XWM TXHEEJ TAUG KEV 6

Kevcai Ua Naxis

1 (יחוח)Yahweh hais rau Mauxes tias,

2 koj cia li hais rau cov Ixayees tias, thaum tus txivneej twg lossis tus pojniam twg tau cog lus tawv tseg cia, yog cog lus ua Naxis muab nws tus kheej cais pub rau (יחוח)Yahweh,

3 nws yuav tau caiv cawv txiv hmab thiab cawv ntxwg. Nws tsis txhob haus tej dej qaub uas muab cawv txiv hmab lossis cawv ntxwg los ua, thiab tsis txhob haus kua txiv hmab lossis noj cov txiv hmab, tsis hais cov nyoos los cov qhuav. 

4 Lub sijhawm uas nws muab nws tus kheej cais ntawd, nws tsis txhob noj tsob txiv hmab ib yam abtsi, txawm yog lub noob txiv lossis daim tawv txiv kuj tsis txhob noj.

5 Lub sijhawm uas nws cog lus tseg cais nws tus kheej ntawd, tsis txhob kheev rab chais los nphav nws taubhau. Nws yuav tau dawb huv mus txog thaum tag lub sijhawm uas teem cia cais nws tus kheej rau (יחוח)Yahweh. Nws yuav tau tseg nws plaubhau ntev.

6 Lub sijhawm uas nws cais nws tus kheej rau (יחוח)Yahweh ntawd, nws tsis txhob mus ze tej cev tuag.

7 Txawm yog nws niam, nws txiv, nws kwvtij, nkauj muam tuag, los nws tsis txhob ua rau nws qias tsis huv, rau qhov lub cim uas nws muab nws cais rau (יחוח)Yahweh nyob saum nws taubhau.

8 Tag lub sijhawm uas nws cais nws tus kheej ntawd, yog nws dawb huv rau (יחוח)Yahweh.

9 Yog muaj tibneeg cia li tuag kiag ze nws tamsid, mas ua rau nws lub taubhau uas dawb huv lawm, qias tsis huv, ces puv xya hnub, nws yuav tau chais nws taub hau rau hnub uas ua kevcai ntxuav.

10 Hnub uas yim, nws yuav coj ob tug nquab taug lossis ob tug rhaws nquab nyeg mus rau tus pov thawj ntawm lub qhov rooj tsev ntaub sib ntsib.

11 Tus pov thawj yuav muab ib tug xyeem ua kevcai daws txim, muab ib tug xyeem ua kevcai hlawv xyeem ntxuav kev txhaum, rau qhov nws ua txhaum qhov uas nyob ze tus tuag. Thiab hnub ntawd nws yuav tau tu nws lub taubhau kom dawb huv dua ib zaug.

12 Thiab nws yuav rov muab nws tus kheej cais rau (יחוח)Yahweh kom tag lub sijhawm uas teem cia. Nws yuav coj ib tug menyuam txiv yaj hnub nyoog ib xyoos, tuaj ua kevcai ntxuav kev txaug kev txhaum. Lub sijhawm ua ntej ntawd mas tsis xam lawm, vim qhov uas nws cog lus cais nws tus kheej ntawd twb qias tsis huv lawm.

13 No yog tej kevcai uas thaum tus Naxis cais nws tus kheej puv sijhawm. Yuav tau coj nws mus rau ntawm lub qhov rooj tsev ntaub sib ntsib.

14 Nws yuav coj tej uas xyeem rau (יחוח)Yahweh tuaj, yog ib tug menyuam txiv yaj hnub nyoog ib xyoos uas tsis muaj chaw thuam, ua kevcai hlawv xyeem thiab ib tug menyuam xyuas yaj hnub nyoog ib xyoos uas tsis muaj chaw thuam, ua kevcai xyeem daws txim thiab ib tug txiv yaj uas tsis muaj chaw thuam ua kevcai xyeem sib raug zoo,

15 thiab ib tawb ncuav tsis xyaw keeb uas muab cov hmoov mog zoo zoo ntse roj ua, thiab tej daim ncuav tsis xyaw keeb pleev roj, thiab tej uas xyeem ua ke ua kevcai xyeem qoob loo, thiab ua kevcai hliv xyeem.

16 Mas tus pov thawj yuav coj tej no tuaj rau ntawm (יחוח)Yahweh xub ntiag thiab yuav xyeem tus tsiaj uas ua kevcai daws txim thiab tus tsiaj uas ua kevcai hlawv xyeem.

17 Nws yuav muab tus txiv yaj thiab lub tawb ncuav tsis xyaw keeb, xyeem rau (יחוח)Yahweh ua kevcai sib raug zoo. Thiab tus pov thawj yuav muab tej uas ua kevcai xyeem qoob loo thiab tej uas ua kevcai hliv xyeem, xyeem ua ke.

18 Mas tus uas ua Naxis yuav chais nws lub taubhau uas tu kom dawb huv ntawm qhov rooj tsev ntaub sib ntsib thiab yuav coj cov plaubhau ntawm nws lub taubhau uas dawb huv ntawd mus tso rau saum cub tawg uas nyob hauv qab tej uas xyeem ua kevcai sib raug zoo.

19 Thaum tus uas ua Naxis chais cov plaubhau uas nws tu kom dawb huv lawm, tus pov thawj yuav coj tus txiv yaj ib ceg tes uas hau lawm nrog ib lub ncuav tsis xyaw keeb thiab ib daim ncuav tsis xyaw keeb hauv lub tawb los tso rau tus uas ua Naxis txhais tes.

20 Mas tus pov thawj muab tej ntawd cev rau ntawm (יחוח)Yahweh xubntiag ua kevcai cev xyeem.  Tej ntawd yog tus pov thawj li feem uas dawb huv ua ke nrog lub hauv nrob uas cev xyeem lawm thiab ceg qab uas xyeem lawm. Dhau no, tus uas ua Naxis thiaj haus tau cawv. 

21 No yog tej kev cai rau tus uas cog lus tseg ua Naxis.  Tej uas nws muab xyeem rau (יחוח)Yahweh, yuav tau xyeem raws li tej uas teem rau tus uas cais nws tus kheej, tiamsis yog xyeem tau ntau dua tej uas teem cia kuj tau.  Nws yuav tau xyeem raws li nws twb cog lus tseg. Ua li ntawd nws thiaj ua tau raws li txoj kevcai uas cais nws tus kheej ua Naxis. 

​

Cov Pov Thawj Tej Lus Foom Koob Hmoov

22 (יחוח)Yahweh hais rau Mauxes tias,

23 cia li hais rau Aloos thiab nws cov tub tias, nej yuav tau foom koob hmoov rau cov Ixayees li no. Nej yuav hais tias, 

24 thov (יחוח)Yahweh foom koob hmoov rau nej thiab tsom kav tsom kwm nej. 

25 Thov (יחוח)Yahweh lub ntsej muag ci ntsa iab rau nej thiab hlub nej. 

26 Thov (יחוח)Yahweh tsa qhov muag saib nej thiab pub kev kaj siab lug rau nej. 

27 Ua li no, lawv thiaj tuav kuv lub npe foom koob hmoov rau cov Ixayees mas kuv yuav foom koob hmoov rau lawv.