Nrog Lub Ntiajteb Ua Kwvluag

1 Abtsi ua kom muaj kev ua rog thiab muaj kev sib cav sib ceg rau hauv nej? Twb yog los ntawm tej kev ntshaw uas ua rog rau hauv nej lub siab los tsis yog? 

2 Nej xav yuav, tiamsis tsis tau, nej txawm sib tua. Nej ntshaw los tsis tau, nej txawm sib ceg thiab ua rog. Nej tsis muaj vim nej tsis thov.

3 Nej thov los tsis tau, vim nej thov yuam kev, yuav coj mus siv kom tau tej uas nej lub siab ntshaw.

4 Nej cov tibneeg fav xeeb, nej tsis paub tias qhov uas nrog ntiajteb ua kwvluag twb nrog Abba (יחוח)Yahweh  ua yeeb ncuab lov? Vim li no, leejtwg nrog ntiajteb ua kwvluag, nws kuj nrog Abba (יחוח)Yahweh  ua yeeb ncuab.

5 Nej xav tias qhov uas Abba (יחוח)Yahweh  txojlus hais tias, tus ntsuj plig uas Abba (יחוח)Yahweh  pub nyob rau hauv peb khib xeeb heev kawg, tsis muaj qabhau lov? 

6 Tiamsis Abba (יחוח)Yahweh  pub txojkev hlub ntau dua. Vim li no, muaj lus hais tias, Abba (יחוח)Yahweh  tawm tsam cov uas khav theeb, tiamsis pub txojkev hlub rau cov uas txo hwjchim. (Pajlug 3:34)

7 Vim li no, nej cia li nyob hauv Abba (יחוח)Yahweh  qab kev tswj hwm. Cia li tawm tsam Ntxwg Nyoog, Ntxwg Nyoog thiaj li khiav ntawm nej mus.

8 Cia li txav los ze Abba (יחוח)Yahweh , mas nws yuav los ze nej. Nej cov tibneeg muaj txim, cia li ntxuav nej txhais tes kom huv. Nej cov uas muaj ob lub siab, cia li ntxuav nej lub siab kom dawb huv.

9 Cia li txhawj xeeb thiab quaj ntsuag thiab quaj. Cia nej lub suab luag ntxeev ua lub suab quaj ntsuag, thiab cia nej kev xyiv fab ntxeev ua kev poob siab.

10 Nej cia li txo nej lub siab rau ntawm Abba (יחוח)Yahweh , nws thiaj li tsa nej sawv.

​

Ib Leeg Tsis Txhob Hais Ib Leeg Phem

11 Cov kwvtij, nej ib leeg tsis txhob muab ib leeg hais phem. Tus uas muab kwvtij hais phem lossis txiav txim rau kwvtij, kuj yog muab txoj kevcai hais phem thiab thuam txoj kevcai. Yog koj thuam txoj kevcai, koj kuj tsis yog xyaum raws li txoj kevcai, tiamsis yog tus uas thuam xwb.

12 Muaj tib tug rhawv txoj kevcai thiab ua tus txiav txim, nws cawm tau kom dim thiab ua kom puam tsuaj tau. Tiamsis koj yog leejtwg es koj yuav txiav txim rau koj kwvtij zej zog?

​

Tsis Txhob Khav Theeb

13 Nej cov uas hais tias, hnub no lossis tagkis, peb yuav mus rau lub moos ub lub moos no, thiab nyob ntawd ib xyoos ua lag ua luam, kom tau tshaj thawj, mloog tib zoo ov.

14 Tiamsis nej twb tsis paub yuav muaj xwm abtsi rau tagkis. Nej txojsia zoo li cas? Kuj zoo ib yam li tej huab uas nyob ib pliag xwb kuj ploj tag lawm.

15 Tsis txhob hais li ntawd, tsim nyog nej hais tias, yog Abba (יחוח)Yahweh  pom zoo, peb yuav muaj txojsia nyob thiab yuav ua yam ub yam no.

16 Tiamsis nimno, nej muab hlob thiab khav theeb. Txhua yam kev khav theeb li ntawd, yog kev phem.

17 Vim li no, tus uas paub qhov zoo uas nws yuav tsum ua, tiamsis tsis ua, tus ntawd thiaj muaj txim.

​