Cov Thawj Ntaus Tswvyim Txov (יהושע)Yahshua

(Mattithyah26:1-5; Luke 22:1-2; Yahchanan 11:45-53)

Tshuav ob hnub li ua kevcai Hla Dhau thiab ua kevcai Noj Ncuav tsis Xyaw Keeb, mas cov pov thawj hlob thiab cov xibhwb qhia Abba (יחוח)Yahweh kevcai txawm nrhiav kev saib yuav ua li cas ntes tau (יהושע)Yahshua twjywm thiab muab nws tua pov tseg. 2 Lawv hais tias, Tsis txhob ntes nws rau lub sijhawm uas ua kevcai no tsam ces cov pejxeem ho ntxhov hnyo.

​

Tus Pojniam Hliv Roj Rau (יהושע)Yahshua Taubhau

 (Mattithyah 26:6-13; Yahchanan 12:1-8)

3 Thaum (יהושע)Yahshua nyob hauv Simon uas mob ruas lub tsev hauv lub zos Npethanis, (יהושע)Yahshua tseem pheeb ntawm rooj mov, txawm muaj ib tug pojniam nqa ib hwj roj tsw qab tuaj ces txawm muab lub ncauj hwj lov ntho muab cov roj hliv rau saum (יהושע)Yahshua taubhau. 4 Muaj qee leej chim txawm sib hais tias, Ua cas yuav muab tej roj no ua nkim pov tseg? 5 Cov roj no yog muab muag tau nyiaj peb puas tawm denalia coj mus pub rau cov tibneeg pluag kuj tau. Lawv txawm yws tus pojniam ntawd.

6(יהושע)Yahshua thiaj hais tias, Tsis txhob yws nws. Nej ua rau nws ntxhov siab ua abtsi? Nws ua yam uas zoo heev rau kuv.

7 Yeej yuav muaj cov tibneeg pluag nrog nej nyob mus li, mas nej yuav ua zoo rau lawv thaum twg kuj tau tiamsis nej yuav tsis muaj kuv nrog nej nyob mus li. 8 Nws ua raws li nws ua tau. Twb yog nws hliv roj pleev kuv lub cev ua ntej uas yuav muab kuv faus. 9 Kuv hais tseeb rau nej tias, tshaj tawm txoj hmoo zoo no mus thoob ntiajteb txog qhovtwg, qhov uas tus pojniam no ua yuav nrov ncha mus txog qhov ntawd ua lub chaw nco txog nws.

​

Yahdah Fav Xeeb Rau (יהושע)Yahshua

(Mattithyah 26:14-16; Luke 22:3-6)

10 Thaum ntawd Yahdah Iscariot uas yog ib tug hauv kaum ob tug thwjtim txawm mus cuag cov pov thawj hlob es yuav muab (יהושע)Yahshua cob rau lawv. 11 Thaum lawv hnov li ntawd mas lawv zoo siab heev thiab cog lus tias yuav muab nyiaj rau Yahdah. Nws txawm nrhiav sijhawm muab (יהושע)Yahshua rau lawv.

​

(יהושע)Yahshua Npaj Noj Kevcai Hla Dhau

(Mattithyah26:17-25; Luke 22:7-14,21-23; Yahchanan 13:21-30)

12 Thawj hnub uas ua kevcai Noj Ncuav tsis Xyaw Keeb, yog lub sijhawm uas lawv tua menyuam yaj ua kevcai Hla Dhau, cov thwjtim hais rau (יהושע)Yahshua tias, Yuav cia peb npaj kevcai Hla Dhau rau koj noj qhovtwg?

13(יהושע)Yahshua txib ob tug thwjtim mus thiab hais rau nkawv tias, neb cia li mus rau hauv lub nroog, mas yuav muaj ib tug yawg nqa ib lub laujkaub dej ntsib neb. Neb cia li raws nws qab mus. 14 Nws nkag rau lub tsev twg, neb cia li hais rau Tus Tswv tsev ntawd tias, Tus xibhwb hais tias, Chav txais qhua uas kuv yuav nrog kuv cov thwjtim noj kevcai Hla Dhau nyob qhovtwg? 15 Nws yuav qhia ib chav loj uas nyob txheej saud muaj rooj tog txhij lawm. Cia li npaj qhov ntawd rau peb. 16 Ob tug thwjtim txawm sawv kev mus rau hauv lub nroog thiab ntsib raws li (יהושע)Yahshua hais rau nkawv, ces nkawv thiaj npaj ua kevcai Hla Dhau txhij zog.

