Ua Yam Ntxwv Txog Qhov Uas Poob Tebchaws

1 (יחוח)Yahweh hais lus tuaj rau kuv tias, 2 tibneeg tus tub, koj nyob hauv cov tibneeg uas pheej fav xeeb nruab nrab. Lawv muaj qhov muag los saib tsis pom, muaj qhov ntsej los tsis hnov lus, 3 vim lawv yog cov tibneeg uas pheej fav xeeb. Yog li no, tibneeg tus tub, koj cia li hwbxwm nra ib yam li tus uas yuav poob tebchaws, thiab cia li khiav ua tibneeg poob tebchaws nruab hnub nrig tab meeg lawv. Koj yuav khiav ib yam li tus uas poob tebchaws, tawm ntawm koj lub chaw mus rau ib qho tab meeg lawv. Tej zaum lawv yuav nkag siab, txawm yog lawv yog cov tibneeg uas pheej fav xeeb. 4 Koj cia li ris koj lub nra tawm mus nruab hnub nrig tab meeg lawv yam li tej nra uas raug poob tebchaws. Mas thaum tsaus ntuj koj yuav tawm mus tab meeg lawv, ib yam li tus uas raug poob tebchaws. 5 Cia li tho qhov tsev tab meeg lawv pom thiab coj lub nra tawm lub qhov tsev ntawd mus.

6 Cia li tsaws koj lub nra rau saum xub pwg tab meeg lawv, thiab cia li kwv tawm mus thaum tsaus ntuj nti. Koj yuav npog ntsej muag, kom thiaj tsis pom lub tebchaws. Kuv muab koj ua yam ntxwv rau cov Ixayees. 7 Kuv kuj ua raws li uas (יחוח)Yahweh hais. Kuv ris kuv lub nra tawm nruab hnub nrig ib yam li tej nra uas raug poob tebchaws. Thaum tsaus ntuj kuv txawm xuas kuv txhais tes tho qhov tsev.

Kuv kwv kuv lub nra tawm mus thaum tsaus ntuj nti, kuv kwv saum xub pwg tab meeg lawv. 8 Tagkis thaum kaj ntug (יחוח)Yahweh hais lus tuaj rau kuv tias,

9 tibneeg tus tub, haiv neeg Ixayees uas pheej fav xeeb, puas tau hais rau koj tias, koj ua abtsi? los tsis hais? 10 Koj cia li hais rau lawv tias, (יחוח)Yahweh hais li no tias, tej lus no ntsig txog tus thawj hauv Yeluxalees thiab cov Ixayees sawvdaws uas nyob qhov ntawd. 11 Koj cia li hais tias, kuv ua yam ntxwv rau nej. Qhov uas kuv ua li no, twb yog lawv yuav raug ib yam li ntawd. Lawv yuav raug poob tebchaws, lawv yuav raug ntes kuav mus.

12 Tus thawj uas nyob hauv lawv nruab nrab yuav tsaws nws lub nra rau saum xub pwg tawm khiav tsaus ntuj nti mus. Nws yuav tho qhov tsev thiab tawm mus. Nws yuav npog ntsej muag xwv nws lub qhov muag thiaj tsis pom lub tebchaws.

13 Kuv yuav nthuav vas cuab nws mas nws yuav mag kuv lub vas. Kuv yuav coj nws mus rau Npanpiloo‎s hauv cov Kheedias lub tebchaws, tiamsis nws yuav tsis pom lub tebchaws. Nws yuav tuag rau qhov ntawd. 14 Kuv yuav ua kom cov uas nyob ib ncig nws txhua tus, tag nrho nws cov tub teg tub taws thiab nws cov tub rog huvsi, ri sua mus raws cua rau txhua fab. Thiab kuv yuav rho ntaj caum tua lawv mus.

15 Thaum kuv ntiab lawv mus nyob rau hauv ib tsoom tebchaws thiab ua rau lawv khiav ri sua mus rau hauv luag tej tebchaws, mas lawv yuav paub tias kuv yog (יחוח)Yahweh. 16 Tiamsis kuv yuav pub qee leej dim hniav ntaj thiab kev tshaib kev nqhis thiab mob kis, kom lawv thiaj piav lawv tej kev qias vuab tsuab huvsi rau hauv ib tsoom tebchaws uas lawv khiav mus nyob ntawd paub, thiab lawv yuav paub tias kuv yog (יחוח)Yahweh.

17 (יחוח)Yahweh hais dua lus tuaj rau kuv tias, 18 tibneeg tus tub, cia li noj mov ua tshee hnyo, thiab haus dej ua ntshai nrhw. 19 Thiab hais rau cov tibneeg hauv lub tebchaws no tias, (יחוח)Yahweh hais li no txog cov tibneeg hauv Yeluxalees hauv Ixayees tebchaws tias, lawv yuav noj mov ua ntshai nrhw, thiab yuav haus dej ua siab poob nthav, vim txhua yam hauv lub tebchaws yuav raug muab lws du lug mus, yog tim cov tibneeg sawvdaws nyob hauv uas ua nruj ua tsiv.

20 Thiab tej moos uas muaj tibneeg nyob yuav raug muab tso tseg piam tag thiab lub tebchaws yuav nyob do cuas. Mas nej yuav paub tias kuv yog (יחוח)Yahweh.

21 (יחוח)Yahweh hais lus tuaj rau kuv tias, 22 tibneeg tus tub, lo paj lug uas koj muaj hais txog Ixayees tebchaws tias, Ib hnub dhau ib hnub los txhua zaj yog toog twb tsis tiav, yog li cas maj?

23 Cia li hais rau lawv tias, (יחוח)Yahweh hais li no tias, kuv yuav ua kom lo paj lug no ploj tag mus, lawv yuav tsis siv lo paj lug no hauv Ixayees dua li lawm. Cia li hais rau lawv tias, hnub ntawd twb los txog tes lawm, txhua zaj yog toog kuj yuav tiav. 24 Rau qhov yuav tsis muaj ib zaj yog toog cuav thiab yuav tsis muaj tej lus hais txog tom hauv ntej uas dag ntxias rau hauv cov Ixayees li lawm.

25 Tiamsis kuv uas yog (יחוח)Yahweh yuav hais tej lus uas kuv hais xwb, thiab yuav muaj raws li tej lus ntawd, tsis tos ntev lawm. Nej cov tibneeg uas pheej fav xeeb es, hauv nej tiam no ntag kuv yuav hais thiab ua kom tiav. (יחוח)Yahweh hais li no ntag.

26 (יחוח)Yahweh hais lus dua tuaj rau kuv tias, 27 tibneeg tus tub, saib maj, cov tibneeg Ixayees hais tias, tej yog toog uas nws pom yog tej uas tseem nyob yav tom hauv ntej ub ntev hnub, thiab nws cev (יחוח)Yahweh tej lus txog tej sijhawm uas tseem nyob deb. 28 Vim li no cia li hais rau lawv tias (יחוח)Yahweh hais li no tias, kuv cov lus tsis muaj ib los uas yuav tos ntev li lawm, tiamsis tej lus uas kuv hais yeej yuav ua kom tiav.

(יחוח)Yahweh hais li no ntag.