Suav Cov Levis Thiab Cov Levis Tes Haujlwm

1Ntawm no mus yog Aloos thiab Mauxes caj ces, yog ncua sijhawm uas

(יחוח)Yahweh nrog Mauxes hais lus saum lub roob Xinais.

2Aloos cov tub cov npe muaj li no, Nadas yog tus tub hlob, thiab Anpihus, Ele‑axas thiab Ithamas. 

3Cov no yog Aloos cov tub uas muab roj ywg tsa ua pov thawj tej npe, yog cov uas nws tsa los ua pov thawj li haujlwm. 

4Tiamsis Nadas thiab Anpihus tuag rau ntawm (יחוח)Yahweh lub xub ntiag rau thaum uas nkawv muab tej hluavtaws uas tsis dawb huv coj los xyeem ntawm (יחוח)Yahweh xub ntiag hauv tebchaws moj sab qhua Xinais, thiab nkawv kuj tsis muaj menyuam.  Vim li no Ele‑axas thiab Ithamas thiaj ua pov thawj tes haujlwm rau thaum Aloos uas yog nkawv txiv tseem muaj txojsia nyob. 

5 (יחוח)Yahweh hais rau Mauxes tias,

6 cia li coj xeem Levis los ze thiab cia lawv nyob ntawm tus pov thawj Aloos xub ntiag kom lawv pab Aloos ua haujlwm.

7 Lawv yuav ua haujlwm pab Aloos thiab ua haujlwm rau cov pejxeem sawvdaws ntawm lub tsev ntaub sib ntsib rau thaum uas lawv ua koom ntawm

(יחוח)Yahweh lub tsev ntaub.

8 Lawv yuav tu thiab saib tej twj siv hauv lub tsev ntaub sib ntsib txhua yam huvsi thiab yuav ua haujlwm rau cov Ixayees rau thaum lawv pab ua koom ntawm (יחוח)Yahweh lub tsev ntaub.

9 Cia li muab cov Levis pub rau Aloos thiab nws cov tub, lawv yog cov uas muab pub kiag rau Aloos hauv cov Ixayees.

10 Cia li tsa Aloos thiab nws cov tub ua pov thawj tes haujlwm.  Tiamsis yog lwm tus txav los ze mas nws yuav raug muab tua pov tseg.

11(יחוח)Yahweh hais rau Mauxes tias,

12 saib maj, kuv twb muab cov Levis rho hauv cov Ixayees los theej cov Ixayees txhua tus tub hlob uas yug hauv plab los. Cov Levis yuav yog kuv tug.

13 Rau qhov txhua tus tub hlob yeej yog kuv tug.  Hnub uas kuv tau tua tej tub

hlob huvsi hauv Iziv tebchaws ntawd kuv twb cais cov Ixayees txhua tus tub hlob, tsis hais tibneeg li thiab tsiaj txhu li kom dawb huv rau kuv.  Lawv yeej yuav ua kuv tug, kuv yog (יחוח)Yahweh.

14 (יחוח)Yahweh hais rau Mauxes hauv tebchaws moj sab qhua Xinais tias,

15 cia li suav cov Levis raws li lawv tej cum thiab raws li lawv tej tsev neeg.  Koj yuav tau suav txhua tus txivneej uas hnub nyoog muaj ib hlis rov saud.

16 Mauxes kuj suav lawv raws li uas (יחוח)Yahweh hais kom nws ua.

17 No yog Levis cov tub tej npe, Nkawsoos, Khauhas thiab Melalis.

18 No yog Nkawsoos cov tub tej npe raws li lawv cum, yog Linis thiab Sime‑is.

19 Khauhas cov tub raws li lawv cum yog Alav, Ixahas, Henploos thiab Uxi‑ees. 

20 Melalis cov tub raws li lawv cum yog Malis thiab Musis.  Cov no yog cov Levis tsev neeg raws li lawv cum. 

21 Nkawsoos ceg muaj cum Linis thiab cum Sime‑is, ob cum no yog Nkawsoos ceg.

22 Suav tag nrho cov txivneej uas hnub nyoog muaj ib hlis rov saud huvsi mas muaj 7,500 leej.

23 Nkawsoos ceg tej cum ntawd yuav tsa tsev ntaub rau ntawm (יחוח)Yahweh lub tsev ntaub sab hnub poob,

24 mas La‑ees tus tub Eliyaxas ua Nkawsoos ceg tus thawj.

25 Tej uas Nkawsoos ceg yuav tau saib ntawm lub tsev ntaub sib ntsib yog

(יחוח)Yahweh lub tsev ntaub, yog lub tsev ntaub thiab tej daim ntaub vov thiab daim ntaub ua qhov rooj tsev ntaub sib ntsib,

26 thiab tej daim ntaub xov laj kab thiab daim ntaub ua rooj vag uas xov puag ncig (יחוח)Yahweh lub tsev ntaub thiab lub thaj, thiab tej hlua thiab txhua yam uas siv rau tej no.

