Zaj Nkauj Ntsuag Lub Nroog Thailab

1 (יחוח)Yahweh hais lus tuaj rau kuv tias, 2 tibneeg tus tub, nimno koj cia li tsa suab hu zaj nkauj ntsuag hais txog lub nroog Thailab. 3 Cia li hais rau Thailab uas nyob ntawm txojkev mus rau hauv hiavtxwv, thiab ua lag luam rau cov tibneeg hauv ntau lub tebchaws uas nyob ntawm ntug hiavtxwv hais tias,(יחוח)Yahweh hais li no tias, Thailab es, koj tau hais tias koj zoo nkauj kawg nkaus. 4 Koj ciam teb nyob hauv hiavtxwv. Cov uas tsim koj ua rau koj zoo nkauj kawg nkaus. 5 Lawv xuas ntoo thuv hauv Xenis ua koj tej txiag xov huvsi, Lawv muab ntoo ciab hauv Lenpanoos ua koj tus ncej hauv plawv nkoj. 6 Lawv muab ntoo qheb hauv Npasas ua koj tej duav nquam nkoj, Lawv muab ntoo thuv hauv Xaiplas ua cov txiag pua lub nkoj thiab muab kaus ntxhw lo rau hauv. 7 Koj daim ntaub cua ntsawj yog muab cov ntaub mag ua paj zoo zoo hauv Iziv tebchaws ua, thiab ua koj tus chij. Muab ntaub xiav ntaub tsamxem ntawm ntug hiavtxwv Elisas vov roos tshav. 8 Cov tibneeg Xaidoos thiab cov tibneeg hauv lub moos Alavas yog cov uas nquam nkoj rau koj. Thailab es, koj cov tibneeg uas txawj ua txhua yam yog cov uas ua haujlwm hauv lub nkoj. 9 Cov laus thiab cov uas txawj ua txhua yam haujlwm hauv lub moos Kenpas nyob hauv koj, ua Kws ntoo kho tej kem txiag ntoo hauv koj lub nkoj. Txhua lub nkoj hauv hiavtxwv thiab cov uas ua haujlwm hauv nkoj kuj tuaj nyob hauv koj, nrog koj ua lag luam. 10 Cov tibneeg Pawxias thiab Lus thiab Phuj kuj ua koj li tub rog hauv koj pab tub rog, lawv muab lawv tej daim hlau thiab mom hlau dai rau hauv koj, lawv ua rau koj tau koob meej. 11 Cov Alavas thiab cov Helem nyob saum koj tej ntsa loog thoob plaws, cov Kamas nyob saum koj tej chaw tsom faj. lawv dai daim hlau thaiv cev raws koj tej ntsa loog thoob plaws, lawv ua rau qhov uas koj zoo nkauj zoo nkauj kawg nkaus. 12 Lub moos Thasis nrog koj ua lag luam vim koj muaj txhua tsav txhua yam ntau kawg, lawv coj nyiaj, hlau, tooj dawb thiab txhuas tuaj pauv koj tej qhov txhia chaw. 13 Lub moos Yavas, Thunpas thiab Meses nrog koj ua lag luam. Lawv coj tub qhe thiab twj taig tooj liab tuaj pauv koj li qhov txhia chaw. 14 Lub moos Npes Thaukamas coj nees thiab nees ua rog thiab luj txwv tuaj pauv rau koj.

15 Cov tibneeg Dedas nrog koj ua lag luam, ntau lub tebchaws ntawm ntug hiavtxwv kuj nrog koj ua lag luam qas nraim. Lawv coj kaus ntxhw thiab ntoo kub twg tuaj ua nqe them rau koj. 16 Alas kuj nrog koj ua lag luam vim yog koj muaj qhov txhia chaw ntau nplua mias. Lawv coj qe zeb hlaws ntsuab txho, ntaub tsamxem, ntaub paj, ntaub mag zoo zoo, paj zeb hiavtxwv thiab qe zeb hlaws uas txho taws tuaj pauv koj tej qhov txhia chaw.

