Faib Teb Rau Kaum Ob Xeem Ixayees

1 Ntawm no mus yog txhua xeem lub npe. Pib ntawm ciam teb sab ped, txij ntua hiavtxwv txog lub moos Heloos mus txog txojkev uas mus rau lub moos Hamas, mus txog ntua Haxa‑enoos uas nyob ntawm Dama-xakas ciam teb sab ped uas npuas tebchaws Hamas, mas tu ib ntsug txij ntua sab hnub tuaj mus txog sab hnub poob rau xeem Daj, 2 tu ib ntsug npuas xeem Daj txij sab hnub tuaj mus txog sab hnub poob rau xeem Asaws, 3 tu ib ntsug npuas xeem Asaws txij sab hnub tuaj mus txog sab hnub poob rau xeem Nathalis, 4 tu ib ntsug npuas xeem Nathalis txij sab hnub tuaj mus txog sab hnub poob rau xeem Manaxes, 5 tu ib ntsug npuas xeem Manaxes txij sab hnub tuaj mus txog sab hnub poob rau xeem Efas‑is, 6 tu ib ntsug npuas xeem Efas‑is txij sab hnub tuaj mus txog sab hnub poob rau xeem Lunpees, 7 tu ib ntsug npuas xeem Lunpees txij sab hnub tuaj mus txog sab hnub poob rau xeem Yahdah.

8 Tu ib ntsug npuas xeem Yahdah txij sab hnub tuaj mus txog sab hnub poob, cia nyob rau ib cag, dav ob vam tsib txhiab tshim, qhov ntev mas npaum li lwm xeem li txij sab hnub tuaj mus txog sab hnub poob, mas qhov chaw uas pe hawm (יחוח)Yahweh yuav nyob hauv nruab nrab tebchaws ntawd. 9 Thaj uas nej yuav muab rho pub rau (יחוח)Yahweh mas ntev ob vam tsib txhiab tshim, dav ob vam tshim. 10 Thaj uas dawb huv yuav faib li no. Cov pov thawj yuav tau ib thaj uas sab ped ntev ob vam tsib txhiab tshim, sab hnub poob dav ib vam tshim, sab hnub tuaj dav ib vam tshim, sab nrad ntev ob vam tsib txhiab tshim, mas lub chaw pe hawm (יחוח)Yahweh nyob hauv nruab nrab. 11 Thaj no yog muab rau cov pov thawj uas tu kom lawv dawb huv, yog Xadaus caj ces, yog cov uas tseem ua raws li tej kevcai uas kuv hais cia thiab tsis yuam kev rau thaum cov Ixayees yuam kev ntawm kuv lawm ib yam li cov Levis yuam kev. 12 Thaj no yuav ua lawv tug, yog ib feem tseem ceeb hauv thaj uas dawb huv rau hauv lub tebchaws, yog lub chaw dawb huv kawg nkaus, mas nyob npuas cov Levis thaj. 13 Cov Levis yuav tau thaj uas npuas cov pov thawj ntawd, yog ntev ob vam tsib txhiab tshim, dav ib vam tshim. Qhov ntev huvsi yog ob vam tsib txhiab tshim, qhov dav ob vam tshim.

14 Lawv tsis txhob muab muag lossis muab pauv ib qho kiag li. Lawv tsis txhob cia lwm tus tau thaj av zoo no kiag li, rau qhov yog thaj uas dawb huv rau (יחוח)Yahweh.