27 Khauhas ceg muaj cum Alav thiab cum Ixahas thiab cum Henploos thiab cum Uxi‑ees. Cov cum no yog Khauhas ceg.

28 Suav tag nrho cov txivneej uas hnub nyoog muaj ib hlis rov saud huvsi mas muaj 8,600 leej uas saib haujlwm ntawm lub chaw pe hawm (יחוח)Yahweh. 

29 Khauhas cov tub li cum no yuav tsa tsev ntaub rau ntawm (יחוח)Yahweh lub tsev ntaub sab nrad,

30 mas Uxi‑ees tus tub Elixafas ua Khauhas ceg tej cum tus thawj.

31 Tej uas lawv yuav tau saib yog lub phij xab, lub rooj, lub teeb, ob lub thaj, tej twj siv uas cov pov thawj siv hauv lub tsev pe hawm (יחוח)Yahweh, thiab daim ntaub uas thaiv, thiab txhua yam uas siv rau tej no.

32 Pov thawj Aloos tus tub Ele‑axas yuav ua tus thawj uas saib cov thawj hauv cov Levis ntawd thiab saib cov uas tu lub tsev pe hawm (יחוח)Yahweh.

33 Melalis ceg muaj cum Malis thiab cum Musis, ob cum no yog Melalis ceg.

34 Suav cov txivneej tag nrho huvsi uas hnub nyoog muaj ib hlis rov saud huvsi mas muaj 6,200 leej.

35 Anpiha‑is tus tub Xuli‑ees ua Melalis ceg tej cum tus thawj.  Lawv yuav tsa tsev ntaub rau ntawm (יחוח)Yahweh lub tsev ntaub sab ped.

36 Tej haujlwm uas muab rau Melalis ceg ua yog saib xyuas tej ntoo tab ntawm (יחוח)Yahweh lub tsev ntaub, tej las, tej ncej, tej taw tiag ncej, thiab tej cuab yeej cuab tam, thiab txhua yam uas siv rau tej no,

37 thiab tej ncej laj kab uas xov puag ncig, tej taw tiag ncej, tej tswg, thiab tej hlua.

38 Cov uas yuav tsa tsev ntaub ncaj rau ntawm (יחוח)Yahweh lub tsev ntaub lub qhov rooj uas yog sab hnub tuaj mas yog Mauxes thiab Aloos thiab Aloos cov tub. Lawv li haujlwm yog saib xyuas tej kevcai hauv lub tsev pe hawm (יחוח)Yahweh, yog saib xyuas txhua yam haujlwm uas yuav ua rau cov Ixayees.  Yog lwm tus txav los ze mas yuav raug muab tua pov tseg.

39 Cov tibneeg uas suav rau hauv cov Levis uas Mauxes thiab Aloos tau suav raws li (יחוח)Yahweh hais mas cov txivneej raws li lawv tej tsev neeg txhua tus uas hnub nyoog muaj ib hlis rov saud huvsi muaj 22,000 leej. 

​

Txhiv Cov Tub Hlob

40 (יחוח)Yahweh hais rau Mauxes tias, cia li suav cov Ixayees tej tub hlob txhua tus uas hnub nyoog muaj ib hlis rov saud mas muab nce npe cia huvsi.

41 Koj yuav tau muab cov Levis rho los rau kuv theej cov Ixayees txhua tus tub hlob. Kuv yog (יחוח)Yahweh. Thiab yuav muab cov Levis tej tsiaj los theej cov Ixayees thawj tug menyuam tsiaj txhua tus huvsi.

42 Yog li no Mauxes thiaj suav cov Ixayees txhua tus tub hlob, raws li (יחוח)Yahweh kom Mauxes ua lawd.

43 Cov tub hlob uas suav tau raws li tej npe uas hnub nyoog muaj ib hlis rov saud huvsi muaj 22,273 leeg. 

44 (יחוח)Yahweh hais rau Mauxes tias,

45 cia li muab cov Levis los theej cov Ixayees tej tub hlob huvsi, thiab muab cov Levis tej tsiaj theej cov Ixayees tej tsiaj. Cov Levis yuav yog kuv tug, Kuv Yog (יחוח)Yahweh.

46 Qhov uas yuav txhiv cov Ixayees tej tub hlob 273 leeg uas twb yog tshaj cov txivneej Levis lawm,

47 mas yuav sau ib leeg tsib sekhees nyiaj raws li tej sekhees uas siv hauv lub chaw pe hawm (יחוח)Yahweh, ib sekhees muaj nees nkaum kelas, mas koj yuav sau tej nyiaj ntawd cia,

48 muab cov nyiaj uas txhiv tej tub hlob uas tshaj ntawd pub rau Aloos thiab nws cov tub.

49 Mauxes thiaj sau tej nyiaj uas txhiv ntawm tej tub hlob uas tshaj cov uas cov Levis twb txhiv lawm, 

50 yog sau cov Ixayees tej tub hlob li nyiaj, mas huvsi muaj 1,365 sekhees nyiaj raws li tej sekhees uas siv hauv lub chaw pe hawm (יחוח)Yahweh,

51 thiab Mauxes muab cov nyiaj txhiv ntawd rau Aloos thiab Aloos cov tub raws li (יחוח)Yahweh tej lus uas nws kom Mauxes ua.