Txoj Siv Sia Uas Po

1 (יחוח)Yahweh hais li no rau kuv tias, cia li mus yuav ib txoj siv sia ntaub mag, thiab muab sia kiag ntawm koj lub duav, tsis txhob muab raus dej. 2 Kuv thiaj yuav ib txoj siv sia raws li (יחוח)Yahweh hais, thiab muab sia kuv lub duav. 3 Mas (יחוח)Yahweh hais dua zaum ob tuaj rau kuv tias, 4 Cia li coj txoj siv uas koj yuav los sia ntawm koj lub duav, es sawv tsees, mus rau ntawm niag dej Yufetis thiab muab txoj siv ntawd zais rau hauv ib kem zeb. 5 Kuv kuj mus thiab muab zais rau ntawm ntug dej Yufetis raws li (יחוח)Yahweh tau qhia rau kuv. 6 Dhau ntau hnub lawm, (יחוח)Yahweh hais rau kuv tias, cia li sawv tsees, mus rau ntawm tus dej Yufetis es muab txoj siv uas kuv kom koj muab zais rau ntawd coj los. 7 Ces kuv thiaj li mus rau ntawm tus dej Yufetis, mus khaws txoj siv sia hauv lub chaw uas kuv muab zais ntawd los. Ua ciav, txoj siv sia ntawd twb lwj tag siv tsis tau kiag li lawm.

8 Ces (יחוח)Yahweh thiaj hais tuaj rau kuv tias, 9 (יחוח)Yahweh hais li no tias, kuv yuav ua kom cov Yahdah txojkev khav theeb thiab Yeluxalees txojkev khav theeb heev kawg lwj tag ib yam li txoj siv ntawd. 10 Haiv neeg phem no uas tsis yeem mloog kuv tej lus thiab tawv ncauj ua raws li lawv lub siab thiab mus raws ncuj nciav ua koom pe hawm luag tej dab, yuav zoo li txoj siv sia no uas siv tsis tau kiag li lawm. 11 Rau qhov txoj siv sia ntawm tibneeg lub duav li cas, kuv kuj ua rau Ixayees caj ces thiab Yahdah caj ces sawvdaws npuab kuv ib yam li ntawd, kom lawv thiaj ua tau ib haiv neeg rau kuv thiab ua koob meej rau kuv thiab ua chaw uas luag qhuas kuv thiab ua meej mom rau kuv. Tiamsis lawv tsis yeem mloog. (יחוח)Yahweh hais li no ntag.

​

Hub Cawv Txiv Hmab

12 Koj cia li hais tej lus no rau lawv, (יחוח)Yahweh uas yog Ixayees Tus Tswv hais li no tias, txhua lub hub yuav tsum muaj cawv txiv hmab puv nkaus.

Mas lawv yuav hais rau koj tias, peb tsis paub tias txhua lub hub yuav tsum muaj cawv txiv hmab puv nkaus lov? 13 Mas koj yuav hais rau lawv tias, (יחוח)Yahweh hais li no tias, saib maj, kuv yuav ua rau cov tibneeg hauv lub tebchaws no txhua tus qaug cawv tag huvsi, tsis hais tej vajntxwv uas nyob saum Daviv lub zwm txwv, cov pov thawj, cov xibhwb cev (יחוח)Yahweh lus thiab cov tib-neeg hauv Yeluxalees txhua tus huvsi.

14 (יחוח)Yahweh hais tias, kuv yuav muab lawv laim ib tug tsoo ib tug, cov txiv yuav nraum cov tub. Kuv yuav tsis khuvleej lossis tseg lawv txojsia, kuv yuav tsis tab ncuab lawv li rau thaum kuv ua kom lawv puam tsuaj tag.

​

Yahdah Yuav Raug Ntes Coj Mus

15 Nej cia li mloog, cia li tig ntsej mloog, tsis txhob tsab ua loj, rau qhov (יחוח)Yahweh tau hais tseg cia lawm.

16 Cia li ua rau (יחוח)Yahweh uas yog nej Tus Tswv tau koob meej ua ntej uas nws yuav coj kev tsaus ntuj los, ua ntej uas nej txhais kotaw yuav dawm saum tej roob uas pom kev txoog, thiab thaum nej tabtom nrhiav txojkev kaj, nws muab ntxeev ua duab tsaus thiab muab ntxeev ua tsaus ntuj dub nciab heev. 17 Tiamsis yog nej tsis mloog, kuv lub siab yuav quaj twjywm vim nej txojkev khav theeb. Kuv lub qhov muag yuav quaj heev ua kua muag ntws nto ntawm lub plhu, vim yog (יחוח)Yahweh pab yaj raug ntes coj mus lawm. 18 Cia li hais rau vajntxwv thiab nws niam hais tias, cia li los nyob lub rooj qes, rau qhov koj lub mom vajntxwv uas zoo nkauj twb poob saum koj lub taubhau los lawm. 19 Tej moos hauv Neke‎s raug muab kaw lawm tsis muaj leejtwg qheb tau. Yahdah raug ntes coj mus poob tebchaws huvsi lawm, raug coj mus tag nrho huvsi lawm. 20 Cia li tsa koj lub qhov muag saib lawv cov uas tuaj sab ped tuaj. Pab yaj uas muab cob rau koj lawm nyob qhovtwg, yog pab yaj uas zoo zoo nkauj? 21 Thaum lawv tsa cov tibneeg uas koj tau qhia kom nrog koj sib raug zoo ua loj kav koj, koj yuav hais li cas? Tsis mob koj yam li tus pojniam mob plab yug menyuam lov? 22 Yog koj hais rau hauv koj lub siab tias, Ua cas tej no tshwm los raug kuv? Kuj yog tim koj tej kev phem uas loj kawg luag thiaj muab koj daim tiab yaws thiab yuam koj. 23 Tus tibneeg Khuj hloov tau nws daim tawv dub lossis tsov pom txwv hloov tau daim tawv txaij lov? Yog tau, mas nej cov uas pheej ua qhov phem yuav ua qhov zoo tau. 24 Kuv yuav ua rau nej tawg ua sab ua sua zoo yam nkaus li tej npluag qoob uas raug cua hauv ntuj nrag teb do ntsawj ya mus. 25 No yog koj li feem, yog tej uas kuv muab tu tseg rau koj lawm, rau qhov koj tsis nco qab kuv lawm thiab tso siab rau tej lus dag. (יחוח)Yahweh hais li no ntag. 26 Vim li no kuv yuav muab koj daim tiab yaws npog koj lub ntsej muag ua kom pom koj kev txaj muag. 27 Kuv twb pom koj tej kev qias vuab tsuab, qhov uas koj hee laws nrhiav ua nkauj ua nraug thiab qhov uas koj ua poj muag cev phem qias kawg li saum tej roob thiab nram tej tiaj. Yeluxalees es, koj yuav raug txom nyem lauj! Yuav ntev li cas koj thiaj ua tau dawb huv?