1 Mas nws hais rau kuv tias, tibnee tus tub es, cia li noj tej uas kuv muab rau koj. Cia li noj thooj ntawv no, thiab cia li mus hais rau haiv neeg Ixayees. 2 Kuv thiaj rua ncauj thiab nws muab thooj ntawv ntawd rau kuv noj. 3 Thiab nws hais rau kuv tias, tibneeg tus tub, cia li noj thooj ntawv uas kuv muab rau koj no, cia li noj kom puv nkaus koj lub plab. Mas kuv thiaj li noj. Thaum thooj ntawv ntawd nyob hauv kuv lub qhov ncauj kuj qab zib ib yam li zib ntab. 4 Mas nws hais rau kuv tias, tibneeg tus tub, cia li mus cuag haiv neeg Ixayees, thiab hais kuv tej lus rau lawv. 5 Tsis yog kuv txib koj mus cuag cov tibneeg uas hais lwm yam lus uas ceeblaj hais, tiamsis yog mus cuag haiv neeg Ixayees. 6 Tsis yog mus cuag tej tibneeg coob coob uas hais lwm yam lus uas ceeblaj hais thiab koj tsis nkag siab. Yog kuv txib koj mus cuag tej tibneeg ntawd lawv yeej yuav mloog koj hais.

7 Tiamsis haiv neeg Ixayees yuav tsis mloog koj hais rau qhov lawv yeej tsis yeem mloog kuv hais, thiab cov tibneeg Ixayees sawvdaws yog tibneeg hauv pliaj tawv lub siab tawv. 8 Saib maj, kuv twb ua koj lub siab tawv tiv lawv, thiab ua rau koj lub hauv pliaj tawv tiv lawv lub hauv pliaj. 9 Kuv ua rau koj lub hauv pliaj tawv dua pob zeb uas tawv heev, tawv dua zeb hauvswm. Koj tsis txhob ntshai lawv, tsis txhob poob siab rau lawv tej ntsej muag, rau qhov lawv yeej yog haiv neeg uas pheej fav xeeb. 10 Nws hais dua rau kuv tias, tibneeg tus tub, cia li khaws tej lus uas kuv hais rau koj huvsi rau hauv koj lub siab, thiab tig koj lub qhov ntsej mloog.

11 Cia li mus, koj mus cuag cov tibneeg uas poob tebchaws, uas yog koj cov tibneeg, thiab hais rau lawv tias, (יחוח)Yahweh hais li no, txawm yog lawv yuav mloog thiab tsis mloog kuj xij. 12 Tus Ntsuj Plig Dawbhuv txawm tsa kuv sawv, thiab thaum (יחוח)Yahweh lub hwjchim ci ntsa iab sawv ntawm lub chaw ntawd mus, kuv txawm hnov lub suab nrov vig voog tom kuv qub qab,13 yog cov tsiaj ciaj sia uas kooj tis sib tib ntxuaj lub suab nrov, thiab yog cov log tsheb uas nyob ib sab ntawm cov tsiaj ntawd lub suab nrov, yog lub suab uas nrov ua ntseeg nkaws. 14 Tus Ntsuj Plig Dawbhuv kuj tsa kuv sawv thiab coj kuv mus, kuv thiaj mob siab thiab npau taws mus. (יחוח)Yahweh txhais tes muaj zog hnyav rau saum kuv. 15 Kuv thiaj tuaj txog cov tibneeg poob tebchaws uas nyob ntawm Thee‑anpis, yog cov uas nyob ntawm ntug dej Khenpas. Kuv nrog lawv nyob qhov ntawd ua mluas mlob poob siab tag tau xya hnub.

​

Tus Faj Xwm Cov Ixayees

16 Thaum dhau xya hnub lawm, Yah-weh hais lus tuaj rau kuv hais tias,

17 Tibneeg tus tub, kuv twb tsa koj ua tus faj xwm zov cov Ixayees. Koj hnov kuv lub ncauj thaum twg, ces koj cia li hais kuv tej lus ntawd ntuas lawv. 18 Yog kuv hais rau tus tibneeg phem tias, koj yuav tuag tiag tiag li, yog koj tsis ntuas nws tsis hais kom nws tso nws txojkev phem tseg xwv thiaj cawm tau nws txojsia, mas tus tibneeg phem ntawd yuav tuag vim yog nws txojkev txhaum muaj txim, tiamsis kuv yuav ua rau koj ris nws cov ntshav.

19 Tiamsis yog koj ntuas tus tibneeg phem lawm, tiamsis nws tsis tso qhov uas nws ua phem tseg thiab tsis tig ntawm txojkev phem rov los, nws yuav tuag vim yog nws txojkev txhaum muaj txim, mas koj yuav cawm tau koj txojsia. 20 Thiab dua ib qho, yog tus ncaj ncees tso txojkev ncaj ncees tseg thiab tau ua txhaum muaj txim, thiab kuv muab yam uas ua rau nws dawm tso rau ntawm nws hauv ntej, mas nws yuav tuag. Vim koj tsis tau ntuas nws, mas nws yuav tuag rau nws lub txim. Kuv yuav tsis nco qhov uas nws ua ncaj ncees kiag li, tiamsis kuv yuav ua rau koj ris nws cov ntshav. 21 Tiamsis yog koj ntuas tus ncaj ncees kom tsis txhob ua txhaum thiab nws tsis ua txhaum lawm, mas nws yuav muaj txojsia nyob tiag tiag vim yog nws yuav tej lus ntuas ntawd, thiab koj kuj cawm tau koj txojsia.

Ua Rau Yechetzqyah Hais Tsis Tau Lus

22 (יחוח)Yahweh txhais tes los rau saum kuv qhov ntawd, thiab nws hais rau kuv tias, cia li sawv tsees mus rau nram tiaj mas kuv yuav hais rau koj qhov ntawd.

23 Kuv thiaj sawv tsees mus rau nram tiaj, mas ua ciav (יחוח)Yahweh lub hwjchim ci ntsa iab nyob rau qhov ntawd, ib yam nkaus li lub hwjchim ci ntsa iab uas kuv pom ntawm tus dej Khenpas, mas kuv cia li khwb nkaus ua lub plhu ti nkaus av. 24 Tus Ntsuj Plig Dawbhuv txawm los rau hauv kuv, ua rau kuv sawv tsees, thiab (יחוח)Yahweh hais rau kuv tias, koj cia li mus hauv koj tsev kaw nkaus qhov rooj cia. 25 Tibneeg tus tub es, saib maj, koj yuav raug muab hlua khi, koj thiaj tawm mus tsis tau rau hauv nruab nrab cov Ixayees. 26 Thiab kuv yuav ua rau koj tus nplaig lo koj qab yiag mas koj yuav hais tsis taus lus thiab ntuas tsis tau lawv, vim tias, lawv yeej yog haiv neeg uas pheej fav xeeb.  

27 Tiamsis thaum kuv hais lus rau koj, kuv yuav ua rau koj rov hais tau lus mas koj yuav hais rau lawv tias, (יחוח)Yahweh hais li no ntag. Tus uas yeem mloog kuj cia nws mloog, tus uas tsis yeem mloog kuj cia nws tsis txhob mloog, rau qhov lawv yeej yog haiv neeg uas pheej fav xeeb.