Tus Dej Uas Txhawv Hauv Lub Tuam Tsev Los

1 Mas nws coj kuv rov los rau ntawm lub qhov rooj tuam tsev, ua ciav muaj dej ntws tawm hauv lub qab taw rooj tuam tsev mus rau sab hnub tuaj, rau qhov lub tuam tsev tig rau sab hnub tuaj. Dej ntws hauv lub qab taw rooj sab nrad mus rau ntawm lub thaj sab nrad. 2 Nws coj kuv tawm mus lub qhov rooj sab ped, nws coj kuv mus sab nraud mus txog lub rooj loog sab nraud uas tig rau sab hnub tuaj, mas dej ntws ntawm rooj loog sab nrad mus. 3 Tus txivneej ntawd mus rau sab hnub tuaj thiab tuav ib txoj hlua ntsuas hauv nws txhais tes. Nws ntsuas tau ib txhiab tshim thiab coj kuv hla dej mus, mas dej tob txij cos taw. 4 Nws rov ntsuas tau dua ib txhiab tshim. Nws coj kuv hla dej mus mas dej tob txij hauv caug. Nws rov ntsuas tau dua ib txhiab tshim. Nws coj kuv hla dej mus, mas dej tob txij duav. 5 Nws rov ntsuas tau dua ib txhiab tshim, mas ua ib tug niag dej hlob kuv hla tsis tau lawm, rau qhov dej hlob, tob heev txaus ua luam dej lawm, yog ib tug dej hlob hla tsis tau lawm. 6 Mas nws hais rau kuv tias, tibneeg tus tub, koj pom tej no lov? Ces nws txawm coj kuv rov qab taug ntug dej los.

7 Thaum kuv rov qab los, kuv pom muaj ntoo ntau kawg ntawm ob sab ntug dej. 8 Mas nws hais rau kuv tias, tus dej no ntws ncaj mus rau sab hnub tuaj thiab ntws mus txog Alanpas. Thaum tus dej ntws rau hauv Hiavtxwv Tuag mas tej dej hauv hiavtxwv cia li tsuag tsis daw ntsev lawm. 9 Tus dej ntawd ntws mus rau qhovtwg mas yuav muaj txhua yam tsiaj coob coob ciaj sia nyob ua ib pab ib pab, thiab yuav muaj ntses ntau kawg, rau qhov tus dej ntws mus txog qhovtwg, dej hiavtxwv kuj tsuag rau qhov ntawd, tus dej mus txog qhovtwg txhua yam tsiaj yuav ciaj sia nyob. 10 Cov uas muab ntses kuj yuav sawv ntsug ntawm ntug hiavtxwv. Txij ntawm lub moos Eekedi mus txog Ee‑ela‑is yuav ua chaw ziab vas. Tej ntses ntawd yuav muaj ntau yam, ib yam nkaus tej ntses hauv Hiavtxwv Loj. 11 Tej qhov uas ua pas dej teev pas dej tuag dej yuav tsis tsuag, yuav tseg cia ua ntsev. 12 Raws ob sab ntug dej yuav muaj txhua yam ntoo uas noj tau. Tej nplooj yuav tsis tuag tshav, thiab tej txiv yuav tsis txawj dua taw, yuav txi txiv tshiab txhua lub hlis vim yog tus dej uas yug tej txiv ntoo ntawd ntws tawm hauv lub chaw pe hawm (יחוח)Yahweh los. Tej txiv ntoo ntawd noj tau, tej nplooj kuj yog tshuaj kho mob.

Tej Ciam Tebchaws

13 (יחוח)Yahweh hais li no tias, no yog tej ciam teb uas nej yuav faib tebchaws ua qub txeeg qub teg rau kaum ob xeem Ixayees. Xeem Yauxej(Yahseph) yuav tau ob feem. 14 Nej yuav faib sib npaug zos. Kuv cog lus tias kuv yuav muab rau nej tej poj koob yawm txwv thiab lub tebchaws no yuav poob rau nej ua nej qub txeeg qub teg. 15 No yog tej ciam teb hauv lub tebchaws no. Sab ped mas txij ntua Hiavtxwv Loj mus txog lub moos Heloos mus txog txojkev uas mus rau lub moos Hamas, thiab mus txog lub moos Xedas, 16 lub moos Npelauthas, lub moos Xila‑is uas nyob ntawm lub nroog Damaxakas thiab Hamas ciam teb, mus txog lub moos Haxawhathi-khoos uas nyob ntawm Haulas tebchaws ciam teb.

17 Yog li no tus ciam teb yuav txij ntua hiavtxwv mus txog lub moos Haxa‑enoos uas nyob ntawm Damaxaka ciam teb sab ped, thiab sab ped yog npuas lub moos Hamas ciam teb. No yog ciam teb sab ped. 18 Ciam teb sab hnub tuaj txij ntua lub moos Haxa‑enoos thiab mus rau nram Damaxakas thiab tebchaws Haulas ntu nruab nrab, raws tus dej Yaladees uas quas Kile‑as tebchaws thiab Ixayees tebchaws mus txog hiavtxwv sab hnub tuaj mus txog lub moos Thamas. No yog ciam teb sab hnub tuaj. 19 Ciam teb sab nrad txij ntua lub moos Thamas mus txog lub pas dej Melinpas Khades, thiab raws tus dej Iziv mus txog Hiavtxwv Loj. No yog ciam teb sab nrad. 20 Sab hnub poob mas Hiavtxwv Loj yog ciam teb mus txog ped uas ncaj txojkev mus rau lub moos Hamas. No yog ciam teb sab hnub poob. 21 Yog li no nej yuav faib lub tebchaws rau nej txhua xeem Ixayees. 22 Nej yuav faib lub tebchaws ua qub txeeg qub teg rau nej thiab rau lwm haiv neeg uas nrog nej nyob thiab yug menyuam rau hauv nej lawm. Nej yuav suav tias, lawv yog tibneeg Ixayees, lawv yuav nrog nej xeem Ixayees muaj feem tau lub tebchaws ua qub txeeg qub teg. 23 Lwm haiv neeg yuav nrog xeem twg nyob kuj tau, nej cia li faib teb ua qub txeeg qub teg rau nws qhov ntawd. (יחוח)Yahweh hais li no ntag.

​