17 Thaum tsaus ntuj (יהושע)Yahshua nrog kaum ob tug thwjtim tuaj.

18 Thaum lawv pheeb noj mov ntawm rooj, (יהושע)Yahshua hais tias, Kuv hais tseeb rau nej tias, nej cov no ib tug yuav fav xeeb rau kuv, yog ib tug uas nrog kuv noj ua ke. 19 Lawv kuj pib ntxhov siab heev lawv nyias taus nyias nug tias, Yog kuv lov?

20(יהושע)Yahshua hais rau lawv tias, Yog kaum ob tug no ib tug, yog tus uas nrog kuv koom ntsw ib lub tais. 21 Neeg Leej Tub yuav mus raws li tej uas sau cia hais txog nws, tiamsis tus uas fav xeeb rau Neeg Leej Tub yeej yuav raug txom nyem kawg. Tsis txhob yug nws los kuj zoo dua.

​

(יהושע)Yahshua Rooj Mov

(Mattithyah26:26-30; Luke 22:14-20; 1 Crt. 11:23-25)

22 Thaum lawv noj mov ntawd, (יהושע)Yahshua txawm muab ib lub ncuav los foom koob hmoov rau mas muab ntais cev rau lawv thiab hais tias, Cia li txais, no yog kuv lub cev.

23 Thiab nws muab ib lub khob los ua Abba (יחוח)Yahweh tsaug tag muab cev rau lawv mas lawv txhua tus haus. 24 Thiab nws hais rau lawv tias, no yog kuv cov ntshav uas nias hom thawj rau tej lus cog tseg, uas raug muab nchuav rau tibneeg coob coob. 25 Kuv hais tseeb rau nej tias kuv yuav tsis haus cawv txiv hmab dua li mus txog hnub uas kuv haus cawv txiv hmab tshiab hauv Abba (יחוח)Yahweh lub tebchaws. 26 Thaum lawv hu ib zaj nkauj tag lawv tawm mus rau pem roob Txiv Aulib.

​

Kepha  Yuav Tsis Lees Paub  (יהושע)Yahshua

(Mattithyah26:31-35; Luke 22:31-34; Yahchanan 13:36-38)

27(יהושע)Yahshua hais rau lawv tias, nej txhua tus yuav tso kuv tseg, vim muaj lus sau cia hais tias,  kuv yuav tua tus yug yaj, mas pab yaj yuav tawg ua sab ua sua mus. 28 Tiamsis thaum kuv raug muab tsa ciaj sawv rov los lawm, kuv yuav ua nej ntej mus rau Kalilais. 29 Kepha  txawm hais rau (יהושע)-Yahshua tias, Txawm yog lawv sawvdaws tso koj tseg los kuv yuav tsis tos koj tseg kiag li. 30(יהושע)Yahshua hais rau nws tias, Kuv hais tseeb rau koj tias, hmo no ntag thaum qaib tsis tau qua ob tsig koj yuav tsis lees paub kuv peb zaug. 31 Tiamsis Kepha  hais tawv nkawv tias, Txawm yog kuv yuav tsum nrog koj tuag, los kuv yuav tsis hais tias kuv tsis paub koj. Cov thwjtim sawvdaws puavleej hais ib yam nkaus li ntawd.

​

(יהושע)Yahshua Thov Abba (יחוח)Yahweh Hauv Kexemanes

(Mattithyah 26:36-46; Luke 22:39-46)

