Ntuj Qhua Teb Nkig

1 No yog tej lus uas (יחוח)Yahweh hais tuaj rau Yeremyah‎ txog qhov uas ntuj qhua teb nkig. 2 Yudas quaj ntsuag, nws tej rooj loog kuj qaug zog tag, nws cov tibneeg pw hauv av quaj lwj siab, thiab Yeluxalees lub suab quaj nrov mus. 3 Cov uas ua hlob txib lawv cov tub qhe mus nqa dej, cov tub qhe mus txog qhov dej mas tsis pom muaj dej, lawv nqa thoob qhuav rov qab los, lawv txaj muag thiab poob siab tag thiab kauv lawv lub taubhau. 4 Cov av qhuav tawg pleb vim tsis muaj nag los rau saum lub tebchaws, cov tibneeg ua teb kuj poob siab tag thiab kauv lawv lub taubhau.

5 Tus maum muas lwj uas nyob hauv hav zoov kuj tso nws tus menyuam tseg vim tsis muaj zaub. 6 Tej nees luav qus kuj sawv saum tej roob do hau, txog siav qhe yam li tej hma, qhov muag tsaus tag vim tsis muaj nroj tsuag noj. 7 Au (יחוח)Yahweh, txawm yog peb tej kev txhaum ua timkhawv kom peb, los thov koj saib rau koj lub npe es pab peb. Peb tej kev fav xeeb loj heev, peb tau ua txhaum muaj txim rau koj. 8 Au koj uas yog cov Ixayees lub chaw vam, thiab yog lawv tus cawmseej rau thaum lawv raug txom nyem ceeblaj, ua cas koj yuav zoo yam li tus qhua uas tuaj rau hauv lub tebchaws xwb, zoo yam li tus tibneeg uas taug kev tuaj pw ib hmos xwb? 9 Ua cas koj yuav zoo li ib tug tibneeg uas nyob hab nuv, lossis zoo li ib tug tibneeg uas muaj zog heev los pab tsis tau leejtwg? Au (יחוח)Yahweh, koj yeej nyob hauv peb nruab nrab thiab peb raug hu raws li koj lub npe, thov koj tsis txhob tso peb tseg. 10 (יחוח)Yahweh hais li no txog haiv neeg no tias, lawv nyiam mus rau ub rau no, lawv tsis tswj lawv txhais kotaw. Vim li no (יחוח)Yahweh thiaj tsis yuav lawv lawm, nimno nws yuav nco txog lawv tej kev txhaum thiab teem lawv lub txim.

11 (יחוח)Yahweh hais rau kuv tias, tsis txhob thov kev noj qab nyob zoo rau haiv neeg no. 12 Txawm yog lawv yoo mov los kuv yuav tsis mloog lawv lub suab thov. Txawm yog lawv ua kevcai hlawv xyeem thiab ua kevcai xyeem qoob loo los kuv yuav tsis txais. Kuv yuav xuas ntaj xuas kev tshaib nqhis thiab mob kis muab lawv ua puam tsuaj. 13 Mas kuv hais tias, Au (יחוח)Yahweh, cov xibhwb cev lus hais rau lawv tias, nej yuav tsis pom hniav ntaj hniav riam, yuav tsis raug kev tshaib nqhis, tiamsis kuv yuav pub nej nyob thaj yeeb ruaj khov hauv lub chaw no.

14 (יחוח)Yahweh hais rau kuv tias, cov xibhwb cev lus tuav kuv lub npe cev lus dag xwb. Kuv tsis tau txib lawv lossis nkaw lus rau lawv lossis hais rau lawv. Lawv hais tej yog toog dag thiab tej uas pom tom hauv ntej uas tsis muaj qabhau, thiab hais tej lus dag raws li lawv lub siab xav xwb. 15 Vim li no (יחוח)Yahweh thiaj hais txog cov xibhwb cev lus li no tias, kuv tsis tau txib lawv los lawv tseem tuav kuv lub npe cev lus hais tias, Hniav ntaj hniav riam kev tshaib nqhis yuav tsis los raug lub tebchaws no. Cov xibhwb cev lus ntawd yuav raug hniav ntaj hniav riam thiab kev tshaib nqhis muab ua puam tsuaj tag. 16 Thiab cov tibneeg uas mloog tej lus uas lawv cev ntawd yuav tuag rau hniav ntaj hniav riam thiab tuag tshaib tuag nqhis, thiab yuav raug muab pov tseg rau hauv tej kev hauv lub nroog Yeluxalees tsis muaj leejtwg muab lawv faus, tag nrho lawv thiab lawv tej pojniam, lawv tej tub tej ntxhais huvsi, rau qhov kuv yuav nchuav lawv tej kev limhiam los poob rov rau lawv. 17 Koj cia li hais tej lus no rau lawv, Thov cia kuv lub qhov muag muaj kua muag los nruab hnub hmo ntuj tsis tu li, rau qhov kuv haiv neeg tus ntxhais uas dawb huv raug ntaus to mob sab kawg. 18 Yog kuv tawm mus tom teb, los pom muaj tibneeg raug hniav ntaj hniav riam tua. Yog kuv nkag mus rau hauv lub nroog, los pom muaj mob muaj nkeeg vim yog tshaib nqhis. Tag nrho cov xibhwb uas cev lus thiab cov pov thawj ua lawv tej haujlwm thoob plaws hauv lub tebchaws, los lawv twb tsis paub abtsi li. 19 Koj tau muab Yahdah tso tseg tag huvsi lawm lov? Koj lub siab ntxub Xi‑oo heev lov? Ua cas koj nplawm peb tsis muaj kev kho kom peb zoo kiag li? Peb nrhiav kev thaj yeeb tiamsis tsis tau qhov zoo kiag li. Peb nrhiav sijhawm kho kom zoo tiamsis tsuas yog muaj kev txhawj ntshai xwb. 20 Au (יחוח)Yahweh, peb thov lees peb tej kev ua limhiam thiab lees tej kev txhaum uas peb tej poj koob yawm txwv ua, rau qhov peb tau ua txhaum muaj txim rau koj lawm. 21 Vim saib rau koj lub npe, thov tsis txhob fee plhu ntawm peb, thov tsis txhob ua rau koj lub zwm txwv uas ci ntsa iab poob koob meej. Thov koj nco txog thiab tsis txhob rhuav koj tej lus uas cog tseg rau peb. 22 Ib tsoom tebchaws tej dab mlom cuav muaj ib tug twg ua tau nag los? Lossis lub ntuj ua tau nag los thiab lov?

Au (יחוח)Yahweh uas yog peb Tus Tswv, tej no tsis yog koj ua lov? Peb vam khom koj xwb vim koj yog tus uas ua txhua yam no.