Yahshua Tej Lus Thaum Kawg

1 Mas Yahshua sau zog txhua xeem Ixayees huvsi tuaj rau ntawm Sekhees, thiab hu Ixayees cov kev txwj laug thiab cov thawj thiab cov uas tu plaub thiab cov nom tswv tuaj, mas lawv kuj tuaj rau ntawm (יחוח)Yahweh xub ntiag.

2 Mas Yahshua hais rau ib tsoom pejxeem sawvdaws tias, (יחוח)Yahweh uas yog cov Ixayees Tus Tswv hais li no tias, yav thaum ub nej tej poj koob yawm txwv nyob ntawm ntug dej Yufetis sab hnub tuaj, yog Thelas uas yog Anplaham thiab Nahaus txiv, lawv yeej ua koom tu luag tej dab.

3 Mas kuv coj nej txiv Anplaham tawm sab ntug dej Yufetis hnub tuaj los thiab coj nws los thoob plaws Khana‑as tebchaws thiab ua rau nws muaj tub ki coob coob. Kuv pub Ixaj rau nws.

4 Kuv pub Yakhauj thiab Exaus rau Ixaj. Kuv pub tej toj siab Xe‑is tebchaws rau Exaus ua nws tug, tiamsis Yakhauj thiab nws cov menyuam tau mus rau nram Iziv tebchaws.

5 Kuv txib Mauxes thiab Aloos los thiab kuv ua rau cov Iziv raug kev txom nyem, vim tej uas kuv ua rau hauv lawv nruab nrab. Thiab yav tom qab kuv coj nej tawm los.

6 Kuv coj nej tej poj koob yawm txwv tawm hauv Iziv tebchaws los mas nej los txog dej Hiavtxwv Liab. Cov Iziv tej tsheb ua rog thiab tej tub rog caij nees caum nej tej poj koob yawm txwv los txog dej Hiavtxwv Liab.

7 Thaum lawv quaj thov (יחוח)Yahweh, mas nws kuj ua kom tsaus ntuj quas nej thiab cov Iziv, thiab nws ua rau dej hiavtxwv nyab kiag cov Iziv. Nej lub qhov muag yeej pom ntsoov tej uas kuv ua rau Iziv tebchaws. Thiab nej nyob hauv tebchaws moj sab qhua ntev.

8 Mas kuv coj nej los rau hauv cov Amaulais lub tebchaws uas nyob sab ntug dej Yaladees hnub tuaj. Lawv ua rog rau nej mas kuv muab lawv cob rau hauv nej txhais tes thiab nej txeeb tau lawv lub tebchaws, thiab kuv muab lawv ua puam tsuaj tag rau ntawm nej hauv ntej.

9 Thaum ntawd Xipaulas tus tub Npalaj uas ua vajntxwv kav Mau‑as sawv tsees tawm tsam cov Ixayees.  Npalaj txib tibneeg mus hu Npe‑aus tus tub Npala‑as tuaj tsawm foom nej.

10 Tiamsis kuv tsis quav ntsej Npala‑as, vim li ntawd, nws thiaj foom koob hmoov rau nej xwb.  Yog li no, kuv thiaj li cawm nej dim hauv nws txhais tes.  

11 Nej hla tus dej Yaladees los rau ntawm lub moos Yelikhaus, mas cov tibneeg Yelikhaus tawm tsam nej. Cov Amaulais, cov Pelixais, cov Khana‑as, cov Hivais, cov Kawkasis, cov Hivais thiab cov Yenpus kuj tawm tsam nej, tiamsis kuv muab lawv cob rau hauv nej txhais tes.

12 Kuv tso daiv tso nkawj ua nej ntej mus ntiab cov Amaulais ob tug vajntxwv khiav ntawm nej hauv ntej mus, tsis yog nej tej ntaj tej hneev ua tau.

13 Kuv muab lub tebchaws uas nej tsis tau khwv rau hauv pub rau nej thiab pub tej moos uas nej tsis tau tsim rau nej mas nej tau mus nyob rau hauv.  Nej tau noj tej vaj txiv hmab thiab tej vaj txiv aulib uas nej tsis tau cog.

14 Yog li no, nimno nej cia li paub ntshai thiab hwm (יחוח)Yahweh thiab ua koom tu nws tuaj nruab siab tiag tiag mus li. Cia li muab tej dab uas nej tej poj koob yawm txwv tau teev sab dej tim ub thiab hauv Iziv tebchaws tso pov tseg thiab ua koom tu (יחוח)Yahweh.  

15 Yog nej tsis kam ua koom tu (יחוח)Yahweh, hnub no nej cia li xaiv saib nej yuav ua koom tu tus twg, yuav ua koom tu tej dab uas nej tej poj koob yawm txwv tau teev sab dej Yufetis tim ub, lossis ua koom tu cov Amaulais tej dab hauv lub tebchaws uas nej nyob no. Tiamsis kuv thiab kuv tsev neeg, peb yuav ua koom tu (יחוח)Yahweh.  