15 Thaj uas tseem tshuav ntawd, yog dav tsib txhiab tshim, ntev ob vam tsib txhiab tshim, yuav muab rau lub nroog siv ua vaj ua tsev thiab ua tshav zaub. Lub nroog yuav nyob hauv nruab nrab thaj ntawd. 16 No yog lub nroog qhov uas ntev thiab dav li cas. Sab ped yog plaub txhiab tsib puas tshim, sab nrad yog plaub txhiab tsib puas tshim, sab hnub tuaj yog plaub txhiab tsib puas tshim, thiab sab hnub poob kuj yog plaub txhiab tsib puas tshim. 17 Ib ncig nraum lub nroog yuav tseg muaj tshav zaub, sab ped ob puas tsib caug tshim, sab nrad ob puas tsib caug tshim, sab hnub tuaj ob puas tsib caug tshim, thiab sab hnub poob ob puas tsib caug tshim. 18 Thaj uas tseem tshuav npuas ntawm thaj chaw uas dawb huv, sab hnub tuaj ntev ib vam tshim sab hnub poob ntev ib vam tshim, nyob npuas thaj chaw uas dawb huv. Tej qoob loo uas tau hauv thaj teb no yuav muab rau cov uas ua haujlwm hauv lub nroog noj. 19 Cov tibneeg uas ua haujlwm hauv lub nroog uas tuaj hauv txhua xeem Ixayees yuav tsum ua thaj teb no. 20 Tag nrho thaj uas nej muab rho faib ntawd yog ib sab ob vam tsib txhiab tshim xwm fab xwm meem, yeej yog thaj uas dawb huv thiab thaj uas yog lub nroog li ua ke. 21 Ob thaj uas tseem tshuav nyob ob sab ntawm thaj uas dawb huv thiab thaj uas yog lub nroog li yuav muab ua tus thawj li feem. Txij ntawm thaj uas dawb huv uas muaj ob vam tsib txhiab tshim mus txog tus ciam teb sab hnub tuaj thiab txij ntua thaj uas dawb huv uas muaj ob vam tsib txhiab tshim mus txog tus ciam teb sab hnub poob, uas npuas lwm xeem li rau ob sab, yog tus thawj li feem. Thaj uas dawb huv thiab lub tuam tsev uas pe hawm -(יחוח)Yahweh nyob hauv nruab nrab. 22 Cov Levis thaj thiab thaj uas yog lub nroog li yuav nyob hauv nruab nrab thaj uas yog tus thawj li. Tus thawj thaj nyob hauv xeem Yahdah thiab xeem Npeeyamees ntu nruab nrab. 23 Xeem uas tseem tshuav yuav tu ib ntsug txij ntua sab hnub tuaj mus txog sab hnub poob rau xeem Npeeyamees, 24 tu ib ntsug npuas xeem Npeeyamees txij sab hnub tuaj mus txog sab hnub poob rau xeem Xime-oos, 25 tu ib ntsug npuas xeem Xime-oos txij sab hnub tuaj mus txog sab hnub poob rau xeem Ixakhas, 26 tu ib ntsug npuas xeem Ixakhas txij sab hnub tuaj mus txog sab hnub poob rau xeem Xenpuloos, 27 tu ib ntsug npuas xeem Xenpuloos txij sab hnub tuaj mus txog sab hnub poob rau xeem Kas. 28 Kas ciam teb sab nrad yog txij ntua lub moos Thamas mus txog lub pas dej Melinpas Khades, thiab raws tus dej Iziv mus txog Hiavtxwv Loj. 29 No yog lub tebchaws uas nej yuav muab faib ua qub txeeg qub teg rau txhua xeem Ixayees, thiab lawv nyias muaj nyias feem raws li hais no. (יחוח)Yahweh hais li no ntag.

Lub Nroog Tej Rooj Loog

30 No yog tej ncauj kev tawm hauv lub nroog. Sab ped uas ntsuas tau plaub txhiab tsib puas tshim 31 muaj peb lub rooj loog tis npe hu li no, yog rooj loog Lunpees, rooj loog Yahdah thiab rooj loog Levis, tej rooj loog puag ncig lub nroog ntawd tis npe raws li cov xeem Ixayees. 32 Sab hnub tuaj uas ntsuas tau plaub txhiab tsib puas tshim muaj peb lub rooj loog, yog rooj loog Yauxej, rooj loog Npeeyamees thiab rooj loog Daj. 33 Sab nrad uas ntsuas tau plaub txhiab tsib puas tshim muaj peb lub rooj loog, yog rooj loog Xime-oos, rooj loog Ixakhas thiab rooj loog Xenpuloos. 34 Sab hnub poob uas ntsuas tau plaub txhiab tsib puas tshim muaj peb lub rooj loog, yog rooj loog Kas, rooj loog Asaws thiab rooj loog Nathalis. 35 Ntsuas puag ncig lub nroog ntawd los cob nkaus mas muaj ib vam yim txhiab tshim. Txij no mus lub nroog yuav muaj npe hu ua (יחוח)Yahweh nyob qhov ntawd.  

​