Zaj Nkauj Ntsuag Falaus‎

1 Hnub xiab ib, lub kaum ob hlis, xyoo kaum ob, (יחוח)Yahweh hais lus tuaj rau kuv tias, 2 tibneeg tus tub, koj cia li tsa suab hu zaj nkauj ntsuag rau Falaus‎ vajntxwv Iziv, thiab hais rau nws tias, Koj xam pom tias koj yog ib tug tsov ntxhuav hauv nruab nrab ib tsoom tebchaws, tiamsis koj tsuas yog zoo li tus zaj hauv hiavtxwv, koj nplawm koj tej hav dej thiab xuas kotaw do dej ua rau lawv tej hav dej qias. 3 (יחוח)Yahweh hais li no tias, kuv yuav ntaus kuv lub vas khwb nkaus koj, yog ntau haiv neeg tej pab tub rog coob coob, mas lawv cov ntawd yuav rub kiag koj hauv kuv lub vas. 4 Kuv yuav muab koj pov rau hauv pem teb, kuv yuav muab koj laim rau saum nruab nqhuab, thiab kuv yuav ua rau tej nas noog saum nruab ntug huvsi ya los tsaws koj, thiab ua rau tej tsiaj txhu tag nrho hauv ntiajteb los noj koj kom tsau. 5 Kuv yuav muab koj cov nqaij laim rau saum tej roob, thiab ua rau koj lub cev tuag puv nkaus hauv tej hav. 6 Kuv yuav ua rau koj tej ntshav uas tabtom los ntub lub tebchaws mus txog tej roob, thiab koj cov tuag puv nkaus hauv tej hav. 7 Thaum kuv rhuav tshem koj, kuv yuav roos lub ntuj thiab ua rau tej hnub qub tsaus tag, kuv yuav muab huab los roos lub hnub, thiab lub hli yuav tsis ci lawm. 8 Txhua yam uas ci heev saum nruab ntug kuv yuav ua kom tsaus rau saum koj, thiab muab txojkev tsaus ntuj rau hauv koj lub tebchaws. (יחוח)Yahweh hais li no ntag.

9 Thaum kuv ua rau koj puam tsuaj rau hauv nruab nrab ib tsoom tebchaws, uas koj tsis tau paub dua, kuv yuav ua rau ntau haiv neeg ntxhov siab. 10 Thaum kuv rho kiag kuv rab ntaj tab meeg lawv, kuv yuav ua rau ntau haiv neeg poob siab nthav txog koj, thiab lawv tej vajntxwv yuav ntshai tshee hnyo vim yog koj. Hnub uas koj ntog tuag ntawd lawv yuav tshee hnyo txhua lub sijhawm, sawvdaws nyias txhawj txog nyias txojsia.

11 (יחוח)Yahweh hais li no tias, Tus vaj-ntxwv hauv Npanpiloo‎s rab ntaj yuav los raug koj. 12 Kuv yuav ua rau koj cov pejxeem coob coob raug cov tibneeg uas siab loj siab tuab tej hniav ntaj tuag tag, txhua tus yog cov uas ua nruj ua tsiv heev dhau ib tsoom tebchaws. Lawv yuav ua rau tej uas Iziv khav theeb txog ploj tag, thiab nws tej pejxeem uas coob coob yuav puam tsuaj. 13 Kuv yuav ua rau nws txhua tus tsiaj puam tsuaj ploj tag ntawm ntug dej, thiab yuav tsis muaj tibneeg txhais kotaw do tej dej ntawd dua li lawm, thiab tej tsiaj txhu tej tes taw yuav tsis do kom dej nro dua li lawm.

14 Mas kuv yuav ua rau tej dej ntawd ntshiab, thiab ua rau tej hav dej ntws nto ib yam li roj ntws. (יחוח)Yahweh hais li no ntag. 15 Thaum kuv ua rau Iziv tebchaws nyob do cuas cia, thiab thaum txhua yam uas muaj puv nkaus hauv lub tebchaws ntawd raug muab lws coj mus tag lawm, thiab thaum kuv tua tau tej tibneeg hauv lub tebchaws huvsi, mas lawv thiaj paub tias kuv yog (יחוח)Yahweh. 16 No yog zaj nkauj ua ntsuag uas yuav tsum hu, ib tsoom tebchaws tej ntxhais yuav hu zaj no, lawv yuav hu zaj nkauj ua ntsuag no rau Iziv thiab nws tej pejxeem coob coob. (יחוח)Yahweh hais li no ntag.

17 Hnub tim kaum tsib, lub ib hlis, xyoo kaum ob, (יחוח)Yahweh hais lus tuaj rau kuv tias, 18 Tibneeg tus tub, cia li quaj nyiav Iziv tej pejxeem coob coob, thiab xa lawv thiab tej tebchaws uas muaj hwjchim loj tej ntxhais nqes mus rau hauv nruab yeeb, yog mus txog cov uas twb mus rau hauv tub tuag teb lawm. 19 Qhov uas zoo nkauj koj zoo dhau leejtwg? Cia li nqes mus, muab tso nrog cov uas tsis ua kevcai txiav ua ke. 20 Cov Iziv yuav tuag tag rau hauv nruab nrab cov uas raug hniav ntaj tuag, muab teem sijhawm rau hniav ntaj lawm, cia li cab Iziv nrog nws cov pejxeem sawvdaws ua ke mus.

