Cov Levis Tej Moos

1 Thaum ntawd cov uas ua thawj hauv xeem Levis txhua cum tuaj cuag pov thawj Ele‑axas thiab Noos tus tub Yahshua thiab cov uas ua thawj hauv txhua xeem txhua cum Ixayees,

2 mas hais rau lawv ntawm Silaus hauv Khana‑as tebchaws tias, (יחוח)Yahweh twb hais rau Mauxes kom muab tej lub moos rau peb nyob thiab muab tej tshav zaub ib ncig rau peb yug tsiaj txhu.

3 Ua li no cov Ixayees thiaj li rho lawv qub txeeg qub teg tej lub moos uas yuav hais no thiab tej tshav zaub ib ncig cov moos ntawd pub rau cov Levis raws li (יחוח)Yahweh hais kom lawv ua.

4 Rho tau ntawv los yog Khauhas tej cum. Ua li no cov Levis uas yog pov thawj Aloos caj ces thiaj tau kaum peb lub moos uas rho hauv xeem Yahdah thiab xeem Xime‑oos thiab xeem Npeeyamees los.

5 Cov Khauhas uas tseem tshuav rho ntawv tau kaum lub moos hauv xeem Efa‑is tej cum thiab xeem Daj thiab ib nrab xeem Manaxes.

6 Cov Nkawsoos rho ntawv tau kaum peb lub moos hauv xeem Ixakhas tej cum thiab hauv xeem Asaws thiab xeem Nathalis thiab ib nrab xeem Manaxes hauv Npasas tebchaws.

7 Melalis tej cum tau kaum ob lub moos hauv xeem Lunpees thiab xeem Nkas thiab xeem Xenpuloos.

8 Tej moos thiab tej tshav zaub ib ncig no cov Ixayees ua ntawv rho pub rau cov Levis raws li uas (יחוח)Yahweh kom Mauxes hais rau lawv lawd.

9 Lawv muab tej moos uas yuav hais no hauv xeem Yahdah thiab xeem Xime‑oos, 

10 pub rau Aloos caj ces uas yog ib cum hauv cov Khauhas uas yog xeem Levis, rau qhov lawv twb rho tau thawj daim ntawv lawm.

11 Lawv muab lub moos Khiliyas Anpas (Anpas yog Anaj txiv), uas yog lub moos Henploos uas nyob pem toj siab hauv Yahdah tebchaws, thiab tej tshav zaub ib ncig lub moos ntawd.

12 Tiamsis tej teb thiab tej zej zog uas nyob ib ncig lub moos mas twb muab rau Yefunes tus tub Khalej yuav ua nws tug lawm.

13 Lawv muab lub moos Henploos thiab tej tshav zaub ib ncig rau pov thawj Aloos caj ces. Henploos yog ib lub moos cawm siav rau tus uas tua tibneeg.  Thiab lawv muab tej moos no thiab tej tshav zaub ib ncig cov moos no, yog lub moos Linas,

14 thiab Yathis, Ethemau‑as,

15 Hauloos, Denpis,

16 Ayis, Yuthas thiab Npesemes, huvsi yog cuaj lub moos hauv ob xeem no.

17 Hauv xeem Npeeyamees yog muab tej moos no thiab tej tshav zaub ib ncig, yog Kinpe‑oos, Kenpas,

18 Anathaus thiab Amoos, huvsi yog plaub lub moos.

19 Aloos caj ces uas ua pov thawj tej moos huvsi muaj kaum peb lub moos thiab tej tshav zaub ib ncig.

20 Cov Khauhas uas tseem tshuav uas yog Khauhas tej cum hauv xeem Levis, lawv rho ntawv tau tej moos hauv xeem Efa‑is.  

21 Tej moos uas lawv muab yog lub moos Sekhees thiab tej tshav zaub ib ncig, uas yog ib lub moos cawm siav rau tus uas tua tibneeg, uas nyob pem toj siab Efa‑is tebchaws, thiab tej moos no thiab tej tshav zaub ib ncig, yog Kexaws,

22 Kixa‑is thiab Npes Hauloos, huvsi yog plaub lub moos.  

23 Hauv xeem Daj yog muab tej moos no thiab tej tshav zaub ib ncig, yog Eethekhes, Kinpethoos,

24 Aiyaloos thiab Kalimoos, huvsi yog plaub lub moos.  

25 Hauv ib nrab xeem Manaxes yog muab lub moos Tha‑anas thiab tej tshav zaub ib ncig, thiab Kalimoos thiab tej tshav zaub ib ncig, huvsi yog ob lub moos.

