Yeremyah‎ Yws

1 Au (יחוח)Yahweh, thaum kuv nrog koj ua plaub koj yog tus uas ua raug cai. Txawm yog li ntawd los kuv tseem muab kuv zaj ua nug rau koj. Ua li cas cov tibneeg limhiam ho vam meej tuaj? Ua li cas cov tibneeg ntxeev ntxias ho tau zoo?

2 Koj cog lawv, lawv thiaj saib cag tob, lawv hlob zoo thiab txi txiv. Lawv lub qhov ncauj pheej hais txog koj tiamsis lawv lub siab nyob deb ntawm koj. 3 Au (יחוח)Yahweh, koj paub kuv, koj pom kuv thiab koj sim kuv lub siab saib kuv xav txog koj li cas. Thov muab lawv cais tawm yam li tej yaj uas yuav muab tua, thiab muab lawv tso rau ib cag tos hnub uas tua. 4 Lub tebchaws yuav quaj ntsuag mus ntev li cas thiab tej nyom hauv txhua daim teb yuav qhuav tag mus ntev li cas?

Vim cov uas nyob hauv lub tebchaws ntawd tej kev limhiam mas tej tsiaj txhu thiab tej nas noog thiaj yuav raug muab kuav hlo mus, vim lawv hais tias, (יחוח)Yahweh yuav tsis pom peb lub neej yav uas kawg.

​

(יחוח)Yahweh Teb Yeremyah‎

5 Yog koj nrog tibneeg sib tw khiav es lawv twb ua rau koj txog siav lawm, koj yuav ua li cas nrog nees sib tw khiav tau? Yog koj twb ntog rau hauv lub tebchaws uas nyob tso siab lug, koj yuav ua li cas nyob tau hauv tej hav zoov ntawm ntug dej Yaladee‎s? 6 Txawm yog koj tej kwvtij, uas yog koj txiv caj ces, los lawv kuj ntxeev ntxias koj. Lawv tseem qw nrov nrov caum koj. Txawm yog lawv hais lus zoo kawg rau koj, kuj tsis txhob ntseeg lawv. 7 Kuv tso kuv tsev neeg tseg, kuv muab kuv tej qub txeeg qub teg pov tseg, kuv muab cov uas kuv hlub zog hauv nruab siab tso rau hauv lawv cov yeeb ncuab txhais tes. 8 Kuv tej qub txeeg qub teg txia zoo li ib tug tsov ntxhuav tom hav zoov rau kuv, nws tsa suab nyooj laws rau kuv, vim li no kuv thiaj ntxub nws. 9 Kuv tej qub txeeg qub teg zoo yam li tus dav txho uas muaj tej dav nyob vij nws ntaus nws lov? Cia li mus hu tej tsiaj qus huvsi tuaj ua ke, coj tej tsiaj ntawd tuaj noj. 10 Cov uas yug yaj muaj ntau leej tau ua kom kuv lub vaj txiv hmab puam tsuaj tag. Lawv tau muab tej uas yog kuv li feem tsuj tag, lawv tau muab kuv li feem uas zoo nkauj ntxeev ua tebchaws moj sab qhua nyob do cuas cia. 11 Lawv muab kuv li feem ua nyob do cuas cia. Thaum nyob do cuas lawm kuj quaj ntsuag rau kuv, lub tebchaws huvsi kuj nyob do cuas cia, los tsis muaj leejtwg mob siab li. 12 Cov uas ua kom puam tsuaj twb tuaj txog saum tej roob do hau hauv ntuj nrag teb do, rau qhov (יחוח)Yahweh rab ntaj noj lub tebchaws tag ib sab mus thoob plaws rau ib sab. Tsis muaj ib tug tau nyob kaj siab li. 13 Kuv cov tibneeg cog mog, tiamsis tau hlais pos xwb, lawv ua khwv khwv txog siav tag tiamsis tsis tau abtsi li. Lawv yuav txaj muag rau tej uas lawv hlais lawv sau, yog tim qhov uas (יחוח)Yahweh chim heev rau lawv. 14 (יחוח)Yahweh hais li no tias, Hais txog tej tibneeg ua phem txhua tus uas nyob ib ncig kuv uas tau kov tej qub txeeg qub teg uas kuv twb muab rau kuv haiv neeg Ixayees ua lawv tug lawm. Saib maj, kuv yuav muab tej tibneeg ntawd dob hauv lawv lub tebchaws mus, thiab kuv yuav dob Yahdah caj ces hauv lawv nruab nrab cov ntawd mus. 15 Tom qab uas kuv muab lawv dob mus tag lawm, kuv yuav rov qab khuvleej lawv, thiab kuv yuav coj lawv nyias rov qab los nyob nyias tej qub txeeg qub teg thiab nyias nyob nyias lub tebchaws. 16 Thiab yuav muaj li no, yog lawv mob siab kawm kuv haiv neeg txojkev, uas yog tuav kuv lub npe cog lus twv hais tias, Muaj (יחוח)Yahweh uas muaj txojsia nyob pom, yam li lawv tau qhia rau kuv haiv neeg tuav dab Npa‑as lub npe cog lus twv, mas lawv yuav kheev hlob rau hauv nruab nrab kuv haiv neeg.

17 Tiamsis yog lub tebchaws twg tsis mloog, kuv yuav muab lawv dob kiag thiab muab ua kom puam tsuaj huvsi. (יחוח)Yahweh hais li no ntag.