32 Ces (יהושע)Yahshua lawv txawm mus rau ib qho chaw uas hu ua Kexemanes, mas (יהושע)Yahshua hais rau nws cov thwjtim tias, Cia li zaum ntawm no rau thaum kuv thov Abba (יחוח)Yahweh. 33 Nws coj Kepha, Yaaqob thiab Yahchanan  nrog nws mus. (יהושע)Yahshua pib nyuaj siab thiab ntxhov siab kawg. 34 Nws hais rau lawv tias, kuv lub siab ntxhov kawg twb yuav tuag. Nej cia li nyob ntawm no zov tos. 35(יהושע)Yahshua txawm mus rau tom ntej mentsis mas nws khwb nkaus rau hauv pem teb thov tias, yog ua tau, cia teev no hla dhau nws mus. 36 Thiab nws hais tias Anpas, kuv txiv es, koj ua tau txhua yam, thov rho lub khob no ntawm kuv mus. Txawm li cas kuj xij, thov tsis txhob cia ua raws li kuv lub siab tiamsis cia ua raws li koj lub siab. 37 Nws rov los rau ntawm cov thwjtim pom lawv pw tsaug zog tag. Nws thiaj hais rau Kepha  tias, Simon, koj tseem pw tsaug zog lov? Koj nrog kuv zov tos ib nyuag teev tsis taus li lov? 38 Nej yuav tsum zov tos thiab thov Abba (יחוח)Yahweh xwv nej thiaj tsis raug kev sim siab. Lub siab npaj txhij lawm tiamsis lub cev tsis muaj zog.

39(יהושע)Yahshua txawm rov mus thov Abba(יחוח)Yahweh hais ib yam nkaus li thawj zaug. 40(יהושע)Yahshua rov los pom lawv pw tsaug zog dua ib zaug vim lawv qheb tsis taus qhov muag, mas lawv tsis paub tias yuav teb (יהושע)Yahshua li cas. 41 Nws txawm rov los rau ntawm cov thwjtim zaum peb thiab hais rau lawv tias, nej tseem pw tsaug zog thiab so los siav lov? Txaus lawm lauj! Lub sijhawm twb los txog lawm, mas Neeg Leej Tub twb raug muab cob rau hauv cov tibneeg txhaum txhais tes lawm. 42 Cia li sawv tsees, peb mus. Saib maj, tus uas fav xeeb rau kuv tuaj ze lawm.

​

Ntes (יהושע)Yahshua

(Mattithyah26:47-56; Luke 22:47-53; Yahchanan 18:3-12)

43 Thaum (יהושע)Yahshua tseem tabtom hais lus, ces Yahdah uas yog ib tug thwjtim hauv kaum ob tug ntawd txawm tuaj txog tamsim ntawd, thiab muaj tibneeg coob coob coj ntaj coj qws nrog nws tuaj, yog cov pov thawj hlob thiab cov xibhwb qhia Abba (יחוח)Yahweh kevcai thiab cov kev txwj laug txib tuaj.

44 Tus uas fav xeeb ntawd twb qhia rau lawv ua ntej tias, Kuv nwj tus twg mas yog tus ntawd ntag. Cia li ntes kiag nws coj mus ceev tib zoo. 45 Ces Yahdah txawm ncaj nraim los rau ntawm (יהושע)Yahshua tamsid thiab hais tias, Xibhwb, thiab nwj (יהושע)Yahshua. 46 Ces cov tibneeg ntawd txawm los ntsiab nkaus (יהושע)Yahshua muab nws ntes. 47 Muaj ib tug uas sawv ntawd rho kiag ntaj los tib ntag tus tuam pov thawj hlob tus tub qhe txiav nws ib sab nplooj ntseg tu nrho.

48(יהושע)Yahshua hais rau cov tibneeg ntawd tias, nej coj ntaj coj qws tuaj ntes kuv ib yam li tawm mus ntes tub sab lov? 49 Kuv niaj hnub nrog nej nyob hauv lub tuam tsev qhuab qhia, los nej ho tsis ntes kuv. Tiamsis Abba (יחוח)Yahweh txojlus yeej yuav tsum tiav li no. 50 Ces cov thwjtim sawvdaws txawm tso (יהושע)Yahshua tseg khiav tag lawm.

51 Muaj ib tug hluas tsuas npua ib daim ntaub mag xwb raws (יהושע)Yahshua qab mus, lawv txawm ntes tus hluas ntawd, 52 ces nws tso plhuav daim ntaub mag tseg khiav liab qab mus.

