Daniyl Raug Coj Mus Rau Npanpiloos Tebchaws

1 Xyoo peb uas Yehauyakhis ua vajntxwv kav Yahdah tebchaws, vajntxwv Nenpukhanexas hauv Npanpiloos tuaj vij ntaus lub nroog Yeluxalees. 2 Mas (יחוח)Yahweh muab Yahdah tus vajntxwv Yehauyakhis thiab tej twj siv hauv (יחוח)Yahweh lub tuam tsev qee yam cob rau hauv Nenpukhanexas txhais tes, ces nws txawm coj tej ntawd los rau hauv Sinas tebchaws muab cia rau hauv nws tus dab lub txhab nyiaj. 3 Vajntxwv txawm hais rau Apenas uas yog nws tus thawj nraug sam kom coj cov Ixayees qee leej, yog tej noob vajntxwv thiab cov uas ua hlob los, 4 yog cov hluas uas tsis muaj chaw thuam, zoo nraug ntxiag thiab muaj tswvyim, txawj paub thiab txawj nkag siab txhua yam uas muaj peevxwm ua tau haujlwm hauv vajntxwv lub tsev, mas nws yuav tsum qhia lawv paub cov Kheedias li ntawv thiab paub lus. 5 Vajntxwv niaj hnub kom muab cov zaub mov zoo zoo uas vajntxwv noj thiab tej cawv txiv hmab uas nws haus rau lawv raws li uas teem tseg. Nws kom lawv kawm txuj ci tau peb xyoos, mas thaum puv sijhawm lawd, lawv yuav tsum ua vajntxwv li haujlwm. 6 Hauv lawv cov ntawd muaj Daniyl, Hananiyas, Misa-ees thiab Axaliyas uas yog xeem Yahdah.

7 Tus thawj nraug sam tis dua npe tshiab rau lawv. Daniyl mas hu ua Npeethesaxa‎s, Hananiyas hu ua Salab, Misa-ees hu ua Mesa‎s, thiab Axaliyas hu ua Anpenekau‎s. 8 Daniyl txiav txim siab tias nws yuav tsis cia vajntxwv tej zaub mov zoo thiab tej cawv txiv hmab uas vajntxwv haus ua rau nws lub cev qias puas tsuas. Vim li ntawd nws thiaj thov tus thawj nraug sam kom yeem tsis txhob cia Daniyl ua rau nws qias puas tsuas.

9 (יחוח)Yahweh kuj ua rau tus thawj nraug sam hlub thiab khuvleej Daniyl.

10 Tus thawj nraug sam thiaj hais rau Daniyl tias, ntshai tsam vajntxwv uas yog kuv Tus Tswv uas tu tej zaub mov thiab cawv rau nej, pom tias nej lub cev tsis puv li cov hluas uas hnub nyoog nrog nej ib phaum. Ces nej kuj yuav ua rau vajntxwv muab kuv lub taubhau txiav pov tseg. 11 Mas Daniyl thiaj hais rau tus thawj nraug sam tsa los saib xyuas Daniyl, Hananiyas, Misa-ees thiab Axaliyas tias, 12 thov koj sim peb uas yog koj cov tub qhe kaum hnub. Cia li muab zaub thiab dej rau peb noj thiab haus xwb, 13 es koj li tshuaj saib peb lub cev piv rau cov hluas uas noj vajntxwv tej zaub mov zoo ntawd, mas ua rau peb uas yog koj cov tub qhe raws li koj pom tias peb zoo li cas lawm. 14 Tus uas saib xyuas lawv kuj yeem ua raws li lawv hais ntawd thiab sim lawv kaum hnub. 15 Thaum puv kaum hnub lawd, thiaj pom tias lawv lub cev zoo dua thiab puv dua txhua tus hluas uas noj vajntxwv tej zaub mov zoo.

16 Tus uas saib xyuas lawv thiaj rho tej zaub mov zoo thiab tej cawv uas tu rau lawv haus mus lawm, muab zaub rau lawv noj xwb.

17 Plaub tug hluas ntawd, mas (יחוח)Yahweh pub kev txawj ntse rau lawv thiab pub kom lawv txawj ntaub txawj ntawv thiab paub txhua yam tswvyim. Thiab Daniyl kuj nkag siab tej uas ua yog toog thiab ua npau suav txhua yam.

18 Thaum tag sijhawm uas vajntxwv teem cia kom coj lawv tuaj cuag nws, tus thawj nraug sam thiaj coj lawv los rau ntawm Nenpukhanexas lub xubntiag.

19 Vajntxwv thiaj li nrog lawv tham, mas tag nrho lawv sawvdaws tsis pom muaj ib tug uas zoo cuag li Daniyl, Hananiyas, Misa-ees thiab Axaliyas. Lawv thiaj tau ua vajntxwv li haujlwm. 20 Tsis hais txhua yam kev tswvyim thiab kev txawj ntse uas vajntxwv nug lawv mas nws pom tias lawv zoo dua tej txiv neeb txiv yaig thiab tej uas txawj ua khaws koob uas nyob hauv nws lub tebchaws kaum npaug. 21 Daniyl kuj tau nyob li ntawd mus txog thawj xyoo uas Xailab ua vajntxwv.