17 Yahdah thiab Ixayees tebchaws kuj nrog koj ua lag luam. Lawv coj mog hauv lub moos Minij thiab thawj phaum txiv cev, thiab zib ntab thiab roj thiab roj ntoo ua tshuaj tuaj pauv koj tej qhov txhia chaw. 18 Damaxakas nrog koj ua lag luam yuav koj tej qhov txhia chaw ntau, vim yog koj muaj txhua yam ntau nplua mias. Lawv coj cawv txiv hmab hauv Henpoos thiab plaub yaj dawb, 19 thiab cawv txiv hmab hauv Uxas tuaj pauv koj tej qhov txhia chaw. Lawv coj cov tseem hlau thiab hmoov xyab txob thiab tauj qaib qab zib tuaj pauv koj tej qhov txhia chaw. 20 Lub moos Dedas nrog koj ua lag luam. Lawv coj ntaub pua eeb nees tuaj.

21 Alanpias thiab cov thawj hauv Khedas sawvdaws nrog koj ua lag ua luam qas nraim. Lawv coj menyuam yaj thiab txiv yaj thiab tshis tuaj muag rau koj.

22 Cov tub luam hauv lub moos Senpas thiab lub moos La‑amas kuj nrog koj ua lag luam. Lawv coj txhua yam txuj lom zoo zoo thiab txhua yam qe zeb hlaws muaj nqes thiab kub tuaj pauv koj tej qhov txhia chaw. 23 Lub moos Halas thiab Khanes thiab Edees, thiab tej tub luam hauv lub moos Senpas thiab Asus thiab Khimaj kuj nrog koj ua lag luam. 24 Lawv coj tej tsoos tsho zoo zoo, tej tsoos tsho xiav, ntaub paj thiab tej ntaub txaij pua chaw uas muab xaws ntug ruaj ruaj lawm tuaj nrog koj ua lag luam. 25 Tej nkoj txwg hauv lub moos Thasis thauj koj tej lag luam. Koj thiaj thauj puv nkaus hnyav kawg hauv nruab nrab hiavtxwv.

26 Koj cov uas nquam nkoj coj koj mus txog hauv hiavtxwv uas tob tob, mas cua sab hnub tuaj ua rau koj tog rau hauv nruab nrab hiavtxwv.

27 Koj tej nyiaj txiag, koj tej qhov txhia chaw thiab koj tej lag luam, koj tej tub nquam nkoj thiab tej uas ua haujlwm hauv nkoj, koj tej Kws ntoo, koj tej tub lag tub luam thiab koj tej tub rog huvsi uas nrog koj nyob, thiab ib tsoom tibneeg sawvdaws uas nyob hauv koj, tog kiag rau hauv qab hiavtxwv rau hnub uas koj puam tsuaj thiab. 28 Lub tebchaws kuj ntseeg ua zog kais rau thaum uas hnov koj tej tibneeg ua haujlwm hauv nkoj lub suab quaj qw. 29 Txhua tus uas tuav duav nquam nkoj nqes ntawm lawv lub nkoj los, tej tibneeg uas ua haujlwm hauv lawv tej nkoj sawvdaws los sawv rau ntawm ntug hiavtxwv.

30 Lawv quaj nyiav koj nrov nrov, thiab quaj heev kawg li. Lawv w hmoov av rau saum lawv taubhau thiab da luj luam hauv tej pluav tshauv. 31 Lawv chais plaubhau vim yog koj, thiab muab khaub seev tsaj los hnav, lawv quaj koj lwj siab kawg, thiab quaj ntsuag koj nyuaj siab kawg. 32 Lawv quaj nyiav hu zaj nkauj ua ntsuag rau koj, thiab quaj ntsuag rau koj hais tias, txeev muaj leejtwg raug puam tsuaj ib yam li lub nroog Thailab rau hauv nruab nrab hiavtxwv lov? 33 Thaum koj tej lag luam hla hiavtxwv tuaj kuj ua rau ntau haiv neeg coob coob txaus siab. Koj tej qhov txhia chaw uas ntau nplua mias thiab koj tej lag luamua rau tej vajntxwv hauv ntiajteb nplua nuj. 34 Nimno dej hiavtxwv ua rau koj puam tsuaj tag rau hauv nruab nrab hiavtxwv tob tob. Koj tej lag luam thiab koj tej tub nkoj kuj tog nrog koj ua ke rau hauv. 35 Koj ua rau tej tibneeg uas nyob raws ntug hiavtxwv poob siab nthav, lawv tej vajntxwv ntshai heev kawg plhu thim xem tag.

36 Tej tub luam hauv ib tsoom tibneeg xyu thuam koj. Koj txog qhov kawg uas txaus ntshai kawg li thiab ploj ntais mus ib txhis.