Tej Lus Uas Hais Txog Lub Roob Xe-is hauv Edoos

1 (יחוח)Yahweh hais lus tuaj rau kuv tias, 2 tibneeg tus tub, cia li tsom ntsoov tawm tsam lub roob Xe-is thiab cev (יחוח)Yahweh lus tawm tsam nws, 3 thiab hais rau nws tias, (יחוח)Yahweh hais li no tias, lub roob Xe-is, saib maj, kuv tawm tsam koj, thiab kuv yuav tsa kiag kuv txhais tes tawm tsam koj, thiab kuv yuav ua rau koj raug muab tso tseg nyob do cuas cia.

4 Kuv yuav ua rau koj tej moos liamsim tag, mas koj yuav nyob do cuas cia, mas koj thiaj li paub tias kuv yog (יחוח)Yahweh.

5 Vim koj ua yeeb ncuab rau cov Ixayees thiab cib nyeej ib txwm los, thiab muab lawv cob rau hniav ntaj lub hwjchim rau thaum lawv raug vij sub vij sw, yog thaum lawv raug txim zaum kawg.

 6 Vim li no, (יחוח)Yahweh hais tias, kuv yeej muaj txojsia nyob, kuv yuav npaj koj cia raug txim los ntshav thiab ntshav yuav caum cuag koj. Vim koj tsis ntxub qhov uas ua rau tibneeg los ntshav, vim li no ntshav thiaj caum koj qab mus.

7 Kuv yuav ua rau lub roob Xe-is raug muab tso tseg nyob do cuas cia, thiab kuv yuav muab cov uas mus mus los los txiav tu nrho ntawm nws.

8 Kuv yuav ua kom saum koj tej roob muaj tibneeg raug tua tuag puv nkaus. Cov uas raug hniav ntaj tua tuag yuav ntog rau saum koj tej pov roob thiab hauv koj tej kwj ha thiab hauv koj tej hav dej huvsi.

9 Kuv yuav ua rau koj nyob do cuas cia mus ib txhis, thiab yuav tsis muaj tibneeg nyob hauv koj tej moos. Mas koj yuav paub tias kuv yog (יחוח)Yahweh.

10 Txawm yog (יחוח)Yahweh nyob qhov ntawd, los koj tseem hais tias, ob haiv neeg thiab ob lub tebchaws ntawd yuav ua kuv li, thiab peb yuav muab lawv los ua peb tug.

11 Vim li no, (יחוח)Yahweh thiaj hais tias, kuv yeej muaj txojsia nyob, kuv yuav ua rau koj raws li koj txojkev chim thiab raws li koj txojkev khib uas koj ua tshwm los vim yog koj ntxub lawv.

Thaum kuv txiav txim rau koj, kuv yuav qhia kuv rau lawv paub.

12 Mas koj yuav paub tias kuv uas yog (יחוח)Yahweh tau hnov koj tej lus phem huvsi uas koj hais saib tsis taus Ixayees tej roob hais tias, Lawv raug muab tso tseg nyob do cuas, lawv raug muab rau peb noj lawm.

13 Koj lub qhov ncauj khav theeb heev tawm tsam kuv, thiab hais tawm tsam kuv tsis txawj tag li. Kuv twb hnov lawm.

14 (יחוח)Yahweh hais li no tias, kuv yuav ua rau koj nyob do cuas cia, kom thoob ntiajteb thiaj xyiv fab.

15 Thaum cov Ixayees tej qub txeeg qub teg nyob do cuas cia koj zoo siab xyiv fab li cas, kuv yuav ua rau koj ib yam li ntawd. Lub roob Xe-is thiab tag nrho Edoos huvsi, nej yuav nyob do cuas cia. Mas lawv yuav paub tias kuv yog (יחוח)Yahweh.