26 Khauhas tej cum uas tseem tshuav ntawd tej moos mas huvsi yog kaum lub moos thiab tej tshav zaub ib ncig.

27 Tej lub moos uas muab rau Nkawsoos caj ces uas yog ib cum hauv xeem Levis, mas hauv ib nrab xeem Manaxes yog muab lub moos Kaulas hauv Npasas thiab tej tshav zaub ib ncig, uas yog ib lub moos cawm siav rau tus uas tua tibneeg, thiab lub moos Npe‑ethelas thiab tej tshav zaub ib ncig, huvsi yog ob lub moos.

28 Hauv xeem Ixakhas yog muab tej moos no thiab tej tshav zaub ib ncig, yog Khisi‑oos, Danpelas,

29 Yamus thiab Eekanis, huvsi yog plaub lub moos.

30 Hauv xeem Asaws yog muab tej moos no thiab tej tshav zaub ib ncig, yog Misas, Adoos,

31 Heekhas thiab Lehaus, huvsi yog plaub lub moos.

32 Hauv xeem Nathalis yog muab lub moos Khedes hauv Kalilais, uas yog ib lub moos cawm siav rau tus uas tua tibneeg, thiab lub moos Hamaudaus thiab tej tshav zaub ib ncig, thiab Khathas thiab tej tshav zaub ib ncig, huvsi yog peb lub moos.

33 Nkawsoos tej cum tej moos mas huvsi muaj kaum peb lub moos thiab tej tshav zaub ib ncig.

34 Tej moos uas muab rau cov Levis uas tseem tshuav, yog Melalis tej cum, mas hauv xeem Xenpuloos yog muab tej moos no thiab tej tshav zaub ib ncig, yog Yaune‑as, Khathas,

35 Dinas thiab Nahalas, huvsi yog plaub lub moos.

36 Hauv xeem Lunpees yog muab tej moos no thiab tej tshav zaub ib ncig, yog Npexaws, Yahaj,

37 Khedemaus thiab Mefa‑as, huvsi yog plaub lub moos.

38 Hauv xeem Nkas yog muab lub moos Lamaus hauv Kile‑as thiab tej tshav zaub ib ncig, uas yog ib lub moos cawm siav rau tus uas tua tibneeg, thiab muab tej moos no thiab tej tshav zaub ib ncig, yog Mahana‑is,

39 Hesanpoos thiab Yaxaws, huvsi yog plaub lub moos.

40 Tej moos uas muab rau cov Levis uas tseem tshuav, yog Melalis tej cum, mas huvsi yog kaum ob lub moos.  

41 Levis tej moos uas nyob hauv cov Ixayees lub tebchaws uas yog lawv teej lawv tug huvsi yog plaub caug yim lub moos thiab tej tshav zaub ib ncig.

42 Tej moos no puavleej muaj tshav zaub vij puag ncig txhua lub moos ib yam nkaus.

​

Ixayees Txeeb Tau Tebchaws

43 Raws li uas hais los no, (יחוח)Yahweh muab lub tebchaws uas (יחוח)Yahweh tau cog lus tseg tias yuav pub rau lawv tej poj koob yawm txwv huvsi pub rau cov Ixayees. Thaum lawv txeeb tau ua lawv tug lawd lawv cia li mus nyob kiag ruaj rau hauv.

44 (יחוח)Yahweh pub lawv nyob ruaj nyob tus tau so rau txhua fab, yam li uas (יחוח)Yahweh tau cog lus tseg rau lawv tej poj koob yawm txwv.  Tsis muaj ib tug yeeb ncuab tiv tau lawv li, rau qhov (יחוח)Yahweh twb muab lawv tej yeeb ncuab rau hauv lawv txhais tes huvsi lawm.

45 Txhua yam zoo uas (יחוח)Yahweh tau cog lus tseg rau cov Ixayees, tsis tshuav ib yam abtsi uas tsis tau tiav, puavleej tiav tag huvsi lawm.