Iziv Zoo Li Tus Ntoo Ciab Uas Lov

1 Hnub xiab ib, lub peb hlis, xyoo kaum ib, (יחוח)Yahweh hais lus tuaj rau kuv tias. 2 Tibneeg tus tub, cia li hais rau vajntxwv Falaus‎ hauv Iziv thiab nws ib tsoom pejxeem coob coob tias, qhov uas koj ua loj heev ntawd koj zoo li leejtwg? 3 Sim xav saib, Axilias zoo yam nkaus li tus ntoo ciab hauv Lenpanoos muaj ceg zoo nkauj muaj nplooj ntxoov qas nyos lub ntsis siab kawg nkaus mus laum huab. 4 Muaj dej yug nws, thiab tej dej hauv av ua rau nws hlob siab siab, tej dej ntawd ntws vij ib ncig lub chaw uas nws cog, thiab ncau tawm los mus rau tej ntoo hauv hav zoov huvsi. 5 Nws thiaj siab heev dhau tej ntoo hauv hav zoov huvsi, ceg kuj nthuav dav thiab tej ceg kuj ntev, vim muaj dej ntau ua rau nws hlob zoo. 6 Tej nas noog saum nruab ntug huvsi los ua zes rau hauv nws tej ceg, tej tsiaj qus huvsi los xya menyuam rau hauv nws tej qab ceg, thiab txhua lub tebchaws uas loj kawg nyob hauv nws tus qab duab ntxoov ntxoo. 7 Nws zoo nkauj kawg vim nws loj kawg thiab nws tej ceg ntev, vim cag saib av mus txog dej ntau.

8 Cov ntoo ciab hauv (יחוח)Yahweh lub vaj twb zoo tsis cuag li nws, cov ntoo thuv twb zoo tsis cuag li nws tej ceg, cov faj khum yimhuab piv tsis tau rau nws tej ceg, tsis muaj ib tsob ntoo hauv (יחוח)Yahweh lub vaj zoo nkauj cuag li nws.

9 Kuv ua rau nws zoo nkauj nthuav ceg ntau heev, mas tej ntoo huvsi hauv Edees kuj khib nws, yog tej ntoo hauv (יחוח)Yahweh lub vaj. 10 Vim li no (יחוח)Yahweh hais li no tias, vim yog nws siab thiab tshoom nws lub ntsis siab mus rau hauv nruab nrab cov huab, thiab nws lub siab khav theeb vim yog nws siab, 11 kuv muab nws rau hauv tus thawj uas kav ib tsoom tebchaws txhais tes, mas tus ntawd rau txim rau nws npaum nkaus li nws tej kev ua phem tiag tiag li. Kuv twb muab nws laim pov tseg lawm. 12 Lwm haiv neeg, yog haiv neeg uas ua nruj ua tsiv heev dhau ib tsoom tebchaws, muab nws ntov pov tseg. Nws tej ceg poob rau saum tej roob thiab hauv tej hav huvsi, thiab nws tej ceg uas lov nyob rau txhua lub hav dej hauv lub tebchaws. Mas ib tsoom tibneeg hauv qab ntuj tawm ntawm nws tus duab ntxoov ntxoo mus tso nws tseg. 13 Tej nas noog saum nruab ntug huvsi los nyob saum nws tej ceg uas lov tag, thiab tej tsiaj qus huvsi los nyob saum nws tej ceg ntawd. 14 Qhov uas ua li no kuj yog ua rau tej ntoo uas nyob ntawm ntug dej tsis txhob muaj ib tug tuaj siab heev thiab tshoom nws lub ntsis siab mus rau hauv nruab nrab cov huab, thiab thiaj tsis muaj ib tug ntoo rub dej loj siab ib yam li ntawd. Rau qhov lawv sawvdaws yuav raug muab rau hauv txojkev tuag, yog muab cob rau hauv nruab yeeb nrog cov tibneeg ua ke, yog cov uas mus rau hauv tub tuag teb lawd.

15 (יחוח)Yahweh hais li no tias, thaum tus ntoo ntawd mus rau hauv tub tuag teb lawm, kuv ua rau dej hauv av laum nkaus nws thiab quaj ntsuag nws, tauv nws tej dej tsis pub ntws, mas tej dej ntau ntau tu nrho. Vim nws raug li no kuv muab txojkev tsaus ntuj looj nkaus Lenpanoos thiab txhua tsob ntoo hauv hav zoov qhuav tag. 16 Kuv yuav ua ib tsoom tebchaws ntseeg nkaws rau lub suab uas nws vau, yog thaum kuv muab nws laim rau hauv tub tuag teb ua ke nrog cov uas twb mus rau hauv tub tuag teb lawm. Mas tej tsob ntoo hauv Edees huvsi thiab tej ntoo uas zoo tshaj plaws thiab zoo kawg nkaus hauv Lenpanoos, txhua tsob ntoo uas rub dej, yuav tau txais kev nplij siab hauv nruab yeeb. 17 Cov uas nyob hauv ib tsoom tebchaws uas pab nws thiab nyob hauv nws tus qab duab ntxoov ntxoo nrog nws ua ke mus rau hauv tub tuag teb, mus rau cov uas raug ntaj tua. 18 Tej ntoo hauv Edees muaj tsob twg tau koob meej thiab tau ua loj cuag li koj? Koj yuav raug muab coj nrog tej ntoo hauv Edees ua ke mus rau hauv nruab yeeb, koj yuav pw hauv nruab nrab cov uas tsis ua kevcai txiav, ua ke nrog cov uas raug ntaj tua tuag. No yog Falaus‎ thiab nws tej pejxeem coob coob huvsi. (יחוח)Yahweh hais li no ntag.

​