Kho Tus Dig Muag Ib Txwm Nruab Thiab

1 Thaum (יהושע)Yahshua taug kev mus nws pom ib tug yawg dig muag ib txwm nruab thiab los. 2 (יהושע)Yahshua cov thwj-tim nug (יהושע)Yahshua hais tias, Lanpi, leejtwg ua txhaum, yog nws ua los yog nws niam nws txiv ua, nws thiaj dig muag thaum nyob nruab thiab los lawm?

3 (יהושע)Yahshua teb hais tias, tsis yog nws lossis nws niam nws txiv ua txhaum, tiamsis nws dig muag xwv Abba (יחוח)Yahweh tej haujlwm thiaj tshwm rau ntawm nws lub cev. 4 Peb yuav tsum ua tus uas txib kuv los tes haujlwm rau thaum tseem nruab hnub. Qhov tsaus ntuj uas tsis muaj leejtwg ua tau haujlwm tabtom los.

 5 Thaum kuv tseem nyob hauv ntiajteb, kuv yog qhov kaj rau lub ntiajteb.

6 Thaum hais li ntawd tag, (יהושע)Yahshua txawm nti qaub ncaug rau hauv av, muab do xyaw ua av nplaum pleev tus dig muag ob lub qhov muag, 7 thiab hais rau nws hais tias, cia li mus ntxuav muag tom lub pas dej Xilau-as, (Xilau-as txhais tias txib mus). Tus dig muag txawm mus ntxuav qhov muag tag rov los mas pom kev lawm. 8 Tej tibneeg zej zog uas ib txwm pom tus yawg ntawd thov khawv, txawm hais tias, tus no yog tus uas ib txwm zaum thov khawv los tsis yog?

9 Muaj qee leej hais tias, yog nws kawg. Muaj dua lwm tus hais tias, tsis yog, nws muaj ntsis zoo li tus ntawd xwb. Tiamsis nws hais tias, kuv yog tus ntawd ntag. 10 Lawv txawm hais rau nws hais tias, ua cas koj lub qhov muag ho pom kev lawm? 11 Nws teb hais tias, ib tug yawg uas hu ua (יהושע)Yahshua ua av nplaum pleev kuv ob lub qhov muag thiab hais rau kuv hais tias, cia li mus ntxuav muag tom lub paj des Xilau-as. Kuv txawm mus ntxuav muag tag ces pom kev lawm. 12 Lawv hais rau nws hais tias, tus ntawd nyob qhovtwg? Nws hais tias, kuv tsis paub.

​

Cov Falixais Nug Qhov Uas Kho Tus Uas Dig Muag

13 Lawv txawm coj tus uas ib txwm dig muag ntawd mus cuag cov Falixais.

14 Hnub uas (יהושע)Yahshua ua av nplaum thiab kho tus yawg ntawd pom kev, yog hnub Sabbath.

15 Cov Falixais rov nug nws hais tias ua li cas nws lub qhov muag ho pom kev lawm. Nws hais rau lawv hais tias, tus yawg ntawd muab av nplaum pleev kuv ob lub qhov muag ces kuv mus ntxuavmuag tag txawm pom kev lawm. 16 Cov Falixais qee leej hais tias, tus yawg ntawd tsis yog tuaj ntawm Abba (יחוח)Yahweh tuaj, vim yog nws tsis caiv hnub Sabbath. Tiamsis muaj qee leej hais tias, tus tibneeg txhaum yuav ua li cas ua tau tej txujci tseemceeb no? Ces lawv txawm tsis sib haum lawm. 17 Lawv txawm rov hais rau tus dig muag ntawd hais tias, koj hais li cas txog tus yawg ntawd, vim nws yog tus uas kho koj qhov muag pom kev? Nws hais tias, nws yog ib tug xibhwb cev Abba (יחוח)Yahweh lus.

18 Cov Yahdaim tsis ntseeg hais tias nws ib txwm dig muag thaum nyob nruab thiab los, es nimno nws pom kev lawm mus txog rau thaum lawv hu nws niam thiab nws txiv tuaj. 19 Lawv nug nkawv hais tias, tus no puas yog neb tus tub uas neb hais tias nws ibtxwm dig muag thaum nyob nruab thiab los? Ua li cas nimno nws ho pom kev lawm? 20 Nkawv teb hais tias, wb paub hais tias nws yog wb tus tub thiab paub hais tias nws ibtxwm digmuag thaum nruab thiab los tiag.

