Yahdah Yuav Puam Tsuaj

1 (יחוח)Yahweh hais rau kuv tias, txawm yog Mauxes thiab Xamuyees los sawv ntawm kuv lub xubntiag los kuv lub siab yuav tsis tig mus hlub cov tibneeg no. Cia li ntiab lawv tawm kom dhau ntawm kuv lub qhov muag mus, thiab tso lawv mus. 2 Mas thaum lawv nug koj tias, peb yuav mus rau qhovtwg?koj hais rau lawv tias, (יחוח)Yahweh hais li no tias, cov tibneeg uas twb npaj rau kev mob kis, cia li mus raug kev mob kis. Cov uas twb npaj rau hniav ntaj hniav riam, cia li mus raug hniav ntaj hniav riam, cov uas twb npaj rau kev tshaib kev nqhis, cia li mus raug kev tshaib kev nqhis, cov uas twb npaj rau luag ntes mus, cia li mus raug luag ntes.

3 (יחוח)Yahweh hais tias, kuv yuav npaj plaub yam kev puam tsuaj los rau lawv, yog raug ntaj tua, raug dev tom dev dua, raug liaj dav saum nruab ntug thiab tej tsiaj qus hauv ntiajteb muab tom noj puam tsuaj tag. 4 Kuv yuav ua rau lawv ua lub chaw uas ib tsoom tebchaws hauv ntiajteb huvsi ceeb thiab ntshai vim tej uas Hexekhiya‎s tus tub Manaxe‎s uas yog Yahdah tus vajntxwv tau ua rau hauv Yeluxalees. 5 Yeluxalees es, leejtwg yuav khuvleej koj, leejtwg yuav mob siab koj, leejtwg yuav tig los xauj nug txog koj kev noj qab nyob zoo?

6 (יחוח)Yahweh hais tias, koj tsis lees yuav kuv, koj pheej thim rov qab. Kuv thiaj tsa tes tawm tsam koj thiab ua rau koj puam tsuaj. Kuv dhuav qhov uas zam koj lawm. 7 Kuv twb xuas ntxuam ntxuaj lawv siv duav suam yawm ntov kom cua ntsawj cov npluag ya lawv ntawm tej rooj loog hauv lub tebchaws no Kuv ua rau lawv tej menyuam tuag, kuv muab kuv haiv neeg ua kom puam tsuaj. Lawv tsis tig ntawm lawv tej kev phem rov los. 8 Kuv ua rau lawv cov poj ntsuam coob dua tej xuab zeb ntawm hiavtxwv. Thaum tav su kuv coj tus uas ua kom puam tsuaj tuaj txog cov tub hluas leej niam. Ib pliag ntshis xwb kuv ua kom kev lwj siab kev txhawj kev ntshai poob rau saum lawv. 9 Tus uas muaj xya tus menyuam nws kuj qaug zog tag, feeb hlo lawm. Nws lub hnub poob qho thaum tseem nruab hnub. Nws raug kev txaj muag thiab raug rhuav ntsej muag. Kuv yuav muab cov uas tseem tshuav nyob cob rau hniav ntaj hniav riam tab meeg lawv cov yeeb ncuab. (יחוח)Yahweh hais li no ntag. 10 Kuv niam, qhov uas koj yug kuv ua rau kuv txom nyem lauj. Kuv yog tus uas xeeb kom muaj kev sib cav sib faib thoob tebchaws. Kuv tsis tau qev rau luag thiab kuv tsis tau qev luag li, los lawv sawvdaws tsawm foom kuv.

11 (יחוח)Yahweh hais tias, kuv yeej yuav pab koj dim kom noj qab nyob zoo, kuv yeej yuav ua rau koj cov yeeb ncuab taij thov koj rau thaum lawv raug kev txom nyem thiab kev nyuaj siab. 12 Muaj leejtwg lov tau hlau, yog tej hlau uas tuaj sab ped tuaj, thiab lov tau tooj liab? 13 Nej tej nyiaj txiag cuab txhiaj cuab tam kuv yuav pub rau luag txeeb tau tsis yuav nqe, vim nej tej kev txhaum txim huvsi uas muaj thoob plaws hauv nej lub tebchaws. 14 Kuv yuav ua rau nej mus ua nej cov yeeb ncuab qhev rau hauv lub tebchaws uas nej tsis tau paub dua li, vim yog kuv chim kuv thiaj zes taws kom kub mus ib txhis li.

15 Au (יחוח)Yahweh, koj yeej paub, thov koj nco txog kuv thiab los xyuas kuv. Thov koj pab kuv thiab ua pauj rau cov uas tsim txom kuv. Vim yog koj ua tau lub siab ntev, mas thov tsis txhob muab kuv coj mus. Thov nco txog qhov uas kuv raug luag thuam vim yog saib rau koj. 16 Thaum uas ntsib koj tej lus lawm kuv cia li muab noj kiag, mas koj tej lus ua rau kuv zoo siab xyiv fab thiab yog tej uas kuv lub siab nyiam kawg li. Au (יחוח)Yahweh uas muaj hwjchim loj kawg nkaus, kuv raug hu raws li koj lub npe. 17 Kuv tsis nrog cov tibneeg uas ua lomzem zaum ua ke thiab kuv tsis nrog lawv zoo siab. Kuv nyob tib leeg xwb, vim yog koj txhais tes nyob saum kuv, thiab vim koj muab txojkev chim ntim puv nkaus rau hauv kuv. 18 Ua li cas kuv tej kev mob tseem mob tsis tu ncua li, kuv li kiav txhab kuj kho tsis tau zoo, nws tsis yeem zoo? Koj yuav zoo li lub hav dej uas dag kuv, zoo yam li lub hav dej qhuav lov?

19 Vim li no (יחוח)Yahweh hais li no tias, yog koj rov los, kuv yuav pub koj rov zoo li qub, thiab koj yuav tau sawv ntawm kuv lub xubntiag. Yog koj hais tej lus tseem ceeb tsis txhob hais tej lus tsis muaj qabhau, mas koj yuav zoo li kuv lub qhov ncauj. Lawv yuav tig rov los cuag koj, tiamsis koj tsis txhob tig mus cuag lawv.

20 Kuv yuav muab koj ua lub ntsa loog tooj liab uas ruaj khov rau haiv neeg no. Lawv yuav tawm tsam koj tiamsis lawv kov tsis yeej koj, vim yog kuv nrog koj nyob kom thiaj pab koj dim thiab cawm koj. (יחוח)Yahweh hais li no ntag.

21 Kuv yuav cawm koj dim hauv cov tibneeg limhiam txhais tes thiab txhiv koj hauv cov tibneeg ua nruj ua tsiv txhais tes.