Ua Yam Ntxwv Txog Qhov Uas Vij Yeluxalees​

1 Tibneeg tus tub es, koj cia li muab ib lub thwv cib tso rau ntawm koj xubntiag, thiab muab sais ua zoo li lub nroog Yeluxalees. 2 Cia li tib chaw vij lub nroog ntawd cia thiab xov laj kab vij thiab tsub av ua chaw nce mus tawm tsam lub nroog ntawd thiab ua chaw ntaus rog vij, thiab ua tej chaw uas txam ntsa loog kom pob thoob plaws rau ib ncig. 3 Koj cia li muab ib daim hlau los thiab muab txawb ua ntsa loog hlau quas koj thiab lub nroog. Koj cia li tig xubntiag rau ntawm lub nroog, lub nroog ntawd raug vij lawm, mas koj cia li ua tus uas ntaus lub nroog ntawd. No yog ua yam ntxwv qhia rau cov Ixayees. 4 Koj cia li pw ua ntsais rau sab laug, thiab muab qhov uas cov Ixayees raug teem txim tso rau saum koj. Koj pw rau sab laug pes tsawg hnub, mas koj yuav ris qhov uas lawv raug teem txim ntev ib yam li ntawd.

5 Kuv teem tsawg hnub rau koj lawm, yog peb puas cuaj caum hnub, yog npaum li cov niaj xyoo uas rau txim rau lawv. Koj yuav ris qhov uas rau txim rau cov Ixayees ntev li ntawd ib hnub yog ib xyoos. 6 Thaum koj pw puv sijhawm lawm, koj yuav tsum pw zaum ob, yog pw ua ntsais rau sab xis, thiab ris qhov uas rau txim rau cov Yahdah. Kuv teem plaub caug hnub rau koj, ib hnub yog ib xyoo.

7 Koj yuav tig xubntiag saib ntsoov daim duab uas yog vij lub nroog Yeluxalees, thiab loj npab ntshuas cev (יחוח)Yahweh tej lus tawm tsam lub nroog ntawd.

8 Saib maj, kuv yuav muab hlua khi koj cia, kom koj thiaj ntxeev tsis tau sab no rau sab tod mus txog thaum koj raug vij puv sijhawm lawm. 9 Koj cia li muab mog muab qeb muab taum lag taum pauv thiab pias thiab txhuv daj los tso ua ke rau hauv ib lub phaj muab ua ncuav. Thaum koj pw ua ntsais peb puas cuaj caum hnub ntawd, koj yuav noj cov ncuav ntawd xwb. 10 Koj yuav tsum muab cov ncuav luj los noj, ib hnub noj nees nkaum sekhees, thiab noj raws li sijhawm uas teem cia xwb. 11 Thiab dej los koj yuav muab luj haus, ib hee mas muab faib ua rau feem, ib hnub haus ib feem raws li sijhawm uas teem cia. 12 Koj yuav noj cov ncuav ntawd ib yam li noj ncuav qeb. Koj yuav muab quav tibneeg los rauv taws ci tab meeg lawv.

13 Thiab (יחוח)Yahweh hais tias, cov Ixayees yuav noj lawv tej ncuav qias tsis huv ib yam li no rau hauv tej tebchaws uas kuv yuav ntiab lawv mus nyob.

14 Mas kuv thiaj hais tias, Au (יחוח)Yahweh, tsis txhob ua li ntawd, kuv tsis txeev ua rau kuv qias puas tsuas. Txij thaum yau los txog nimno kuv tsis txeev noj tej tsiaj uas nws tuag nws thiab tej uas raug lwm tus tsiaj tom tuag. Tsis muaj ib qho nqaij qias tsis huv nkag rau hauv kuv lub qhov ncauj. 15 Mas (יחוח)Yahweh thiaj hais rau kuv tias, Ua li ntawd, kuv kheev koj muab quav nyuj hloov quav tibneeg ci ncuav rau koj.

16 (יחוח)Yahweh hais dua rau kuv tias, tibneeg tus tub, saib maj, kuv yuav txiav tej zaub mov noj hauv Yeluxalees kom tu mus. Mas lawv yuav muab ncuav luj zuj zus los noj ua ntshai nrhw. Lawv yuav muab dej luj los haus ua poob siab tag. 17 Mov thiab dej yuav tu nrho, mas lawv ib tug saib ib tug ua poob siab tag thiab yuag zuj zus rau thaum lawv raug teem txim.