16 Cov pejxeem teb tias, qhov uas peb yuav tso (יחוח)Yahweh tseg es mus ua koom tu luag tej dab, thov kom nyob deb ntawm peb,

17 rau qhov (יחוח)Yahweh uas yog peb Tus Tswv yog tus uas coj peb thiab peb tej poj koob yawm txwv tawm hauv Iziv tebchaws hauv txojkev ua qhev los, thiab yog tus uas ua tej txujci tseem ceeb rau peb pom thiab tsom kwm peb rau txhua txojkev uas peb taug thiab tsom kwm peb rau hauv txhua lub tebchaws uas peb hla mus.

18 Thiab (יחוח)Yahweh ntiab tej tibneeg sawvdaws khiav ntawm peb hauv ntej huvsi mus, yog cov Amaulais uas nyob hauv lub tebchaws ntawd. Vim li no, peb yuav ua koom tu (יחוח)Yahweh rau qhov nws yog peb Tus Tswv.

19 Tiamsis Yahshua hais rau cov pej xeem tias, nej ua koom tu (יחוח)Yahweh tsis tau li, rau qhov nws yog Tus Tswv uas dawb huv. Nws yog Tus Tswv uas khib xeeb, nws yuav tsis zam nej tej kev ntxeev siab thiab nej

lub txim.

20 Yog nej tso (יחוח)Yahweh tseg mus ua koom tu luag tej dab, nws yuav tig kiag los ua kev txom nyem ceeblaj raug nej thiab rhuav tshem nej, txawm yog nws tau ua zoo rau nej lawm los kuj xij.

21 Cov pejxeem hais rau Yahshua tias, tsis yog li ntawd, peb yeej yuav ua koom tu (יחוח)Yahweh.

22 Mas Yahshua hais rau cov pejxeem tias, nej ua timkhawv rov rau nej hais tias, nej xaiv yuav (יחוח)Yahweh thiab ua koom tu nws lov.  Lawv hais tias, peb ua tau timkhawv.

23 Yahshua hais tias, yog li ntawd cia li muab luag tej dab mlom uas nyob hauv nej pov tseg thiab muab lub siab xib rau (יחוח)Yahweh uas yog Ixayees Tus Tswv.  

24 Mas cov pejxeem hais rau Yahshua tias, peb yuav ua koom tu (יחוח)Yahweh uas yog peb Tus Tswv thiab peb yuav mloog nws lus.  

25 Yog li no Yahshua thiaj kom cov pejxeem cog lus tseg rau hnub ntawd thiab nws muab tej kab ke thiab tej kevcai cob rau lawv ntawm lub moos Sekhees.

26 Thiab Yahshua sau tej lus no rau hauv (יחוח)Yahweh phau ntawv kevcai.  Nws muab ib lub pob zeb loj teeb rau hauv tus qab ntoo qheb ntawm lub chaw pe hawm (יחוח)Yahweh.

27 Thiab Yahshua hais rau cov pejxeem sawvdaws tias, saib nawj, lub pob zeb no yuav ua timkhawv rau peb, rau qhov lub pob zeb no tau hnov tej lus huvsi uas (יחוח)Yahweh hais rau peb.  Yog tias nej ntxeev siab rau (יחוח)Yahweh uas yog nej Tus Tswv, lub pob zeb no thiaj ua timkhawv nkaug nej.  

28 Ces Yahshua txawm tso cov pejxeem nyias rov mus rau nyias thaj tebchaws uas yog lawv qub txeeg qub teg.

​

Yahshua Thiab Ele‑axas Tuag

29 Dhau ntawd Noos tus tub Yahshua uas yog (יחוח)Yahweh tus tub qhe txawm tuag, nws hnub nyoog muaj ib puas kaum xyoo.

30 Lawv muab nws faus rau hauv nws thaj teb uas yog nws qub txeeg qub teg ntawm lub moos Thinaxelas uas nyob pem toj siab Efa‑is tebchaws ntawm lub roob Ka‑as sab ped.

31 Cov Ixayees ua koom tu (יחוח)Yahweh tag Yahshua sim neej thiab tag cov kev txwj laug uas nyob ntev dua Yahshua sim neej thiab paub txog txhua yam uas (יחוח)Yahweh tau ua rau cov Ixayees.  

32 Yahxej cov pob txha uas cov Ixayees coj hauv Iziv tebchaws los ntawd, lawv muab faus rau hauv lub moos Sekhees, yog hauv thaj teb uas Yakhauj yuav ntawm Hamaus cov tub ib puas lub npib nyiaj. Hamaus yog Sekhees txiv. Thaj teb ntawd poob ua Yahxej caj ces li qub txeeg qub teg.  

33 Aloos tus tub Ele‑axas kuj tuag, mas lawv muab nws faus ntawm lub moos Kinpe‑as uas yog nws tus tub Finehas lub moos uas tau muab ua Finehas teej tug yog nyob pem toj siab Efa‑is tebchaws