Xelaufehas Cov Ntxhais Thov Qub Txeeg Qub Teg

1 Xelaufehas cov ntxhais txav los.  Xelaufehas yog Hefaws tus tub, Hefaws yog Kile‑as tus tub, Kile‑as yog Makhis tus tub, Makhis yog Manaxes tus tub, yog xeem Manaxes.  Manaxes yog Yahxej tus tub.  Cov ntxhais ntawd tej npe hu ua Malas, Nau‑as, Haulas, Meekhas thiab Thilaxas. 

2 Lawv tuaj sawv ntawm Mauxes thiab pov thawj Ele‑axas thiab cov uas ua hlob thiab cov pejxeem sawvdaws xubntiag rau ntawm lub qhov rooj tsev ntaub sib ntsib mas hais tias,

3 peb txiv tuag hauv tebchaws moj sab qhua.  Nws tsis yog nrog Khaulas pab tawm tsam (יחוח)Yahweh, nws tuag nws lub txim xwb thiab nws tsis muaj tub.

4 Ua cas nej yuav muab peb txiv lub npe rho tawm hauv nws cum lawm vim nws tsis muaj tub li? Thov pub peb nrog peb txiv tej kwvtij tau teb ua peb tug thiab.

5 Mauxes thiaj coj lawv cov lus mus cuag (יחוח)Yahweh.

6 (יחוח)Yahweh hais rau Mauxes tias,

7 Xelaufehas cov ntxhais hais raug lawm. Koj cia li pub kom lawv nrog lawv txiv tej kwvtij tau tebchaws ua qub txeeg qub teg ua lawv tug, thiab cia lawv txiv li qub txeeg qub teg poob ua lawv tug.

8 Koj cia li hais rau cov Ixayees tias, yog ib tug txivneej twg tuag es nws tsis muaj tub, kuj cia nws qub txeeg qub teg poob rau nws tus ntxhais.

9 Yog nws tsis muaj ntxhais, nej yuav muab nws qub txeeg qub teg rau nws tej txheeb kwvtij. 

10 Yog nws tsis muaj kwv tsis muaj tij thiab, kuj muab nws qub txeeg qub teg rau nws txiv tej kwvtij.

11 Yog nws txiv tsis muaj kwvtij thiab, kuj muab nws qub txeeg qub teg rau tus uas txheeb txheeb hauv nws cum, mas tus ntawd yuav saws tau ua nws teej nws tug.  No yog ib txojkev li kevcai rau cov Ixayees coj raws li (יחוח)Yahweh hais rau Mauxes lawd. 

​

Mauxes Tsa Yahshua Sawv Nws Chaw

12 (יחוח)Yahweh hais rau Mauxes tias, koj cia li nce mus saum lub roob Anpalis no thiab saib mus rau lub tebchaws uas kuv muab rau cov Ixayees. 

13 Thaum koj pom lawd koj yuav tau mus nrog koj tej poj koob yawm txwv nyob yam nkaus li koj tus tijlaug Aloos twb mus lawm,

14 rau qhov neb ob leeg tsis quav ntsej kuv tej lus hauv tebchaws moj sab qhua Xees rau thaum uas cov pejxeem cam thawj es neb twb tsis ua rau sawvdaws hwm kuv ua tus dawb huv rau ntawm dej txhawv tab meeg lawv.  (No yog cov dej Melinpas ntawm Khades hauv tebchaws moj sab qhua Xees). 

15 Mauxes hais rau (יחוח)Yahweh tias,

16 thov (יחוח)Yahweh uas yog Tus Tswv uas kav tibneeg sawvdaws txojsia, tsa ib tug thawj los coj cov pejxeem no,

17 yog ib tug uas yuav kav tau lawv thiab coj lawv tawm mus thiab nkag los, xwv (יחוח)Yahweh cov tibneeg thiaj li zoo tsis thooj li pab yaj uas tsis muaj Tus Tswv yug.  

18 (יחוח)Yahweh hais rau Mauxes tias, cia li coj Noos tus tub Yahshua uas muaj Tus Ntsuj Plig Dawbhuv nrog nraim nws tuaj thiab tsa tes npuab saum nws. 

19 Kom nws sawv ntawm pov thawj Ele‑axas thiab cov pejxeem sawvdaws xubntiag mas koj yuav ua kevcai tsa nws tab meeg sawv daws. 

20 Koj yuav muab koj lub hwjchim ib txhia rau nws kom ib tsoom pejxeem Ixayees sawv daws thiaj li mloog nws lus. 

21 Nws yuav sawv ntawm pov thawj Ele‑axas xubntiag mas Ele‑axas yuav siv Ulis thiab Thumis ntawm (יחוח)Yahweh xubntiag saib ()Yahweh lub siab nyiam li cas.  Nws thiab ib tsoom Ixayees sawvdaws yuav tawm mus thiab nkag los raws li tus pov thawj hais.

22 Mauxes ua raws nraim li uas (יחוח)Yahweh hais rau nws. Nws coj Yahshua tuaj thiab kom nws sawv ntawm pov thawj Ele‑axas thiab cov pejxeem sawvdaws xub ntiag,

23 mas Mauxes tsa tes npuab saum Yahshua thiab ua kevcai tsa nws raws li (יחוח)Yahweh hais kom Mauxes ua.