Ixayees Yuav Rov Vam Meej

1 Tibneeg tus tub, koj cia li cev kuv tej lus rau Ixayees tej roob hais tias, Ixayees tej roob es, cia li mloog (יחוח)Yahweh tej lus. 2 (יחוח)Yahweh hais li no tias, vim koj cov yeeb ncuab hnyos koj hais tias, tej roob siab uas ib txwm muaj nyob poob ua peb tug lawm lauj. 3 Vim li no cia li cev (יחוח)Yahweh lus hais tias, (יחוח)Yahweh hais li no tias, vim yog lawv ua rau nej nyob do cuas cia thiab tsuam nej txhua fab, ua rau nej poob mus ua luag tej tebchaws teej tug, thiab nej tiag luag ncauj luag lo thiab raug ib tsoom tibneeg thuam luag saib tsis taus, 4 Ixayees tej roob es, vim li no, cia li mloog (יחוח)Yahweh tej lus.  (יחוח)Yahweh hais li no rau tej roob thiab tej pov roob, tej hav dej thiab tej kwj ha, thiab tej chaw uas raug muab tso tseg nyob do cuas cia thiab tej moos uas tsis muaj tibneeg nyob, yog tej chaw uas raug luag lws thiab raug ib tsoom tebchaws uas nyob ib ncig thuam luag. 5 Vim li no, (יחוח)Yahweh hais li no tias, kuv khib xeeb siab kub lug hais tej lus tawm tsam luag tej tebchaws, thiab tawm tsam Edoos huvsi, yog tus uas zoo siab xyiv fab kawg muab kuv lub tebchaws ua nws tug thiab saib tsis taus heev kawg, xwv nws thiaj tau lub tebchaws ntawd ua nws tug thiab lws tau huvsi mus.

6 Vim li no cia li cev lus hais txog Ixayees tebchaws thiab hais rau tej roob thiab tej pov roob, tej hav dej thiab tej kwj ha tias, (יחוח)Yahweh hais li no tias, Saib maj, kuv hais ntawm kuv txojkev khib xeeb thiab npau taws, vim nej raug ib tsoom tebchaws thuam thiab saib tsis taus. 7 Vim li no (יחוח)Yahweh thiaj hais tias, kuv cog lus ruaj khov tias tej tebchaws uas nyob ib ncig ntawm nej kuj yuav raug thuam thiab raug saib tsis taus.

8 Ixayees tej roob es, nej yuav ncau ceg nthuav thiab txi txiv rau kuv haiv neeg Ixayees, rau qhov tsis ntev lawv yuav tau rov los. 9 Saib maj, kuv tuaj nej tog, kuv yuav tig rov los rau ntawm nej, yuav muab nej laij thiab muab nej cog.

10 Thiab kuv yuav ua kom tibneeg huaj vam coob rau hauv nej, yog tag nrho cov Ixayees huvsi. Yuav muaj tibneeg nyob hauv tej moos, thiab tej chaw uas muab tso tseg nyob do cuas yuav raug tsim dua tshiab. 11 Kuv yuav ua kom tsiaj txhu thiab tibneeg huaj vam coob rau hauv nej, lawv yuav muaj menyuam huaj vam coob. Kuv yuav ua kom muaj tibneeg nyob hauv nej ib yam li yav thaum ub, thiab kuv yuav ua zoo rau nej ntau dua yav thaum ub. Mas nej thiaj yuav paub tias kuv yog (יחוח)Yahweh. 12 Kuv yuav pub kom muaj tibneeg taug kev saum nej, yog kuv haiv neeg Ixayees ntag, thiab lawv yuav tau nej ua lawv tug, thiab nej yuav ua lawv li qub txeeg qub teg, thiab nej yuav tsis rhuav tshem lawv tej menyuam dua li lawm. 13 (יחוח)Yahweh hais li no tias, vim yog luag tej hais rau nej tias, nej noj tibneeg, thiab nej rhuav tshem tej menyuam tawm hauv nej lub tebchaws mus, 14 vim li no, (יחוח)Yahweh hais tias, nej yuav tsis noj tibneeg thiab yuav tsis rhuav tshem tej menyuam tawm hauv nej lub tebchaws mus dua li lawm. 15 Kuv yuav tsis pub kom nej tau hnov ib tsoom tebchaws tej lus thuam luag dua li lawm, thiab nej yuav tsis txaj muag rau ib tsoom tibneeg dua li lawm, thiab nej yuav tsis ua rau nej lub tebchaws dawm li lawm. (יחוח)Yahweh hais li no ntag. 16 (יחוח)Yahweh hais lus tuaj rau kuv tias, 17 tibneeg tus tub, thaum cov Ixayees nyob hauv lawv lub tebchaws, lawv lub neej thiab tej uas lawv ua, qias puas tsuas lub tebchaws. Tej uas lawv ua, kuv saib mas qias tsis huv ib yam li tej pojniam uas tseem ua pojniam raws lub caij qias tsis huv. 18 Vim li no kuv thiaj nchuav kuv txojkev npau taws los vim yog tim tej ntshav uas lawv tua los rau hauv lub tebchaws, thiab tim tej dab mlom uas lawv ua qias puas tsuas lub tebchaws. 19 Kuv thiaj ua rau lawv khiav ri sua mus rau hauv ib tsoom tebchaws, thiab lawv raug muab ntiab mus rau luag tej tebchaws. Kuv txiav txim rau lawv raws li lawv lub neej thiab tej uas lawv ua. 20 Tiamsis thaum lawv mus rau hauv luag tej tebchaws, tsis hais lub tebchaws twg, lawv tau ua puas tsuas kuv lub npe uas dawb huv, rau qhov tej tibneeg pheej hais txog lawv tias, cov tibneeg no yog (יחוח)Yahweh haiv neeg lov? Txawm yog li ntawd los lawv raug tawm hauv nws lub tebchaws. 21 Tiamsis kuv txhawj txog kuv lub npe uas dawb huv, uas cov Ixayees muab ua qias puas tsuas rau hauv tej tebchaws uas lawv mus txog.