21 Cov thawj uas siab loj siab tuab thiab cov uas pab lawv yuav hais txog Iziv hauv nruab nrab tub tuag teb tuaj tias, lawv nqes los lawm, lawv xyab luas ntawm no, yog cov uas tsis ua kevcai txiav uas raug hniav ntaj tuag. 22 Axilias kuj nyob qhov ntawd thiab nws pab tub rog huvsi, lawv tej qhov ntxa nyob ib ncig nws, txhua tus raug tua tuag, yog raug hniav ntaj tuag. 23 Lawv tej qhov ntxa nyob hauv tub tuag teb qhov uas tob kawg nkaus, nws pab tub rog nyob ib ncig nws lub qhov ntxa. Txhua tus raug hniav ntaj tuag, lawv yog cov uas ua kom muaj kev ntshai heev ncha mus thoob rau cov uas muaj txojsia nyob hauv ntiajteb. 24 Tebchaws Elas kuj nyob qhov ntawd thiab nws tej pejxeem sawvdaws nyob puag ncig nws lub qhov ntxa. Txhua tus raug tua tuag, yog raug hniav ntaj tuag, lawv yog cov uas tsis ua kevcai txiav nqes mus rau hauv nruab yeeb. Lawv yog cov uas ua kom muaj kev ntshai heev ncha mus rau cov uas muaj txojsia nyob hauv ntiajteb, mas lawv nrog cov uas mus rau hauv tub tuag teb raug txaj muag ua ke. 25 Luag ua rau nws nrog nws cov pejxeem coob coob pw xyab luas hauv nruab nrab cov uas raug tua tuag. Lawv tej qhov ntxa nyob vij ib ncig nws, txhua tus tsis ua kevcai txiav thiab raug hniav ntaj tuag. Qhov uas ntshai lawv ntawd ntshai mus thoob plaws cov uas muaj txojsia nyob hauv ntiajteb, mas lawv nrog cov uas mus rau hauv tub tuag teb raug txaj muag ua ke, lawv raug muab tso hauv nruab nrab cov uas raug tua tuag. 26 Tebchaws Mese thiab Thunpas kuj nyob qhov ntawd thiab lawv tej pejxeem sawvdaws tej qhov ntxa kuj nyob ib ncig, txhua tus tsis ua kevcai txiav thiab raug hniav ntaj tuag, vim lawv ua kom muaj kev ntshai heev ncha mus rau cov uas muaj txojsia nyob hauv ntiajteb. 27 Lawv tsis tau nrog cov uas muaj siab loj siab tuab uas tsis ua kevcai txiav pw xyab luas ua ke, yog cov uas tuav tej cuab yeej ua rog nqes mus rau hauv tub tuag teb, thiab muab ntaj coj los ua hauv ncoo rau, thiab muab lawv lub txim khwb rau saum lawv cov pob txha, vim cov uas muaj siab loj siab tuab ua rau cov uas muaj txojsia nyob hauv ntiajteb ntshai heev kawg li. 28 Yog li no Iziv koj yuav raug muab lov thiab yuav pw xyab luas nrog cov uas tsis ua kevcai txiav ua ke, yog cov uas raug hniav ntaj tuag. 29 Edoos kuj nyob qhov ntawd, yog nws cov vajntxwv thiab nws cov thawj sawvdaws. Txawm yog lawv muaj hwjchim loj, los lawv raug muab tso ua ke rau hauv nruab nrab cov uas raug ntaj tuag. Lawv xyab luas nrog cov uas tsis ua kevcai txiav uas nqes mus rau hauv tub tuag teb ua ke. 30 Cov thawj uas nyob sab ped sawvdaws kuj nyob qhov ntawd, thiab cov Xaidoos huvsi, yog cov uas raug txaj muag nrog cov uas raug tua tuag nqes mus ua ke, txawm yog lawv tau siv lawv lub hwjchim ua rau tibneeg ntshai heev. Lawv yog cov uas tsis ua kevcai txiav pw xyab luas nrog cov uas raug ntaj tua tuag ua ke, thiab lawv nrog cov uas nqes mus rau hauv tub tuag teb raug txaj muag. 31 (יחוח)Yahweh hais tias, thaum Falaus‎ pom tej no lawm, yuav nplij tau nws lub siab txog qhov uas nws tej pejxeem sawvdaws thiab nws tej tub rog huvsi raug ntaj tua tuag. 32 Vim kuv kom nws ua kom muaj kev ntshai heev ncha mus rau cov uas muaj txojsia nyob hauv ntiajteb, vim li no Falaus‎ thiab nws tej pejxeem sawvdaws yuav raug muab tso xyab luas hauv nruab nrab cov uas tsis ua kevcai txiav, nrog cov uas raug ntaj tua tuag ua ke. (יחוח)Yahweh hais li no ntag.