XWM TXHEEJ TAUG KEV 4

Tej Haujlwm Uas Muab Rau Cov Levis Ua

1 (יחוח)Yahweh hais rau Mauxes thiab Aloos tias,

2 cia li muab Khauhas ceg uas yog xeem Levis nce npe raws li lawv tej cum, thiab raws li lawv tej tsev neeg,

3 nce npe cov uas hnub nyoog muaj peb caug xyoo txog tsib caug xyoo, uas txawj ua haujlwm es yuav ua tau haujlwm ntawm lub tsev ntaub sib ntsib. 

4 No yog tej haujlwm uas Khauhas ceg ua ntawm lub tsev ntaub sib ntsib, yog saib tej yam uas dawb huv kawg nkaus. 

5 Thaum yuav tshais chaw mus mas Aloos thiab nws cov tub yuav nkag mus, mas yuav rho daim ntaub uas thaiv coj los kauv lub phij xab uas ntim (יחוח)Yahweh tej lus,

6 thiab lawv yuav muab tawv ntshuab hiavtxwv kauv thiab muab ib daim ntaub xiav kauv tuaj Txheej saud mas ntxig las kwv. 

7 Thiab lawv yuav muab ib daim ntaub xiav pua saum lub rooj uas txawb ncuav rau ntawm (יחוח)Yahweh xub ntiag thiab muab tej tais pliab tais ntim uas rau hmoov tshuaj tsw qab, thiab tais phaj thiab tej lam hwj uas hliv cawv txiv hmab xyeem txawb rau saud, thiab muab cov ncuav uas niaj hnub xyeem ib txhis li tso rau saud,

8 mas yuav muab ib daim ntaub liab los kauv thiab muab tawv ntshuab hiavtxwv los kauv rau saud thiab ntxig tej las kwv. 

9 Lawv yuav muab ib daim ntaub xiav los kauv tus kav teeb thiab tej teeb, tej rab txiab uas txiav teeb xeeb, thiab tej phaj pliab, thiab tej lam hwj roj sam teeb,

10 thiab yuav muab tawv ntshuab hiavtxwv qhwv lub teeb thiab tej twj uas siv huvsi, thiab muab txawb rau saum lub txaj kwv. 

11 Lawv yuav muab ib daim ntaub xiav kauv lub thaj kub thiab muab tawv ntshuab hiavtxwv los kauv es ntxig las kwv. 

12 Lawv yuav muab ib daim ntaub xiav qhwv tej twj uas siv ua haujlwm rau hauv lub tsev pe hawm (יחוח)Yahweh huvsi, thiab muab tawv ntshuab hiavtxwv los kauv, thiab muab txawb rau saum lub txaj kwv.

13 Lawv yuav muab cov tshauv ntawm lub thaj yawm pov tseg thiab muab ib daim ntaub tsamxem kauv lub thaj.

14 Lawv yuav muab tej twj uas siv ntawm lub thaj txawb rau saud, yog tej uas siv ua haujlwm, yog tej yias rau ncaig taws, tej nqe lauj nqe nqaij, tej duav phuaj, thiab tej phaj, yog txhua yam twj uas siv ntawm lub thaj. Lawv yuav muab tawv ntshuab hiav txwv los kauv huvsi thiab ntxig las kwv.

15 Thaum Aloos thiab nws cov tub kauv lub tsev pe hawm (יחוח)Yahweh thiab tej twj uas siv hauv lub tsev pe hawm (יחוח)Yahweh huvsi tag lawd, mas thaum uas lawv yuav sawv kev mus ces Khauhas ceg yuav los kwv tej no, tiamsis lawv kov tsis nyog tej uas dawb huv no li, nyob tsam ces lawv ho tuag. Tej no yog tej uas nyob hauv lub tsev ntaub sib ntsib mas Khauhas ceg yuav tau kwv.

16 Pov thawj Aloos tus tub Ele‑axas saib xyuas tej roj uas sam lub teeb, thiab tej hmoov tshuaj tsw qab, thiab tej uas niaj hnub xyeem ua kevcai xyeem qoob loo, thiab tej roj uas siv ua kevcai, thiab nws yuav saib xyuas tag nrho

(יחוח)Yahweh lub tsev ntaub thiab txhua yam uas nyob hauv, yog lub tsev pe hawm (יחוח)Yahweh thiab tej twj uas siv rau hauv.

17 (יחוח)Yahweh hais rau Mauxes thiab Aloos tias,

18 tsis txhob cia Khauhas ceg tej cum raug kev puam tsuaj tag hauv cov Levis mus,

19 tiamsis neb yuav tau ua li no kom lawv thiaj muaj txojsia nyob thiab tsis tuag rau lub sijhawm uas lawv txav los ze tej qhov txhia chaw dawb huv kawg nkaus no.  Aloos thiab nws cov tub yuav nkag mus feeb haujlwm feeb nra rau lawv,

20 tiamsim tsis txhob kheev lawv nkag mus xauj tej uas dawb huv, txawm yog tib ntsais muag xwb los lawv yuav tuag li.

21 (יחוח)Yahweh hais rau Mauxes tias,

22 cia li suav Nkawsoos ceg nce npe raws li lawv tej cum thiab raws li lawv tsev neeg. 

23 Koj yuav suav cov uas hnub nyoog muaj peb caug xyoo txog tsib caug xyoo, yog txhua tus uas txawj ua haujlwm es yuav ua tau haujlwm rau hauv lub tsev ntaub sib ntsib. 

