Txiav Txim Rau Cov Thawj Hauv Yeluxalees

1 Tus Ntsuj Plig Dawbhuv muab kuv nqa thiab coj kuv mus rau ntawm    (יחוח)Yahweh lub tuam tsev lub qhov rooj sab hnub tuaj uas tig rau sab hnub tuaj. Ua ciav ntawm txojkev uas nkag rau hauv lub qhov rooj muaj nees nkaum tsib tug txivneej. Thiab hauv lawv cov ntawd kuv pom Axus tus tub Ya‑axaniyas thiab Npenayas tus tub Pelathiyas, uas yog ua thawj coj cov pejxeem.

 2 Mas (יחוח)Yahweh hais rau kuv tias, tibneeg tus tub, cov tibneeg no yog cov uas tuav tswvyim ua txhaum thiab taw qhia tej lus phem hauv lub nroog no.

3 Lawv hais tias, tsis tau txog sijhawm ua vaj ua tsev. Lub nroog no yog lub laujkaub, peb yog cov nqaij. 4 Tibneeg tus tub es, vim li no cia li cev (יחוח)Yahweh li lus tawm tsam lawv, cia li hais los maj.  

5 Mas (יחוח)Yahweh Tus Ntsuj Plig Dawbhuv thiaj los nyob rau saum kuv, thiab (יחוח)Yahweh hais rau kuv tias, cia li hais tias, (יחוח)Yahweh hais li no tias, Ixayees haiv neeg es, nej xav li ntawd, kuv yeej paub tej uas nyob hauv nej lub siab. 6 Nej tau tua tibneeg hauv lub nroog no coob zuj zus, thiab muab cov uas raug tua tuag pov tseg puv nkaus hauv tej kev.

7 Vim li no (יחוח)Yahweh thiaj hais li no tias, cov uas nej tua tuag thiab muab pov tseg rau hauv nruab nrab lub nroog no, lawv yog cov nqaij ntag, lub nroog no yog lub laujkaub. Tiamsis nej yuav raug muab coj tawm hauv no mus. 8 Nej ntshai hniav ntaj, tiamsis kuv yuav coj hniav ntaj los raug nej. (יחוח)Yahweh hais li no ntag. 9 Kuv yuav coj nej tawm hauv lub nroog no mus thiab muab nej cob rau hauv lwm haiv neeg txhais tes, thiab kuv yuav txiav txim rau nej. 10 Nej yuav raug ntaj tuag. Kuv yuav rau txim rau nej ntawm Ixayees ciam teb, mas nej thiaj paub tias kuv yog (יחוח)Yahweh. 11 Lub nroog no tsis yog lub laujkaub uas tsom kwm nej, thiab nej tsis yog cov nqaij uas nyob rau hauv. Kuv yuav rau txim rau nej ntawm Ixayees ciam teb. 12 Mas nej thiaj paub tias kuv yog (יחוח)Yahweh, rau qhov nej tsis ua raws li kuv tej kab ke, thiab tsis coj raws li kuv txoj kevcai, tiamsis nej ua raws tej tebchaws uas nyob ib ncig nej li kevcai. 13 Thaum kuv tabtom cev (יחוח)Yahweh lus ntawd, ua ciav Npenayas tus tub Pelathiyas txawm tuag. Ces kuv cia li khwb nkaus lub plhu ti nkaus av thiab qw nrov nrov hais tias, Au (יחוח)Yahweh,, tsis txhob ua li ntawd lauj! Koj yuav ua kom cov Ixayees uas tseem tshuav nyob puam tsuaj tag nrho huvsi lov?

​

(יחוח)Yahweh Cog Lus Tseg Tias Cov Ixayees Yuav Rov Los

14 (יחוח)Yahweh hais lus tuaj rau kuv tias, 15 tibneeg tus tub es, koj cov kwvtij, yog koj cov kwvtij uas nrog koj poob tebchaws lawm, yog cov Ixayees huvsi, uas raug cov hauv Yeluxalees hais tias, lawv khiav deb ntawm (יחוח)Yahweh lawm, mas lub tebchaws no raug muab rau peb ua peb tug lawm. 16 Vim li no koj cia li hais tias, (יחוח)Yahweh hais li no tias, txawm yog kuv muab lawv tshais mus nyob deb rau hauv ib tsoom tebchaws, thiab ua rau lawv ri sua rau hauv tej tebchaws, los kuv tseem ua lub chaw rau lawv pe hawm ib ntus hauv tej tebchaws uas lawv mus nyob.

17 Vim li no cia li hais tias, (יחוח)Yahweh hais li no tias, kuv yuav qaws nej tawm hauv ib tsoom tibneeg los, thiab coj nej tawm hauv tej tebchaws uas nej mus nyob lawm los txoos ua ke, thiab kuv yuav muab Ixayees tebchaws rau nej.

18 Thaum lawv los txog lawm, lawv yuav rhuav tej uas ntxub kawg huvsi thiab tej uas qias vuab tsuab huvsi tawm mus pov tseg.

19 Kuv yuav pub lawv muaj ib lub siab xwb, thiab kuv yuav pub Tus Ntsuj Plig Dawbhuv tshiab rau hauv lawv. Kuv yuav muab lawv lub siab pob zeb rho hauv lawv lub cev mus, thiab muab lub siab nqaij rau lawv, 20 kom lawv thiaj li ua raws li kuv tej kab ke thiab tuav rawv kuv tej kevcai thiab ua raws nraim. Lawv yuav ua kuv haiv neeg thiab kuv yuav ua lawv Tus Tswv. 21 Tiamsis cov uas lub siab nyiam ua raws li lawv tej kev uas ntxub kawg thiab lawv tej kev qias vuab tsuab, kuv yuav ua pauj rau lawv raws li lawv tau ua lawm rau saum lawv lub taubhau. (יחוח)Yahweh hais li no ntag. 22 Cov Khelunpee‎s kuj nthuav tis, cov log tsheb kuj nyob ib sab ntawm lawv, thiab Ixayees Tus Tswv lub hwjchim ci ntsa iab nyob saum lawv. 23 (יחוח)Yahweh lub hwj chim ci ntsa iab txawm tawm hauv nruab nrab lub nroog mus, mus nyob saum lub roob uas nyob ntawm lub nroog sab hnub tuaj. 24 Ces Tus Ntsuj Plig Dawbhuv txawm nqa kuv mus, coj kuv los hauv zaj yog toog uas Tus Ntsuj Plig Dawbhuv pub rau kuv, los txog Kheedias tebchaws rau ntawm cov uas poob tebchaws. Ces zaj yog toog uas kuv pom txawm ncaim kuv mus lawm. 25 Ces kuv thiaj hais txhua yam uas (יחוח)Yahweh qhia rau kuv rau cov uas poob tebchaws paub.