Ntxuav Cov Thwjtim Kotaw

1 Ua ntej uas yuav txog hnub ua kevcai Hla Dhau, (יהושע)Yahshua paub hais tias twb txog lub sijhawm uas nws yuav ncaim hauv lub ntiajteb mus cuag Leej Txiv. (יהושע)Yahshua hlub nws cov tibneeg uas nyob hauv lub ntiajteb no thiab nws tseem hlub mus txog thaum kawg.  2 Dab Ntxwg Nyoog twb tshoov Simon tus tub Yahdah Iscariot lub siab kom fav xeeb rau (יהושע)Yahshua ua ntej lawm. Mas thaum lawv tabtom noj hmo, 3(יהושע)Yahshua paub hais tias Leej Txiv muab txhua yam cob rau hauv nws txhais tes thiab paub hais tias nws los ntawm Abba (יחוח)Yahweh los thiab yuav rov mus cuag Abba (יחוח)Yahweh.

4 (יהושע)Yahshua txawm sawv tsees ntawm rooj mov thiab hle nws lub tsho cia. Nws txawm muab ib txoj phuam los siav ntawm duav. 5 Nws muab dej hliv rau hauv lub phiab thiab nqa los ntxuav cov thwjtim kotaw thiab muab txoj phuam uas nws sia ntawm duav so lawv kotaw.

6 Thaum (יהושע)Yahshua los txog ntawm Simon Kepha, Kepha hais rau (יהושע)Yahshua hais tias, Tus Tswv, koj yuav ntxuav kuv kotaw thiab lov? 

7 (יהושע)Yahshua teb nws hais tias, tej uas kuv ua, nimno koj tsis nkag siab, tiamsis yav tom ntej koj yuav nkag siab.

8 Kepha hais rau nws hais tias, koj ntxuav kuv kotaw tsis tau kiag li. (יהושע)Yahshua teb nws hais tias, yog kuv tsis ntxuav koj kotaw, koj yuav tsis muaj feem ua tau kuv tus thwjtim. 9 Simon Kepha hais rau nws hais tias, Tus Tswv, tsis txhob yog ntxuav kuv kotaw xwb, cia li ntxuav kuv tes thiab taubhau huvsi.

10 (יהושע)Yahshua hais rau nws hais tias, tus uas da dej lawm tsis tas yuav ntxuav lub cev dua, tsuas yog ntxuav kotaw xwb rau qhov ib ce twb huv lawm. Nej cov twb huv lawm tiamsis tsis yog txhua tus 11 (יהושע)Yahshua yeej paub hais tias leejtwg yuav fav xeeb rau nws, vim li no nws thiaj hais tias, tsis yog nej txhua tus huv lawm.

12 Thaum (יהושע)Yahshua ntxuav lawv kotaw tag lawm, nws rov qab hnav nws lub tsho thiab zaum hais rau lawv hais tias, nej nkag siab tej uas kuv ua rau nej los tsis nkag? 13 Nej hu kuv hais tias Xibhwb thiab Tus Tswv, nej kuj hu raug lawm rau qhov kuv yeej yog li ntawd. 14 Yog kuv uas yog nej Tus Tswv thiab nej tus xibhwb twb ntxuav nej kotaw lawm, kuj tsim nyog nej ib leeg ntxuav ib leeg kotaw thiab. 15 Rau qhov kuv twb ua qauv tseg rau nej lawm kom nej thiaj ua ib yam nkaus li kuv ua rau nej thiab. 16 Kuv hais tseeb rau nej hais tias, tus tub qhe yeej tsis loj dua tus lospav, thiab tus tubtxib kuj tsis loj dua tus uas txib nws mus. 17 Yog nej paub li no thiab ua raws nraim mas nej yuav nyob kaj siab lug.

18 Tsis yog kuv hais txog nej txhua tus. Kuv paub cov uas kuv xaiv cia lawm. Tej no tshwm los thiaj yuav tiav raws li Abba (יחוח)Yahweh txojlus uas hais tias, tus uas nrog kuv noj mov ua ke yuav tsa luj taws tuam kuv. 19 Nimno kuv hais tej no ua ntej rau nej thaum tsis tau tshwm los, xwv thaum tej no tshwm los lawd nej thiaj ntseeg hais tias kuv yog tus ntawd ntag. 20 Kuv hais tseeb rau nej hais tias tus uas lees yuav tus uas kuv txib mus, kuj yog nws lees yuav kuv thiab, thiab tus uas lees yuav kuv, kuj yog lees yuav tus uas txib kuv los.