24 No yog Nkawsoos ceg tej cum li haujlwm, yog pab tes pab taw thiab kwv nra. 

25 Lawv yuav thauj tej ntaub uas ua (יחוח)Yahweh lub tsev ntaub, thiab lub tsev ntaub sib ntsib, thiab daim ntaub uas vov, thiab daim tawv ntshuab hiavtxwv uas vov Txheej saud, thiab daim ntaub uas ua qhov rooj tsev ntaub sib ntsib,

26 thiab tej ntaub uas xov laj kab puag ncig (יחוח)Yahweh lub tsev ntaub, thiab lub thaj, thiab daim ntaub ua rooj vag, thiab tej hlua, thiab tej twj uas siv huvsi. Lawv yuav ua txhua yam haujlwm uas ntsig txog tej no.

27 Txhua yam haujlwm uas Nkawsoos ceg ua mas Aloos thiab Aloos cov tub feeb rau lawv ua thiab lawv thauj. Koj yuav tau qhia txhua yam uas yog lawv li feem thauj rau lawv thauj.

28 No yog tej haujlwm uas Nkawsoos ceg tej cum ua ntawm lub tsev ntaub sib ntsib.  Pov thawj Aloos tus tub Ithamas ua tus saib xyuas lawv tej haujlwm. 

29 Cia li suav Melalis ceg raws li lawv tej cum thiab raws li lawv tej tsev neeg.

30 Koj yuav suav cov uas hnub nyoog muaj peb caug xyoo txog tsib caug xyoo, yog txhua tus uas txawj ua haujlwm es yuav ua tau haujlwm rau hauv lub tsev ntaub sib ntsib.

31 No yog tej uas lawv yuav tau thauj, yog lawv tej haujlwm rau hauv lub tsev ntaub sib ntsib, mas yog tej ntoo tab xov lub tsev ntaub, tej las, tej ncej thiab tej taw ncej,

32 thiab tej ncej laj kab uas xov puag ncig, thiab tej taw tiag ncej, tej tswg, tej hlua, thiab tej twj siv, thiab txhua yam uas siv.  Koj feeb haujlwm qhia txhua yam rau lawv thauj.

33 No yog tej haujlwm uas Melalis ceg tej cum ua, yog txhua yam haujlwm uas lawv ua ntawm lub tsev ntaub sib ntsib, pov thawj Aloos tus tub Ithamas yog tus uas kom ua tej haujlwm ntawd.

34 Mauxes thiab Aloos thiab cov uas ua hlob hauv cov pejxeem txawm suav Khauhas ceg tej cum raws li lawv tej cum thiab raws li lawv tej tsev neeg,

35 suav cov uas hnub nyoog muaj peb caug xyoo txog tsib caug xyoo, yog txhua tus uas txawj ua haujlwm es yuav ua tau haujlwm rau hauv lub tsev ntaub sib ntsib,

36 mas suav tej cum ntawd huvsi muaj 2,750 leej.

37 No yog cov uas suav tau hauv Khauhas ceg tej cum, yog txhua tus uas ua haujlwm ntawm lub tsev ntaub sib ntsib uas Mauxes thiab Aloos tau suav raws li (יחוח)Yahweh hais kom Mauxes ua lawd. 

38 Cov tibneeg hauv Nkawsoos ceg raws li lawv tej cum thiab raws li lawv tej tsev neeg,

39 cov uas hnub nyoog muaj peb caug xyoo txog tsib caug xyoo, yog txhua tus uas txawj ua haujlwm es yuav ua tau haujlwm rau hauv lub tsev ntaub sib ntsib,

40 mas suav raws li tej cum thiab raws li tej tsev neeg huvsi muaj 2,630 leej.

41 No yog Nkawsoos ceg tej cum, yog txhua tus uas ua haujlwm ntawm lub tsev ntaub sib ntsib uas Mauxes thiab Aloos tau suav raws li (יחוח)Yahweh hais kom Mauxes ua lawd.

42 Cov tibneeg hauv Melalis ceg raws li lawv tej cum thiab raws li lawv tej tsev neeg,

43 cov uas hnub nyoog muaj peb caug xyoo txog tsib caug xyoo, yog txhua tus uas txawj ua haujlwm es yuav ua tau haujlwm rau hauv lub tsev ntaub sib ntsib,

44 mas suav tej cum huvsi muaj 3,200 leej. 

45 No yog cov uas suav hauv Melalis cov tub tej cum uas Mauxes thiab Aloos tau suav raws li (יחוח)Yahweh hais rau Mauxes lawd. 

46 Txhua tus uas suav tau hauv cov Levis, uas Mauxes thiab Aloos thiab cov uas ua hlob hauv cov Ixayees tau suav raws li tej cum thiab raws li tej tsev neeg,

47 cov uas hnub nyoog muaj peb caug xyoo txog tsib caug xyoo, txhua tus uas txawj ua haujlwm es yuav ua tau haujlwm thiab kwv tau nra rau hauv lub tsev ntaub sib ntsib,

48 mas cov uas suav tau ntawd muaj 8,580 leej.

49 Lawv raug tsa ua haujlwm raws li (יחוח)Yahweh tau hais rau Mauxes lawd, txhua tus nyias ua nyias hauj lwm thiab nyias kwv nyias nra. Yog li no, Mauxes thiaj tau suav lawv raws li (יחוח)Yahweh hais kom Mauxes ua lawd.