Ntes (יהושע)Yahshua

(Mth. 26:47-56; Ych. Mk. 14:43-50;  Lk. 22:47-53)

1 Thaum (יהושע)Yahshua hais tej no tag lawm nws txawm nrog nws cov thwjtim tawm mus hla lub hav Khiloos txog ib lub vaj, nws thiab nws cov thwjtim nkag rau hauv.

2 Yahdah uas fav xeeb rau (יהושע)Yahshua kuj paub lub vaj ntawd thiab, rau qhov (יהושע)Yahshua thiab nws cov thwjtim ib txwm tuaj ua ke rau qhov ntawd. 3 Yahdah thiaj coj ib pab tub rog thiab tej tub teg tub taws ntawm cov pov thawj hlob thiab cov Falixais tuaj. Lawv taws tsau, taws teeb, thiab coj ntaj, coj riam tuaj. 4 (יהושע)Yahshua yeej paub txhua yam uas yuav tshwm sim rau nws. Nws thiaj tawm mus hais rau lawv hais tias, nej tuaj nrhiav leejtwg? 5 Lawv teb hais tias, tuaj nrhiav (יהושע)Yahshua uas yog tibneeg Naxales. (יהושע)Yahshua hais rau lawv hais tias, kuv yog tus ntawd ntag. Yahdah uas fav xeeb rau (יהושע)Yahshua kuj nrog lawv sawv ua ke ntawd. 6 Thaum (יהושע)Yahshua hais rau lawv hais tias, kuv yog tus ntawd, lawv txawm thaub pes ncho thiab ntog rau hauv av. 7 (יהושע)Yahshua rov nug lawv hais tias, nej tuaj nrhiav leejtwg? Lawv hais tias, tuaj nrhiav (יהושע)Yahshua uas yog tibneeg Naxales. 8 (יהושע)Yahshua teb lawv hais tias, kuv twb hais rau nej hais tias yog kuv. Yog nej nrhiav kuv, kuj cia tso cov tibneeg no mus. 9 Nws ua li no thiaj tiav raws li tej lus uas nws twb hais tias, cov tibneeg uas koj muab pub rau kuv tsis muaj ib tug puam tsuaj li.

10 Simon Kepha muaj ib rab ntaj, nws txawm rho kiag ntaj los tib ntag tus tuam pov thawj hlob tus tub qhe, txiav nws sab nplooj ntseg xis tu nrho. Tus tub qhe ntawd npe hu ua Makhus. 11 (יהושע)Yahshua hais rau Kepha hais tias, cia li muab rab ntaj ntxig rau hauv hnab. Kuv yuav tsis haus lub khob uas Leej Txiv muab pub rau kuv lov?

​

Coj (יהושע)Yahshua Mus Cuag Anas

12 Cov tub rog thiab lawv tus thawj rog thiab Yahdaim cov tub teg tub taws txawm ntes (יהושע)Yahshua khi cia. 13 Lawv coj nws mus cuag Anas ua ntej. Anas yog Khayafas uas ua tuam pov thawj hlob rau xyoo ntawd tus yawm txiv. 14 Tus Khayafas no yog tus uas qhia cov Yahdaim hais tias cia ib tug tuag this ib tsoom tibneeg zoo dua.

​

Kepha Tsis Lees (יהושע)Yahshua

(Mth. 26:69-70; Ych. Mk. 14:65-68;  Lk. 22:55-57)

15 Simon Kepha thiab dua ib tug thwjtim raws (יהושע)Yahshua qab mus. Vim yog tus tuam pov thawj hlob paub tus thwjtim ntawd, nws thiaj nrog (יהושע)Yahshua nkag rau hauv lub tshav puam ntawm tus tuam pov thawj hlob tsev, 

16 tiamsis Kepha sawv sab nraum rooj loog. Tus thwjtim uas tus pov thawj hlob paub ntawd txawm tawm mus hais rau tus nkauj qhe uas zov rooj loog thiab coj Kepha nkag rau hauv. 17 Tus nkauj qhe uas zov rooj loog hais rau Kepha hais tias, koj yog tus yawg ntawd ib tug thwjtim thiab los tsis yog? Nws teb hais tias, kuv tsis yog. 18 Cov tub qhe thiab cov tub teg tub taws twb muab thee los rauv vim yog no heev, mas lawv sawv nte taws ua ke ntawd. Kepha kuj nrog lawv sawv nte taws thiab.

​

Tus Ttuam Pov Thawj Hlob Nug (יהושע)Yahshua

(Mth. 26:59-66; Ych. Mk. 14:55-64; Luk. 22:66-71)

19 Tus tuam pov thawj hlob txawm nug (יהושע)Yahshua txog (יהושע)Yahshua cov thwjtim thiab nws tej lus qhia.

20 (יהושע)Yahshua teb nws hais tias, kuv hais tab meeg rau lub ntiajteb lawm. Kuv pheej qhuab qhia hauv tej tsev sablaj thiab hauv lub tuam tsev uas yog lub chaw uas cov Yahdaim sawvdaws tuaj txoos ua ke. Kuv tsis tau qhia ib yam abtsi zais qas ntshis. 21 Ua li cas koj tseem nug kuv? Cia li nug cov tibneeg uas mloog kuv qhia saib kuv hais abtsi rau lawv. Lawv yeej paub hais tias kuv hais abtsi.  22 Thaum (יהושע)Yahshua hais li ntawd, ib tug tub teg tub taws uas sawv ntawd txawm xuas tib tawg ncuav rau (יהושע)Yahshua lub plhu thiab hais tias, koj teb tus tuam pov thawj hlob li kod lov? 

