(יהושע)Yahshua Yog Txojkev Mus Cuag Leej Txiv

1 Nej tsis txhob txhawj tsis txhob nyuaj siab. Nej ntseeg Abba (יחוח)Yahweh, cia li ntseeg kuv thiab. 2 Hauv kuv Leej Txiv lub tsev muaj ntau chav. Yog tsis muaj li ntawd kuv yeej hais rau nej lawm. Kuv mus tu chaw tseg rau nej. 3 Thaum kuv mus tu chaw tseg rau nej tiav lawd, kuv yeej yuav rov los dua thiab coj nej mus nrog kuv nyob, xwv kuv nyob qhovtwg nej thiaj tau nyob qhov ntawd. 4 Thiab nej paub txojkev uas mus txog lub chaw uas kuv yuav mus ntawd lawm.

5 Thaumas hais rau (יהושע)Yahshua hais tias, Tus Tswv, peb tsis paub hais tias koj yuav mus qhovtwg. Peb yuav paub txojkev ntawd tau li cas? 

6 (יהושע)Yahshua hais rau nws hais tias, kuv yog txojkev ntawd, yog qhov tseeb thiab yog txojsia. Tsis muaj leejtwg mus cuag tau Leej Txiv, tsuas yog mus ntawm kuv mus xwb. 7 Yog nej twb paub kuv lawm, nej yeej yuav paub kuv Leej Txiv thiab. Txij no mus nej yuav paub nws thiab pom nws. 8 Philip hais rau nws hais tias, Tus Tswv, thov qhia Leej Txiv tshwm rau peb pom mas peb thiaj zoo siab.

9 (יהושע)Yahshua hais rau nws hais tias, Philip, kuv nrog nej nyob ntev txog tav no lawm, nej tseem tsis paub kuv thiab lov? Tus uas pom kuv kuj yog pom Leej Txiv. Koj tseem yuav hais tias, thov qhia Leej Txiv tshwm rau peb pom no thiab lov? 10 Koj tsis ntseeg hais tias kuv nyob hauv Leej Txiv thiab Leej Txiv nyob hauv kuv lov? Tej lus uas kuv hais rau nej ntawd kuv tsis tau hais raws li kuv lub siab xwb. Tiamsis Leej Txiv uas nyob hauv kuv ua nws tes haujlwm. 11 Nej cia li ntseeg kuv hais tias kuv nyob hauv Leej Txiv thiab Leej Txiv nyob hauv kuv. Yog tsis ua li ntawd, cia li ntseeg vim tej haujlwm no. 12 Kuv hais tseeb rau nej hais tias, tus uas ntseeg kuv yuav ua tej haujlwm uas kuv ua no thiab. Thiab nws tseem yuav ua tej haujlwm loj dua tej no vim kuv yuav mus cuag Leej Txiv.

13 Yam twg uas nej tuav kuv lub npe thov, kuv yuav ua yam ntawd kom Leej Txiv thiaj tau koob meej ci ntsa iab ntawm Leej Tub. 14 Yog nej tuav kuv lub npe thov ib yam abtsi, kuv yuav ua yam ntawd.

​

Cog Lus Yuav Pub Tus Ntsuj Plig

15 Yog nej hlub kuv, nej yeej yuav ua raws li kuv tej lus hais tseg. 16 Kuv yuav thov Leej Txiv mas nws yuav tso dua ib tug los taw qhia nej, thiab nws yuav nrog nej nyob mus li.

17 Tus ntawd yog Tus Ntsuj Plig Dawbhuv uas qhia qhov tseeb, uas lub ntiajteb txais tsis tau vim yog saib tsis pom thiab tsis paub nws. Nej cov paub nws, vim nws nrog nej nyob thiab yuav nyob hauv nej. 18 Kuv yuav tsis muab nej tso pov tseg ua ntsoj ua ntsuag. Kuv yuav los cuag nej. 19 Tshuav tsis ntev lub ntiajteb yuav tsis pom kuv tiamsis nej yuav pom kuv. Vim kuv muaj txojsia nyob, nej kuj yuav muaj txojsia nyob thiab. 20 Hnub ntawd nej yuav paub hais tias kuv nyob hauv Leej Txiv thiab nej nyob hauv kuv thiab kuv nyob hauv nej. 21 Tus uas khaws kuv tej lus cia thiab ua raws li kuv tej lus qhia, tus ntawd thiaj yog tus uas hlub kuv. Tus uas hlub kuv, kuv Leej Txiv yuav hlub nws, thiab kuv yuav hlub nws thiab qhia kuv rau nws pom. 22 Yahdah uas tsis yog Iscariot hais rau (יהושע)Yahshua hais tias, Tus Tswv, ua li cas koj yuav qhia koj tshwm rau peb pom xwb tsis qhia rau lub ntiajteb pom? 23 (יהושע)Yahshua teb nws hais tias, yog leejtwg hlub kuv, tus ntawd yuav khaws kuv tej lus cia, thiab kuv Leej Txiv yuav hlub nws thiab wb ob leeg yuav los cuag nws thiab nrog nraim nws nyob. 24 Tus uas tsis hlub kuv kuj tsis khaws kuv tej lus cia. Thiab tej lus uas nej hnov no, tsis yog kuv li lus tiamsis yog Leej Txiv uas txib kuv los li lus.  25 Kuv hais tej lus no rau nej rau thaum kuv tseem nrog nej nyob. 26 Tiamsis tus uas taw qhia, yog Tus Ntsuj Plig tus dawb huv uas Leej Txiv yuav txib los hauv kuv lub npe, nws yuav qhia txhua yam rau nej thiab ua rau nej nco txog txhua yam uas kuv twb hais rau nej lawd. 27 Kuv muab txojkev nyob kaj siab lug cob rau nej. Kuv pub kuv txojkev nyob kaj siab lug rau nej, kuv pub tsis thooj li lub ntiajteb pub. Nej lub siab tsis txhob txhawj thiab tsis txhob ntshai. 28 Nej twb hnov kuv hais rau nej hais tias, kuv yuav ncaim mus thiab kuv yuav rov los cuag nej. Yog nej hlub kuv, nej kuj yuav xyiv fab(zoo siab) rau qhov uas kuv mus cuag Leej Txiv, vim Leej Txiv loj dua kuv. 29 Nimno kuv twb hais tej no rau nej ua ntej uas tsis tau tshwm los, xwv thaum muaj tej no tshwm los nej thiaj li ntseeg.

30 Kuv yuav tsis nrog nej tham li no dua li lawm rau qhov tus uas kav ntiajteb tabtom los. Tus ntawd tsis muaj hwjchim loj dua kuv.

31 Tiamsis kuv ua raws li Leej Txiv kom kuv ua, xwv lub ntiajteb thiaj paub hais tias kuv hlub Leej Txiv. Cia li sawv tsees, peb mus lauj.