21 Tiamsis wb tsis paub xyov ua cas nimno nws ho pom kev lawm, thiab wb tsis paub hais tias xyov leej-twg yog tus kho nws ob lub qhovmuag. Nws twb loj txaus lawm. Nej kuj nug nws, nws yeej txawj piav qhia nej. 22 Nkawv hais li no vim nkawv ntshai cov Yahdaim. Rau qhov cov Yahdaim twb hais haum lawm hais tias, yog leejtwg lees hais tias (יהושע)Yahshua yog tus Messiah, tus ntawd yuav raug muab txiav tawm hauv lub tsev sablaj. 23 Vim li no nws niam nws txiv thiaj hais tias, nws twb loj txaus lawm, nej kuj nug nws. 24 Lawv thiaj hu tus uas ib txwm dig muag los dua ib zaug thiab hais rau nws hais tias, cia li ua rau Abba (יחוח)Yahweh tau koob meej. Peb paub hais tias, tus yawg ntawd yog tibneeg muaj txim.

25 Nws teb hais tias, tus yawg ntawd muaj txim los tsis muaj, kuv tsis paub. Kuv tsuas paub tib yam xwb, yog qhov uas kuv ib txwm dig muag tiamsis nimno kuv pom kev lawm.

26 Lawv txawm hais rau nws hais tias, tus yawg ntawd ua li cas rau koj? Nws ua li cas koj lub qhov muag thiaj pom kev lawm.

27 Nws teb lawv hais tias, kuv twb hais tag rau nej lawm los nej tsis mloog. Ua li cas nej tseem xav hnov dua thiab? Nej xav ua tus ntawd li thwjtim thiab lov? 

28 Lawv txawm cem nws hais tias, koj yog nws li thwjtim, peb yog Mauxes li thwjtim. 29 Peb paub hais tias Abba (יחוח)Yahweh hais lus rau Mauxes, tiamsis tus yawg ntawd peb tsis paub hais tias nws tuaj qhovtwg tuaj. 30 Nws teb lawv hais tias, ua cas tsis nkag siab li lauj! Nej tsis paub hais tias nws tuaj qhovtwg tuaj los nws twb kho kuv lub qhov muag pom kev lawm. 31 Peb paub hais tias Abba (יחוח)Yahweh yeej tsis mloog cov tibneeg txhaum tej lus, nws tsuas mloog cov tibneeg uas hwm nws thiab ua raws li nws tej lus xwb. 32 Txij thaum chiv keeb los, tsis tau muaj leejtwg hnov hais tias muaj ib tug tibneeg twg kho tau tus tibneeg uas digmuag thaum nruab thiab los kom pom kev li. 33 Yog tus ntawd tsis yog los ntawm Abba (יחוח)Yahweh los, nws kuj ua tsis tau tej no li. 34 Lawv teb nws hais tias, koj yeej muaj txim txhaum thaum nruab thiab los lawm. Nimno koj tseem yuav ntuas peb thiab lov? Ces lawv txawm muab nws ntiab tawm mus lawm.

​

Dig Muag Sab Ntsuj Plig

35 (יהושע)Yahshua hnov hais tias cov Yahdaim muab tus ntawd ntiab tawm lawm. Thaum (יהושע)Yahshua nrhiav tau nws, (יהושע)Yahshua hais tias, koj ntseeg Neeg Leej Tub lov? 36 Nws teb hais tias, Xibhwb, leejtwg yog Neeg Leej Tub uas kuv yuav ntseeg tau?

37 (יהושע)Yahshua hais rau nws hais tias, koj twb pom nws lawm, yog tus uas tabtom nrog koj hais lus no. 38 Nws txawm hais tias, Xibhwb, kuv ntseeg mas. Ces nws txawm pe hawm (יהושע)Yahshua. 39 (יהושע)Yahshua hais tias, kuv los rau hauv lub ntiajteb yog los txiav txim kom cov uas tsis pom kev thiaj li pom kev, thiab cov uas pom kev yuav dig muag.

40 Cov Falixais uas nyob ntawd muaj qee leej hnov (יהושע)Yahshua hais li ntawd, lawv txawm hais rau nws hais tias, peb dig muag thiab lov? 

41 (יהושע)Yahshua hais rau lawv hais tias, yog nej dig muag nej yuav tsis muaj txim. Tiamsis vim nimno nej hais tias, peb pom kev, nej tseem muaj txim.