Yahshua Ntuas Cov Ixayees

1 Los rau yav tom qab ntev loo thaum (יחוח)Yahweh pub cov Ixayees tau so tsis ua rog rau tej yeeb ncuab uas nyob ib ncig lawv, thiab Yahshua hnub nyoog nchav thiab laus heev lawm,

2 Yahshua hu cov Ixayees sawvdaws, yog cov kev txwj laug thiab cov thawj, cov uas tu plaub thiab cov nom tswv sawvdaws tuaj thiab hais rau lawv tias, kuv hnub nyoog nchav thiab laus heev lawm.

3 Nej twb pom txhua yam uas (יחוח)Yahweh uas yog nej Tus Tswv tau ua rau tej haiv neeg no huvsi vim yog saib rau nej, rau qhov (יחוח)Yahweh uas yog nej Tus Tswv tau ua rog pab nej.

4 Saib maj, tej tebchaws uas tseem tshuav, kuv twb muab faib ua qub txeeg qub teg rau nej tej xeem ua ke rau tej tebchaws uas kuv twb kov yeej lawd, txij ntua tus dej Yaladees mus txog Hiavtxwv Loj sab hnub poob.

5 ()Yahweh uas yog nej Tus Tswv yuav muab lawv thawb kom khiav ntawm nej hauv ntej mus thiab yuav ntiab lawv khiav dhau plaws ntawm nej lub qhov muag mus. Mas nej yuav txeeb tau lawv lub tebchaws ua nej tug raws li (יחוח)Yahweh uas yog nej Tus Tswv cog lus rau nej.

6 Vim li no, nej cia li ua khov kho tuav rawv thiab ua raws nraim li txhua yam uas sau cia rau hauv Mauxes phau kevcai, tsis txhob tig rau sab xis lossis sab laug kiag li,

7 xwv nej thiaj tsis nrog tej haiv neeg uas tshuav nyob hauv nej nruab nrab koom ua ke, lossis hais txog lawv tej dab lub npe thiab tuav lawv tej dab lub npe twv lossis ua koom tu thiab pe lawv tej dab ntawd.

8 Tiamsis nej yuav tau nrog (יחוח)Yahweh uas yog nej Tus Tswv tsheej xeeb yam li nej ua los txog niaj hnub nimno.

9 Rau qhov (יחוח)Yahweh ntiab tej haiv neeg uas loj thiab muaj zog dua nej khiav ntawm nej hauv ntej mus. Thiab tsis muaj leejtwg tiv tau nej los txog niaj hnub nimno.

10 Nej ib leeg ntiab tau ib txhiab leej khiav, vim (יחוח)Yahweh uas yog nej Tus Tswv pab nej ua rog, raws li nws cog lus cia lawd.

11 Yog li no nej yuav tau ceev faj tib zoo hlub (יחוח)Yahweh uas yog nej Tus Tswv.

12 Yog nej tig rov qab es mus koom tej haiv neeg uas tseem tshuav nyob rau hauv nej no, mus nrog lawv ua tshoob ua kos, thiab mus yuav lawv tej tub tej ntxhais,

13 ces nej cia li paub tseeb tias, (יחוח)Yahweh uas yog nej Tus Tswv yuav tsis ntiab tej haiv neeg ntawd khiav ntawm nej hauv ntej mus lawm. Lawv yuav ua rooj ntxiab rooj hlua cuab nej thiab yuav ua rab nplawm nplawm nej nrob qaum thiab ua pos chob nej qhov muag mus txog thaum nej puam tsuaj tag hauv lub tebchaws zoo no uas (יחוח)Yahweh uas yog nej Tus Tswv pub rau nej lawm.

14 Nimno kuv tab tom yuav dua mus. Nej txhua tus lub siab thiab tus ntsuj plig yeej paub tias txhua yam zoo uas (יחוח)Yahweh uas yog nej Tus Tswv cog lus rau nej tsis poob ib los li, yeej ua tiav txhua yam tsis muaj ib yam abtsi uas tsis tau tiav.  

15 Txhua yam zoo uas (יחוח)Yahweh uas yog nej Tus Tswv cog lus rau nej twb ua tiav rau nej li cas lawm, (יחוח)Yahweh yuav ua tej xwm txheej phem huvsi los txog nej tiav ib yam li ntawd mus txog thaum nws rhuav tshem nej ploj tag hauv lub tebchaws zoo no uas (יחוח)Yahweh uas yog nej Tus Tswv muab pub rau nej.  

16 Yog nej ntxeev siab rau (יחוח)Yahweh uas yog nej Tus Tswv tej lus cog tseg uas nws muab cob rau nej es mus ua koom tu luag tej dab thiab pe tej dab ntawd, mas (יחוח)Yahweh txojkev npau taws yuav tshwm plaws rau nej mas nej yuav puam tsuaj sai kawg ploj tag hauv lub tebchaws zoo uas nws tau muab pub rau nej.