1 Kuv yog Yaaqob uas yog Abba  (יחוח)Yahweh  thiab Cawmseej (יהושע)Yahshua Messiah nkawv tus tub qhe. Kuv sau tsab ntawv no xa tuaj rau cov kwvtij ntseeg, kaum ob xeem uas khiav mus nyob rau txhua qhov, thov kom nej ntsib kev noj qab nyob zoo.

Kev Ntseeg Thiab Tswvyim

2 Kuv cov kwvtij, thaum nej ntsib txhua yam kev sim siab, cia li suav tias yog yam uas zoo siab heev xwb. 3 Vim nej yeej paub tias, qhov uas nej txojkev ntseeg raug sim ntawd, twb yog ua kom nej rub tau nej lub siab kom ntev thiab thev taus. 4 Nej yuav tsum ua siab ntev thev kom tiav, xwv nej thiaj ua tau tibneeg zoo kawg nkaus. Thiab muaj txhua yam zoo txhij zog tsis tu ncua ib yam abtsi li. 5 Yog nej leejtwg tsis muaj tswvyim, kom nws cia li thov ntawm Abba  (יחוח)Yahweh, Abba (יחוח)Yahweh  yuav pub tswvyim rau nws, rau qhov Abba (יחוח)Yahweh  yog tus muaj lub siab dawb siab zoo, pub ib puas tsav yam rau sawvdaws, nws tsis khuvxim li. 6 Tiamsis thaum nej thov Abba (יחוח)Yahweh , nej yuav tsum muaj lub siab ntseeg yam uas nej thov, tsis txhob ua xyem xyav. Tus uas ua xyem xyav, tus ntawd zoo ib yam li tej nthwv dej Hiavtxwv uas cua ntsawj ntas mus ntas los. 7 Tus tibneeg uas zoo li ntawd, nws tsis txhob xav hais tias nws yuav tau ib yam abtsi ntawm Abba (יחוח)Yahweh  li. 8 Rau qhov, nws lub siab ywjfab ywjfwj, nws yuav ua yam twg los nws ua tsis tsheej.

​

Kev Muaj Thiab Kev Pluag

9 Cia tus uas ua lub neej txom nyem, zoo siab hlo rau thaum nws lub neej sawv. 10 Thiab cia tus uas nplua nuj, zoo siab hlo rau thaum nws lub neej poob qes, rau qhov nws yuav dua tag yam li tej paj nroj. 11 Lub hnub tuaj tshav ntuj kub heev, ces ua rau tej nroj tsuag tuag tshav. Tej paj nroj zeeg tag thiab qhov uas zoo nkauj, kuj puam tsuaj tag. Tus nplua nuj kuj yuav ploj zuj zus rau hauv nws tej haujlwm ib yam nkaus.

​

Kev Sim Siab Thiab Kev Raug Ntxias

12 Tus uas thev taus kev sim siab, kuj tau nyob kaj siab lug. Vim thaum nws thev dhau lawd, nws yuav tau lub mom kub uas yog txojsia uas Abba (יחוח)Yahweh  cog lus cia rau cov uas hlub Abba (יחוח)Yahweh . 13 Leej twg raug dag ntxias, nws tsis txhob hais tias, kuv raug Abba (יחוח)Yahweh  ntxias. Rau qhov Abba (יחוח)Yahweh  yeej tsis raug txojkev phem ntxias thiab nws kuj tsis ntxias leej twg li. 14 Tiamsis txhua tus raug ntxias rau thaum nws txojkev ntshaw yaum nws, thiab coj nws mus ua txhaum. 15 Thaum xeeb txoj kev ntshaw lawm, kuj yug tau txojkev txhaum los. Thaum txojkev txhaum hlob tiav lawm, kuj yug tau txojkev tuag los. 16 Cov kwvtij uas kuv hlub, nej tsis txhob mloog luag ntxias.

17 Txhua yam zoo uas pub rau peb thiab txhua yam uas zoo kawg nkaus, yog los saum ntuj los, yeej yog los ntawm Tus Tswv uas tsim lub hnub lub hli thiab tej hnub qub huvsi. Nws tsis txawv txav li, tsis thooj li tej duab uas txawj ploj.

18 Nws siv nws txojlus uas muaj tseeb, yug peb tshwm los raws li nws twb npaj siab lawm, kom peb thiaj zoo li thawj phaum txiv hauv txhua yam uas nws tsim ntag.

Mloog Lus Thiab Xyaum

19 Cov kwvtij uas kuv hlub, cia li nkag siab qhov no. Txhua tus yuav tsum maj mloog, tsis txhob maj hais, tsis txhob chim sai. 20 Vim tibneeg txojkev chim tsis rhawv Abba (יחוח)Yahweh  txojkev ncaj ncees tshwm los. 21 Vim li no, cia li rhuav tshem txhua yam kev qias, thiab tej kev phem, uas huam loj zuj zus tuaj, thiab ua siab mos siab muag txais tej lus uas muab cog cia rau hauv nej lawd, uas cawm tau nej tus ntsuj plig kom dim. 22 Nej yuav tsum xyaum raws li tej lus ntawd, tsis txhob yog mloog xwb, thiaj tsis rov ntxias nej tus kheej.

23 Yog leejtwg tsuas yog mloog tej lus ntawd xwb, tsis xyaum raws li ntawd, tus ntawd kuj zoo ib yam li tus uas saib nws lub ntsej muag hauv daim iav.

24 Thaum nws saib tag, nws tawm mus thiab tamsim ntawd, kuj tsis nco qab xyov nws lub plhu zoo li cas. 25 Tiamsis tus uas tshuaj saib txoj kevcai uas zoo kawg nkaus, yog txoj kevcai uas pub kev thaj yeeb, thiab nws nyob ruaj hauv txoj kevcai ntawd, tsis yog mloog xwb es tsis nco qab lawm, tiamsis yog tus uas xyaum raws nraim, tus ntawd yuav tau txojkev kaj siab lug hauv txhua yam uas nws ua. 26 Yog leejtwg xav hais tias, nws coj Abba (יחוח)Yahweh  txoj kevcai nruj, tiamsis nws tsis tswj nws tus nplaig, kuj yog nws rov ntxias nws lub siab xwb, thiab qhov uas nws coj txoj kevcai nruj ntawd, kuj tsis muaj qabhau.

27 Txoj kevcai uas Abba (יחוח)Yahweh  suav tias dawb huv, thiab tsis muaj qhov phem, yog qhov uas saib xyuas tej menyuam ntsuag, thiab tej poj ntsuam uas raug kev txom nyem, thiab ceev faj, tsis txhob cia yus tus kheej kis tej kev phem kev qias hauv ntiajteb.

​