Tsis Txhob Xaiv Leejtwg Ntsej Muag

1 Kuv cov kwvtij, nej muaj kev ntseeg hauv peb tus Cawmseej (יהושע)Yahshua Messiah uas muaj hwjchim ci ntsa iab, nej tsis txhob xaiv leejtwg ntsej muag.

2 Piv xam hais tias, thaum nej tuaj rau hauv nej lub chaw sablaj, muaj ib tug nplua nuj, hnav tsoos tsho zoo thiab nws coj nplhaib nyiaj nplhaib kub, thiab muaj ib tug txom nyem, hnav tsoos tsho khaub hlab, nkawv tuaj mloog lus qhuab qhia hauv nej lub chaw sablaj, 3 yog nej saib taus tus uas hnav tsoos tsho zoo thiab hais rau nws hais tias, koj los zaum ntawm lub rooj  siab no. Tiamsis nej hais rau tus txom nyem hais tias, koj sawv ntawm ko lossis koj los zaum hauv av ntawm peb kotaw no, 4 ces yog nej ua tsis ncaj thiab xaiv tibneeg ntsejmuag raws li nej lub siab phem xav xwb. 5 Cov kwvtij uas kuv hlub, cia li mloog. Abba (יחוח)Yahweh  xaiv cov tib neeg pluag hauv ntiajteb no los ua cov nplua nuj hauv txojkev ntseeg, thiab saws tau lub tebchaws uas Abba (יחוח)Yahweh  cog lus tseg tias, yuav pub rau cov uas hlub nws los ua qub txeeg qub teg los tsis yog? 6 Tiamsis nej saib tsis taus tus pluag. Tus nplua nuj twb yog tus uas quab yuam nej, thiab cab nej mus rau tom tsev tu plaub los tsis yog? 7 Lawv tsis yog cov uas saib tsis taus lub npe tsim txiaj uas nej hu puas lov?  

8 Yog nej yeej ua raws li Abba (יחוח)Yahweh  lub tebchaws txoj kevcai uas sau cia hais tias, nej yuav tsum hlub kwvtij zej zog ib yam li nej hlub nej tus kheej, kuj yog nej ua zoo (Levis-Kevcai 19:18)

9 Tiamsis yog nej saib tibneeg ntsej muag, nej kuj ua txhaum thiab raug txoj kevcai txiav txim tias nej txhaum. 10 Yog leejtwg tuav rawv txoj kevcai huvsi, tsuas yog txhaum ib nqes xwb, tus ntawd kuj ua txhaum txoj kevcai tag nrho huvsi.

11 Rau qhov tus uas hais tias, tsis txhob deev luag poj luag txiv, kuj hais tias tsis txhob tua tibneeg. Txawm yog koj tsis tau deev luag poj luag txiv, tiamsis tau tua tibneeg, koj kuj ua txhaum txoj kevcai. (Khiavdim 20:13-14) 

12 Nej yuav tsum hais thiab xyaum yam li nej yog cov uas yuav raug txiav txim raws li txoj kevcai uas pub kev thaj yeeb. 13 Vim tias tus uas tsis muaj siab khuvleej, yuav raug txiav txim tsis khuvleej kiag li. Txojkev khuvleej yeej kov yeej txojkev txiav txim.

​

Kev Ntseeg Thiab Kev Xyaum

14 Kuv cov kwvtij, yog leejtwg hais tias, nws muaj kev ntseeg, tiamsis nws tsis xyaum raws li txoj kev ntseeg, yuav muaj qabhau abtsi? Nws txojkev ntseeg ntawd, yuav cawm tau nws dim lov? 15 Yog nej pom cov kwvtij ntseeg, tsis hais pojniam lossis txivneej, lawv tsis muaj noj lossis tsis muaj hnav, 16 nej cov ib tug cia li hais rau lawv hais tias, cia li rov

mus yam kaj siab lug, thov Abba (יחוח)Yahweh  foom koob hmoov rau nej kom muaj noj muaj hnav, thiab pw so, tiamsis nej tsis muab ib yam abtsi rau lawv li, qhov uas nej hais li ntawd yuav muaj qabhau abtsi? 17 Txojkev ntseeg los kuj ib yam li ntawd. Yog nej hais tias nej ntseeg, tiamsis nej tsis ua ib yam haujlwm tshwm, ces nej txojkev ntseeg twb tuag lawm. 18 Yog muaj ib tug hais tias, koj muaj kev ntseeg, tiamsis kuv muaj kev xyaum. Sim qhia rau kuv pom koj txojkev ntseeg uas tsis muaj kev xyaum, mas kuv yuav qhia rau koj pom kuv txojkev ntseeg ntawm qhov uas kuv xyaum. 19 Koj ntseeg tias muaj tib tug Abba (יחוח)Yahweh  xwb, kuj yog zoo. Txawm yog dab los kuj ntseeg thiab ntshai tshee hnyo.

20 Tus tibneeg ruam, koj xav paub tias txojkev ntseeg uas tsis muaj kev xyaum, tsis muaj qabhau lov? 21 Thaum Abraham uas yog peb yawg koob muab nws tus tub Issac xyeem rau saum lub thaj, nws thiaj raug suav tias yog tus ncaj ncees, vim qhov uas nws xyaum los tsis yog? 22 Koj kuj pom tias txojkev ntseeg thiab txojkev xyaum yeej ua ib txig, thiab kev xyaum ua rau txojkev ntseeg tiav.

23 Thiab Abba (יחוח)Yahweh  txojlus kuj tiav raws li hais tias, Abraham ntseeg Abba (יחוח)Yahweh . Abba (יחוח)Yahweh  suav tias qhov uas Abraham ntseeg ntawd, yog txojkev ncaj ncees rau Abraham. (Chivkeeb 15:6)

Thiab Abraham tau lub npe hu ua Abba (יחוח)Yahweh  tus kwvluag. (Isayah 41:8) 

24 Nej yeej pom tias ib tug twg raug suav tias ncaj ncees vim qhov uas nws xyaum, tsis yog qhov uas ntseeg xwb.

25 Thiab ib yam li ntaw, tus poj muag cev Lahaj, kuj raug suav tias ncaj ncees, vim yog qhov uas nws xyaum rau thaum nws tos txais ob tug uas tshuaj tebchaws, thiab xa ob tug tawm dua lwm txojkev mus los tsis yog? 26 Lub cev uas tsis muaj ntsuj plig lawd tuag li cas, txojkev ntseeg uas tsis muaj kev xyaum kuj tuag ib yam li ntawd.

​