​

Hais Txog Qhov Uas Yuav Fav Xeeb Rau (יהושע)Yahshua

(Mth. 26:20-25; Ych. Mk. 14:17-21;  Lk. . 22:21-23)

21 Thaum (יהושע)Yahshua hais li ntawd lawm, nws kuj nyuaj siab kawg thiab ua timkhawv hais tias, kuv hais tseeb rau nej hais tias, nej cov ib tug yuav fav xeeb rau kuv.

22 Cov thwjtim ib leeg saib rau ib leeg tsis paub hais tias tus uas (יהושע)Yahshua hais ntawd yog leejtwg.

23 Tus thwjtim uas (יהושע)Yahshua nyiam nws pheeb ze ntawm (יהושע)Yahshua.

24 Simon Kepha thiaj ncaws hau kom nws nug (יהושע)Yahshua saib tus uas nws hais ntawd yog leejtwg.  

25 Thaum tseem pheeb ze rau ntawm (יהושע)Yahshua,tus thwjtim ntawd txawm nug nws hais tias, Tus Tswv,  tus ntawd yog leejtwg? 

26 (יהושע)Yahshua teb hais tias, yog tus uas kuv yuav muab qhov ncuav no ntsw cev rau nws. Thaum (יהושע)Yahshua muab qhov ncuav ntsw lawd nws txawm muab cev rau Simon Iscariot tus tub Yahdah. 27 Thaum Yahdah txais qhov ncuav ntawd lawd, Xatas kuj nkag rau hauv Yahdah. (יהושע)Yahshua txawm hais rau Yahdah hais tias, koj yuav ua abtsi ces cia li ua tsuag tsuag. 28 Cov thwjtim uas zaum ntawm rooj mov tsis muaj leejtwg tau taub hais tias ua cas (יהושע)Yahshua hais li ntawd rau Yahdah.

29 Qee leej xav hais tias ntshe Yahdah yog tus uas ceev lub hnab nyiaj, (יהושע)Yahshua thiaj hais kom nws mus yuav cov khoom ua kevcai los rau lawv siv, los yog hais kom nws muab abtsi mus pub rau cov tibneeg pluag.

30 Vim li no thaum Yahdah txais qhov ncuav ntawd lawm, nws txawm tawm plaws tamsid. Thaum ntawd tsaus ntuj lawm.

​

Txoj Kevcai Tshiab

31 Thaum Yahdah tawm mus lawd, (יהושע)Yahshua txawm hais tias, nimno Neeg Leej Tub tau koob meej lawm. Thiab nws ua rau Abba (יחוח)Yahweh tau koob meej. 32 Yog Neeg Leej Tub ua rau Abba (יחוח)Yahweh tau koob meej lawm, Abba (יחוח)Yahweh kuj yuav ua rau Neeg Leej Tub tau koob meej ib yam nkaus thiab, thiab yuav pub koob meej sai tamsim no. 33 Cov menyuam es, kuv yuav nrog nej nyob ib nyuag pliag xwb. Nej yuav nrhiav kuv. Thiab kuv hais li cas rau cov Yahdaim lawm, nimno kuv kuj hais li ntawd rau nej hais tias, qhov chaw uas kuv yuav mus ntawd nej mus tsis tau. 34 Kuv pub txoj kevcai tshiab rau nej. Nej ib leeg yuav tsum hlub ib leeg. Kuv hlub nej li cas lawm nej yuav tsum sib hlub ib yam li ntawd. 35 Qhov uas nej sib hlub no yuav ua rau sawvdaws paub hais tias nej yog kuv cov thwjtim.

​

Kepha Yuav Tsis Lees  (יהושע)Yahshua

(Mth. 26:31-35; Ych. Mk. 14:27-31;  Lk. 22:31-34)

36 Simon Kepha hais rau (יהושע)Yahshua hais tias, Tus Tswv, koj yuav mus qhovtwg? (יהושע)Yahshua teb hais tias, qhov chaw uas kuv yuav mus ntawd nimno koj mus tsis tau, tiamsis lwm hnub, koj mam lawv kuv qab los. 37 Kepha hais rau nws hais tias, Tus Tswv, ua li cas nimno kuv ho nrog koj mus tsis tau? Kuv yeej txaus siab tuag theej koj.

38 (יהושע)Yahshua teb hais tias, koj yeej txaus siab tuag theej kuv lov? Kuv hais tseeb rau koj hais tias ua ntej qaib qua, koj yuav tsis lees kuv peb zaug.

​