Teem Txim Cov Uas Pe Dab Mlom

1 Ixayees cov kev txwj laug qee leej tuaj cuag kuv thiab los zaum ntawm kuv xubntiag. 2 Mas (יחוח)Yahweh hais lus tuaj rau kuv tias, 3 tibneeg tus tub, cov tibneeg no tuav rawv lawv tej dab mlom rau hauv lawv lub siab lawm, thiab muab tej uas ua rau lawv dawm mus ua txhaum muaj txim cuab rau ntawm lawv xubntiag. Tsim nyog kuv yuav kheev lawv nug kuv lov? 4 Yog li no, cia li hais rau lawv tias, (יחוח)Yahweh hais li no tias, cov Ixayees yog leejtwg tuav rawv nws tej dab mlom rau hauv lub siab thiab muab yam uas ua kom nws dawm mus ua txhaum muaj txim cuab rau ntawm nws xubntiag es tseem tuaj cuag tus xibhwb cev (יחוח)Yahweh lus, mas kuv uas yog (יחוח)Yahweh yuav teb nws kom tsim nyog qhov uas nws muaj dab mlom ntau kawg, 5 xwv kuv thiaj tuav tau cov Ixayees lub siab uas ncaim ntawm kuv lawm txhua tus, vim lawv tej dab mlom.

6 Vim li no, cia li hais rau cov Ixayees tias, (יחוח)Yahweh hais li no tias, cia li ntxeev dua siab thiab tig ntawm nej tej dab mlom rov los, thiab fee plhu kiag ntawm nej tej kev qias vuab tsuab huvsi.

7 Cov Ixayees lossis lwm haiv neeg uas nrog cov Ixayees nyob, yog leejtwg tawm ntawm kuv mus tuav rawv nws tej dab mlom rau hauv lub siab, thiab muab yam uas ua kom nws dawm mus ua txhaum muaj txim cuab rau ntawm nws xubntiag, es tseem tuaj cuag tus xibhwb cev (יחוח)Yahweh lus ua nug rau kuv txog nws, mas kuv uas yog (יחוח)Yahweh yuav teb nws ntag. 8 Kuv yuav tsom ntsoov tawm tsam tus ntawd. Kuv yuav ua rau nws ua tus yam ntxwv rau luag pom thiab tiag luag ncauj luag lo, thiab muab nws txiav tawm hauv kuv haiv neeg mus. Mas nej thiaj paub tias kuv yog (יחוח)Yahweh.

9 Thiab yog tus xibhwb cev lus twg raug ntxias lo lus twg, kuj yog kuv uas yog (יחוח)Yahweh ntxias tus xibhwb ntawd, mas kuv yuav tsa kuv txhais tes tawm tsam nws, thiab yuav ua kom nws puam tsuaj hauv kuv haiv neeg Ixayees mus. 10 Lawv yuav ris lawv lub txim, tus xibhwb thiab tus uas mus ua nug yuav raug txim ib yam nkaus, 11 kom cov Ixayees thiaj tsis yuam kev ntawm kuv mus, thiab tsis ua tej kev txhaum txim huvsi ua rau lawv qias puas tsuas dua li lawm, tiamsis lawv yuav ua kuv haiv neeg thiab kuv yuav ua lawv Tus Tswv. (יחוח)Yahweh hais li no ntag.

​

Yeluxalees Yuav Raug Txim Kom Tau

12 (יחוח)Yahweh hais lus tuaj rau kuv tias, 13 tibneeg tus tub, yog lub tebchaws twg fav xeeb ua txhaum rau kuv, es kuv tsa kuv txhais tes tawm tsam lub tebchaws ntawd thiab txiav nws tej zaub mov noj kom tu nrho, thiab tso kev tshaib nqhis los rau nws, thiab rhuav tshem tej tibneeg thiab tej tsiaj txhu hauv lub tebchaws ntawd, 14 mas txawm yog peb tug tibneeg no, uas yog Nau‑as, Daniyees thiab Yauj, nyob rau hauv lub tebchaws ntawd, los qhov uas lawv ua ncaj ncees tsuas yog pab tau lawv txojsia dim xwb. (יחוח)Yahweh hais li no ntag. 15 Lossis yog kuv ua rau tsiaj nyaum los rau hauv lub tebchaws ntawd ua rau tibneeg tuag tag thiab ua rau lub tebchaws nyob do cuas cia, tibneeg thiaj hla tsis tau mus rau hauv li lawm vim yog muaj tej tsiaj nyaum ntawd, 16 (יחוח)Yahweh hais tias, kuv yeej muaj txojsia nyob, mas txawm yog peb tug tibneeg ntawd nyob rau hauv lub tebchaws ntawd, los lawv yuav pab tsis tau tej tub tej ntxhais dim kiag li, tsuas yog lawv tus kheej dim xwb, mas lub tebchaws yuav nyob do cuas cia. 17 Lossis yog kuv coj ntaj los rau hauv lub tebchaws ntawd, thiab hais tias, cia hniav ntaj mus thoob plaws lub tebchaws, thiab kuv rhuav tshem tej tibneeg thiab tsiaj txhu hauv lub tebchaws ntawd, 18-(יחוח)Yahweh hais tias, kuv yeej muaj txojsia nyob, mas txawm yog peb tug tibneeg ntawd nyob rau hauv lub tebchaws ntawd, los lawv yuav pab tsis tau tej tub tej ntxhais dim kiag li, tsuas yog lawv tus kheej dim xwb. 19 Lossis yog kuv tso mob kis los rau hauv lub tebchaws ntawd, thiab nchuav kuv tej kev npau taws uas ua kom los ntshav rau hauv, thiaj rhuav tshem tau tej tibneeg thiab tsiaj txhu hauv lub tebchaws ntawd, 20 (יחוח)Yahweh hais tias, kuv yeej muaj txojsia nyob, mas txawm yog Nau‑as, Daniyl thiab Iyyob nyob rau hauv, los lawv yuav pab tsis tau tej tub tej ntxhais dim kiag li, qhov uas lawv ua ncaj ncees tsuas yog pab tau lawv dim xwb. 21 (יחוח)Yahweh hais li no tias, yuav yimhuab raug kev txom nyem loj dua li ntawd, rau thaum kuv tso kuv plaub yam kev teem txim uas hnyav heev los rau Yeluxalees, yog hniav ntaj, kev tshaib nqhis, tsiaj nyaum thiab mob kis, thiaj rhuav tshem tej tibneeg thiab tsiaj txhu hauv lub tebchaws ntawd. 22 Txawm yog li ntawd los yog yuav muaj qee leej dim txojsia hauv lub tebchaws ntawd coj lawv tej tub tej ntxhais tawm los, mas thaum lawv tawm los cuag nej thiab nej pom lawv lub neej thiab tej uas lawv twb ua lawm, nej yuav tsis hnyav siab rau tej xwm txheej phem uas kuv tau ua rau Yeluxalees thiab txhua yam uas kuv coj los raug lub nroog ntawd. 23 Lawv cov yuav ua rau nej tsis hnyav siab rau thaum nej pom lawv lub neej thiab tej uas lawv twb ua lawm mas nej yuav paub tias txhua yam uas kuv ua rau hauv lub nroog ntawd tsis yog kuv lam ua tsis muaj keeb puam. (יחוח)Yahweh hais li no ntag.