22 Vim li no, koj cia li hais rau cov Ixayees tias, (יחוח)Yahweh hais li no tias, cov Ixayees es, tej uas kuv tabtom yuav ua no tsis yog saib rau nej, tiamsis yog saib rau kuv lub npe uas dawb huv, uas nej tau muab ua puas tsuas rau hauv tej tebchaws uas nej mus txog ntawd. 23 Kuv yuav ua kuv lub npe loj kawg qhov uas dawb huv tshwm los, yog kuv lub npe uas raug muab ua qias puas tsuas rau hauv ib tsoom tebchaws, twb yog nej ua qias puas tsuas hauv lawv nruab nrab. Mas ib tsoom tebchaws yuav paub tias kuv yog (יחוח)Yahweh rau thaum kuv ua kuv txo jkev dawb huv tshwm rau hauv nej rau lawv pom. 24 Kuv yuav coj nej tawm hauv ib tsoom tebchaws thiab sau zog nej hauv txhua lub tebchaws los, thiab coj nej rov los rau hauv lub tebchaws uas yog nej li ntag. 25 Kuv yuav muab cov dej huv nchos rau nej, nej thiaj li huv ntawm qhov uas nej qias tsis huv, thiab kuv yuav ntxuav kom nej huv ntawm qhov uas nej pe hawm tej dab mlom huvsi. 26 Kuv yuav pub lub siab tshiab rau nej thiab pub Tus Ntsuj Plig Dawbhuv tshiab rau nej. Kuv yuav muab lub siab pob zeb rho hauv nej lub cev mus thiab muab lub siab nqaij rau nej. 27 Kuv yuav muab kuv Tus Ntsuj Plig Dawbhuv rau hauv nej, thiab kuv yuav ua kom nej ua raws li kuv tej kab ke thiab ua tib zoo coj raws li kuv tej kevcai. 28 Nej yuav tau nyob rau hauv lub tebchaws uas kuv muab pub rau nej tej poj koob yawm txwv. Nej yuav ua kuv haiv neeg, thiab kuv yuav ua nej Tus Tswv. 29 Kuv yuav cawm nej dim nej tej kev qias tsis huv. Kuv yuav hu kom muaj qoob loo nplua mias rau nej thiab tsis kheev nej raug kev tshaib nqhis dua li lawm. 30 Kuv yuav ua kom tej ntoo hauv teb txi txiv ntau thiab ua rau tej teb tau qoob loo nplua mias, kom nej thiaj tsis raug txaj muag rau ib tsoom tebchaws vim yog qhov uas muaj kev tshaib nqhis. 31 Nej yuav nco txog nej tej kev phem, thiab nco txog tej uas nej ua tsis zoo, mas nej yuav ntxub nej tus kheej vim yog nej tej kev txhaum thiab nej tej kev qias vuab tsuab.

32 (יחוח)Yahweh hais tias, qhov uas kuv yuav ua li ntawd tsis yog saib rau nej. Nej cia li paub tseeb qhov ntawd. Cov Ixayees es, nej cia li txaj muag thiab poob ntsej muag rau tej uas nej ua. 33 (יחוח)Yahweh hais li no tias, hnub uas kuv ntxuav nej kev txhaum ploj tag huvsi ntawd, kuv yuav ua kom muaj tibneeg nyob hauv tej moos, thiab tej chaw uas muab tso tseg nyob do cuas yuav muab tsim dua tshiab. 34 Thiab yuav laij tej teb uas muab tso tseg nyob do cuas, yuav tsis nyob do cuas rau txhua tus uas dua kev pom. 35 Luag yuav hais tias, lub tebchaws uas muab tso tseg no zoo yam nkaus li lub vaj Edees lawm, tej moos uas raug muab tso tseg nyob do cuas thiab pob tag, nimno muaj tibneeg nyob thiab muaj ntsa loog lawm. 36 Mas tej tebchaws uas tshuav nyob ib ncig nej yuav paub tias kuv uas yog  (יחוח)Yahweh tau tsim tej chaw uas pob tag no dua tshiab thiab cog qoob loo rau tej teb uas nyob do cuas dua tshiab. Kuv uas yog (יחוח)Yahweh tau hais cia li no lawm, thiab kuv yuav ua li ntawd.

37 (יחוח)Yahweh hais li no tias, kuv yuav kheev cov Ixayees thov kuv ua yam no, yog thov pub kom tibneeg huaj vam coob ib yam li yaj thiab tshis. 38 Tej pab yaj pab tshis uas siv ua kevcai tua xyeem, yog tej pab yaj pab tshis hauv Yeluxalees rau thaum ua kevcai raws sijhawm coob npaum li cas, mas tej moos uas raug muab tso tseg nyob do cuas yuav muaj tej pab tibneeg nyob coob puv nkaus ib yam li ntawd. Mas lawv yuav paub tias kuv yog (יחוח)Yahweh.