​

(יהושע)Yahshua Nyob Ntawm Cov Thawj Lub Rooj Sablaj

(Mattithyah26:57-68; Luke 22:54-55,63-71;Yahchanan 18:13-14,19-24)

53 Lawv txawm coj (יהושע)Yahshua mus rau ntawm tus tuam pov thawj hlob, mas cov pov thawj hlob thiab cov kev txwj laug thiab cov xibhwb qhia Abba(יחוח)Yahweh kevcai saw-vdaws twb tuaj txoos ua ke rau qhov ntawd lawm. 54 Kepha  raws (יהושע)Yahshua qab deb deb mus rau hauv lub tshav puam ntawm tus tuam pov thawj hlob lub tsev. Nws nrog cov tub rog uas zov lub tuam tsev nyob ua ke nte taws. 55 Cov pov thawj hlob thiab tag nrho cov thawj lub rooj sablaj txawm nrhiav lus kom (יהושע)Yahshua xwv thiaj tua tau nws pov tseg, tiamsis nrhiav tsis tau. 56 Muaj ntau leej los ua cuav timkhawv nkaug nws los lawv tej lus timkhawv tsis sib tim.

57 Qee leej sawv tsees ua cuav timkhawv kom (יהושע)Yahshua hais tias, 58 Peb hnov tus no hais tias, Kuv yuav rhuav lub tuam tsev no uas tibneeg txhais tes ua, mas peb hnub xwb kuv yuav ua dua ib lub tshiab, uas tsis yog tibneeg txhais tes ua.  59 Txawm yog lawv hais li ntawd los lawv tej lus timkhawv tsis sib tim.

60 Tus tuam pov thawj hlob txawm sawv tsees hauv lawv nruab nrab thiab nug (יהושע)Yahshua tias, Koj tsis muaj ib lo lus teb lov? Lawv kom koj txog abtsi?

61(יהושע)Yahshua nyob twjywm tsis teb kiag li. Tus tuam pov thawj hlob txawm nug dua ib zaug hais tias, koj yog tus Messiah, yog Abba (יחוח)Yahweh uas tsim nyog qhuas tus tub lov? 62(יהושע)Yahshua hais tias, kuv yog, thiab nej yuav pom Tibneeg Leej Tub zaum ntawm tus uas muaj hwjchim loj kawg sab xis, thiab nrog huab saum ntuj los. 63 Ces tus tuam pov thawj hlob txawm dua rhe nws lub tsho thiab hais tias, Peb tseem yuav timkhawv ntxiv li cas thiab? 64 Nej twb hnov nws hais lus tuam mom Abba (יחוח)Yahweh lawm. Nej pom zoo li cas? Lawv sawvdaws teem txim tias tsim nyog muab nws tua tuag.

65 Qee leej pib nto qaub ncaug rau (יהושע)-Yahshua thiab muab nws lub ntsej muag qhwv thiab ntaus nws thiab hais rau nws tias, cia li cev Abba (יחוח)Yahweh lus rau peb saib. Cov tub rog txawm kav nws thiab xuas tawg ncuav rau nws.

​

Kepha Tsis Lees (יהושע)Yahshua

(Mattithyah26:69-75; Luke 22:56-62; Yahchanan 18:15-18,25-27)

66 Thaum Kepha  nyob hauv lub tshav puam sab nrad, tus tuam pov thawj hlob ib tug nkauj qhev txawm los. 67 Thaum nws pom Kepha  nte taws, nws txawm saib ntsoov rau Kepha  thiab hais tias, koj twb nrog (יהושע)Yah-shua uas yog tibneeg Nalxales ua ke thiab los sas. 68 Tiamsis Kepha  tsis lees, nws hais tias, Qhov uas koj hais kod kuv tsis paub thiab tsis nkag siab li. Ces Kepha  txawm tawm mus rau ntawm rooj vag. 69 Tus nkauj qhev rov pom nws ces txawm pib hais rau cov tibneeg uas nyob ib ncig ntawd tias, Tus no yeej yog lawv cov thiab. 70 Kepha  rov tsis lees. Tom qab ntawd mentsis cov tibneeg uas nyob ib ncig txawm hais rau Kepha  tias, Koj yeej yog lawv cov ntawd ib tug tiag tiag li, rau qhov koj yog tibneeg Kalilais. 71 Kepha  txawm pib twv tsawm tawv tawv hais tias, Kuv yeej tsis paub tus uas nej hais kod. 72 Tamsim ntawd qaib txawm qua zaum ob. Kepha  thiaj nco dheev txog tej lus uas (יהושע)Yahshua tau hais rau nws tias, Thaum qaib tsis tau qua ob tsig koj yuav tsis lees paub kuv peb zaug. Kepha  tswj tsis tau nws lub siab ces txawm quaj quaj.