(יחוח)Yahweh Lub Hwjchim Uas Ci Ntsa Iab Tawm Hauv Lub Tuam Tsev

1 Kuv tsa muag saib saum lub qab ntuj uas khwb cov Khelunpee‎s ntawd taubhau ua ciav muaj ib yam tshwm los zoo li qe zeb phaithus tsamxem, zoo yuav thooj li lub zwm txwv. 2 (יחוח)Yahweh hais rau tus txivneej uas hnav ntaub mag ntawd tias, cia li nkag mus rau hauv nruab nrab cov log tsheb kiv kiv uas nyob hauv cov qab Khelunpee‎s. Cia li xuas tes yawm cov ncaig taws uas tseem kub hauv nruab nrab cov Khelunpee‎s thiab coj mus w rau saum lub nroog. Mas tus ntawd kuj nkag mus tab meeg kuv saib ntsoov. 3 Thaum tus txivneej ntawd nkag mus, cov Khelunpee‎s sawv ntawm lub tuam tsev sab nrad. Mas huab los laum puv nkaus lub tuam tsev lub tshav puam sab hauv.

4 Mas (יחוח)Yahweh lub hwjchim uas ci ntsa iab kuj tawm ntawm cov Khelunpee‎s mus rau ntawm lub qhov rooj tuam tsev, mas huab laum puv nkaus lub tuam tsev chav hauv nruab nrab, thiab (יחוח)Yahweh lub hwjchim ci ntsa iab puv nkaus lub tshav puam sab hauv.

5 Txawm yog cov uas nyob lub tshav puam sab nraud los kuj hnov cov Khelunpee‎s kooj tis lub suab nrov, ib yam li (יחוח)Yahweh uas muaj hwjchim loj kawg nkaus lub suab hais lus. 6 Thaum nws hais rau tus txivneej uas hnav ntaub mag hais tias, cia li muab hluavtaws hauv nruab nrab cov log tsheb kiv kiv uas nyob hauv nruab nrab cov Khelunpee‎s, tus txivneej ntawd nkag mus sawv ntawm ib sab ib lub log tsheb. 7 Ib tug Khelunpee‎s txawm cev loo tes mus rau hauv cov hluavtaws uas nyob hauv nruab nrab cov Khelunpee‎s, muab hluavtaws los cev rau tus uas hnav ntaub mag ntawd txhais tes, ces tus ntawd txawm txais cov hluavtaws ntawd tawm mus lawm. 8 Saib mas zoo li hauv cov Khelunpee‎s qab phab tis muaj ib txhais tes thooj li tes tibneeg. 9 Kuv tsa muag saib mas pom muaj plaub lub log tsheb nyob ib sab ntawm cov Khelunpee‎s, ib tug muaj ib lub log. Saib cov log tsheb mas ci zoo yam nkaus li tej qe zeb hlaws ntsuab lam lug. 10 Cov log tsheb ntawd zoo li uas hais no, plaub lub log tsheb zoo ib yam nkaus, plaub lub log tsheb zoo li nyias muaj nyias ib lub log muab nruab sib ris.

11 Thaum yuav mus rau sab twg kuj cia li mus tau rau plaub fab tsis txog tig li. Yog ib lub log mus rau tom hauv ntej lwm lub log kuj mus raws qab tsis txog tig li. 12 Lawv lub cev lub nrob qaum tej tes tej kooj tis thiab lawv plaub lub log tsheb puavleej muaj qhov muag thoob plaws. 13 Cov log tsheb ntawd kuv hnov luag hu tias, log tsheb uas kiv kiv. 14 Txhua tus muaj plaub lub ntsej muag, lub ntsej muag ib yog Khelunpee‎s, lub ntsej muag ob yog tibneeg, lub ntsej muag peb yog tsov ntxhuav, lub ntsej muag plaub yog dav. 15 Cov Khelunpee‎s kuj sawv ya mus. Yog tej tsiaj ciaj sia uas kuv txeev pom ntawm ntug dej Khenpas.

16 Thaum cov Khelunpee‎s mus, cov log tsheb kuj raws ib sab mus thiab. Thaum cov Khelunpee‎s nthuav tis ya tawm hauv ntiajteb lawm, cov log tsheb ntawd kuj tsis tig ntawm lawv mus. 17 Thaum cov Khelunpee‎s nres, cov log tsheb kuj nres, thaum cov Khelunpee‎s sawv ya cov log tsheb kuj sawv ya ua ke mus, rau qhov cov tsiaj tus plig nyob hauv cov log tsheb. 18 (יחוח)Yahweh tus hwjchim uas ci ntsa iab txawm tawm ntawm lub qhov rooj tuam tsev mus nyob saum cov Khelunpee‎s.

19 Cov Khelunpee‎s kuj nthuav tis ya nce hauv av mus tab meeg kuv saib ntsoov, cov log tsheb uas nyob ib sab kuj mus ua ke thiab. Lawv nres rau ntawm (יחוח)Yahweh lub tuam tsev lub qhov rooj uas nyob sab hnub tuaj. Cov Ixayees Tus Tswv lub hwjchim ci ntsa iab nyob saum cov Khelunpee‎s ntawd. 20 Cov Khelunpee‎s no yog cov tsiaj ciaj sia uas kuv txeev pom nyob hauv qab cov Ixayees Tus Tswv ntawm ntug dej Khenpas. Thiab kuv paub tias, lawv yog Khelunpee‎s.

21 Txhua tus muaj plaub lub ntsej muag thiab muaj plaub phab tis, thiab hauv cov qab tis ntawd muaj ib yam zoo li tibneeg txhais tes. 22 Hais txog lawv lub ntsej muag zoo li cas, yeej zoo li cov ntsej muag uas kuv txeev pom ntawm ntug dej Khenpas. Txhua tus tawm ncaj nraim ntawm nws xubntiag mus.