23 (יהושע)Yahshua teb nws hais tias, yog kuv hais txhaum, cia li ua timkhawv rau yam uas kuv hais txhaum, tiamsis yog kuv hais raug, koj ntaus kuv ua abtsi? 24 Ces Anas txawm xa (יהושע)Yahshua uas tseem khi qas nrees mus cuag tus tuam pov thawj hlob Khayafas.

​

Kepha Rov Tsis Lees (יהושע)Yahshua

(Mth. 26:71-75; Ych. Mk. 14:69-72;  Lk. 22:58-62)

25 Thaum ntawd Kepha tseem sawv nte taws, mas lawv txawm hais rau Kepha hais tias, koj yog tus yawg ntawd ib tug thwjtim thiab los tsis yog? Kepha tsis lees thiab hais tias, kuv tsis yog. 26 Tus tuam pov thawj hlob ib tug qhev uas txheeb ze tus uas Kepha txiav sab nplooj ntseg tu txawm hais tias, kuv pom koj nrog tus yawg ntawd nyob hauv lub vaj thiab los sas. 27 Kepha kuj tsis lees dua thiab, mas tamsim ntawm qaib txawm qua.

​

(יהושע)Yahshua Nyob Ntawm Philaj Xubntiag

(Mth. h 27:1-2,11-14; Ych. Mk. 15:15;  Lk. 23:1-5)

28 Ces lawv txawm coj (יהושע)Yahshua tawm hauv Khayafas lub tsev mus rau hauv lub tsev Plitholias. Lub sijhawm ntawd kaj ntug txoog. Lawv cov ntawd tsis nkag rau hauv Tus Tswv xeev lub tsev kom thiaj tsis qias puas tsuas lawv, mas lawv thiaj noj tau kevcai Hla Dhau. 29 Philaj txawm tawm tuaj cuag lawv thiab hais tias, nej muaj plaub abtsi tuaj kom kuv tus no? 30 Lawv teb nws hais tias, yog tus no tsis ua tibneeg phem ces peb yeej yuav tsis muab nws cob rau koj.

31 Philaj hais rau lawv hais tias, nej cia li coj tus no mus teem txim raws li nej txoj kevcai. Cov Yahdaim thiaj hais rau nws hais tias, peb tsis muaj cai yuav muab ib tug twg txiav txim tuag. 32 Yuav muaj li no thiaj tiav raws li tej lus uas (יהושע)Yahshua hais cia hais tias nws yuav tuag li cas. 33 Philaj thiaj rov nkag mus rau hauv lub tsev Plitholias thiab hu (יהושע)Yahshua los nug hais tias, koj yog cov Yahdaim tus vajntxwv lov?

34 (יהושע)Yahshua teb hais tias, koj nug li no yog koj xav koj xwb los yog lwm tus qhia rau koj paub txog ntawm kuv? 

35 Philaj teb hais tias, kuv yog tibneeg Yahdaim thiab lov? Koj haiv neeg thiab cov pov thawj hlob muab koj cob rau kuv. Koj tau ua abtsi?

36 (יהושע)Yahshua teb hais tias, kuv lub tebchaws tsis yog nyob hauv lub ntiajteb no. Yog kuv lub tebchaws nyob hauv lub ntiajteb no, kuv cov tibneeg yuav tawm tsam tsis kheev kuv raug muab cob rau cov Yahdaim. Tiamsis nimno kuv lub tebchaws tsis yog nyob ntawm no. 37 Philaj txawm hais rau nws hais tias, yog li ntawd koj yog ib tug vajntxwv lov? (יהושע)Yahshua teb hais tias, koj hais tias kuv yog vajntxwv. Yog vim li no kuv thiaj yug los thiab los rau hauv lub ntiajteb thiaj ua tau timkhawv rau txojkev tseeb. Txhua tus uas nyob hauv txojkev tseeb yeej mloog kuv tej lus. 38 Philaj hais rau nws hais tias, kev tseeb yog abtsi?

 

(יהושע)Yahshua Raug Teem Txim Tuag

(Mth. 27:15-31; Ych. Mk. 15:6-20;  Lk. 23:13-25)

Thaum Philaj hais li ntawd tag, nws kuj rov tawm mus cuag cov Yahdaim thiab hais rau lawv hais tias, kuv tsis pom tus no muaj kev txhaum. 39 Tiamsis nej muaj kevcai kom kuv tso ib tug tibneeg dim rau thaum nej ua kevcai Hla Dhau. Nej xav kom kuv tso cov Yahdaim tus vajntxwv rau nej lov? 40 Lawv qw nrov nrov hais tias, tsis txhob tso tus no, cia li tso Npalanpas. Tus Npalanpas no yog tus fav xeeb rau lub tebchaws.

 

​