa tsw qab haum

(יחוח)Yahweh lub siab. 

14 Tej uas yuav muab hliv xyeem, ib tug txiv nyuj, muab ib nrab hees cawv txiv hmab, ib tug txiv yaj mas muab ib feem peb hauv ib hees, ib tug me nyuam yaj mas muab ib feem plaub hauv ib hees, no yog tej uas muab ua kevcai hlawv

huvsi xyeem txhua lub hli hauv ib xyoos. 

15 Thiab yuav muab ib tug txiv tshis xyeem rau (יחוח)Yahweh ua kevcai xyeem daws txim, yuav muab xyeem tsav rau tej uas niaj hnub muab ua kevcai hlawv xyeem thiab tej cawv txiv hmab uas hliv xyeem mus li. 

​

Ua Kevcai Noj Ncuav Tsis Xyaw Keeb

(Levis Tej Kevcai 23:4-8)

16 Lub ib hlis, hnub xiab kaum plaub, yog (יחוח)Yahweh Kevcai Hla Dhau.

17 Hnub xiab kaum tsib, lub hli no yog ua kevcai npaj noj haus, mas yuav noj ncuav tsis xyaw keeb xya hnub.

18 Thawj hnub nej yuav tuaj txoos ua ke ua kevcai dawb huv, nej tsis txhob ua ib yam haujlwm nyhav kiag li.

19 Nej muab tej no hlawv kub nyhiab xyeem ua kevcai hlawv huvsi xyeem rau (יחוח)Yahweh, yog ob tug thav txiv nyuj, ib tug txiv yaj, thiab xya tus menyuam txiv yaj uas muaj ib xyoos, yuav saib tib zoo tsis tseev muaj chaw thuam,

20 thiab muab cov hmoov mog zoo zoo ntse roj ua kevcai xyeem qoob loo xyeem nrog cov tsiaj no, ib tug txiv nyuj mas muab peb feem kaum hauv ib efas, ib tug txiv yaj mas muab ob feem kaum hauv ib efas,

21 thiab txhua tus menyuam yaj mas muab ib feem kaum hauv ib efas. 

22 Thiab yuav muab ib tug txiv tshis los ua kevcai xyeem daws txim, yog ntxuav nej kev txhaum.  

23 Nej yuav muab tej no xyeem tsav rau tej uas thaum tagkis nej muab ua kevcai hlawv xyeem, yog tej uas niaj hnub ua kevcai hlawv huvsi xyeem mus li. 

24 Nej yuav niaj hnub muab xyeem kom puv xya hnub, yog tej zaub mov uas hlawv kub nyhiab xyeem kom muaj pa tsw qab haum (יחוח)Yahweh lub siab.  Yuav muab tej no xyeem tsav rau tej uas niaj hnub muab ua kevcai hlawv xyeem thiab tej cawv txiv hmab uas hliv xyeem mus li.

25 Hnub uas xya nej yuav tuaj txoos ua ke ua kevcai dawb huv, nej tsis txhob ua ib yam haujlwm nyhav kiag li. 

​

Tej Uas Xyeem Thaum Hlais Mog Tag

(Levis Tej Kevcai 23:15-22)

26 Hnub uas nej xyeem thawj phaum qoob loo, thaum nej muab qoob tshiab xyeem rau (יחוח)Yahweh ua kevcai xyeem qoob loo, yog hnub uas nej ua kevcai xya lub chib so, mas nej yuav tuaj txoos ua ke ua kevcai dawb huv, nej tsis txhob ua ib yam haujlwm nyhav kiag li.  

27 Nej yuav muab tej no ua kevcai hlawv huvsi xyeem kom muaj pa tsw qab haum (יחוח)Yahweh lub siab, yog ob tug thav txiv nyuj, ib tug txiv yaj, xya tus menyuam txiv yaj uas muaj ib xyoos,

28 thiab muab cov hmoov mog zoo zoo ntse roj ua kevcai xyeem qoob loo xyeem nrog cov tsiaj no, ib tug txiv nyuj mas muab peb feem kaum hauv ib efas, ib tug txiv yaj mas muab ob feem kaum hauv ib efas,

29 thiab xya tus menyuam yaj mas ib tug muab ib feem kaum hauv ib efas,

30 thiab ib tug txiv tshis ua kevcai ntxuav kev txhaum.

31 Nej yuav muab tej no xyeem thiab tej cawv txiv hmab uas hliv xyeem tsav rau tej uas niaj hnub muab xyeem ua kevcai hlawv xyeem thiab ua kevcai xyeem qoob loo mus li. Yuav saib tib zoo tsis tseev muaj chaw thuam li.