(יחוח)Yahweh Tej Lus Cog Tseg

1 Tej lus uas (יחוח)Yahweh hais tuaj rau Yeremyah‎. 2 Koj cia li mloog tej lus cog tseg no thiab hais rau cov Yahdah thiab cov uas nyob hauv Yeluxalees. 3 Koj cia li hais rau lawv tias, (יחוח)Yahweh uas yog Ixayees Tus Tswv hais li no tias, tus uas tsis mloog tej lus cog tseg no yuav raug foom tsis zoo, 4 yog tej lus cog tseg uas kuv twb hais rau nej tej poj koob yawm txwv rau thaum kuv coj lawv tawm hauv Iziv tebchaws los, yog tawm hauv cub thee nchuav hlau los. Kuv hais tias, cia li mloog kuv lub suab thiab ua txhua yam uas kuv hais kom nej ua, nej thiaj ua tau kuv haiv neeg thiab kuv yuav ua nej Tus Tswv, 5 kom kuv thiaj ua tau tiav raws li tej lus uas kuv cog tseg khov kho rau nej tej poj koob yawm txwv tias yuav muab lub tebchaws uas muaj kua mis thiab zib ntab ntws nto rau lawv, yam li uas muaj niaj hnub nimno. Mas kuv thiaj teb tias, (יחוח)Yahweh cia ua li uas koj hais. 6 Mas (יחוח)Yahweh thiaj hais rau kuv tias, cia li tshaj tawm tej lus no huvsi rau hauv Yahdah tej moos thiab rau hauv Yeluxalees tej kev hais tias, cia li mloog tej lus cog tseg no thiab ua raws li ntawd. 7 Kuv twb ntuas nej tej poj koob yawm txwv rau thaum kuv coj lawv tawm hauv Iziv tebchaws los, kuv ntuas tsis tu ncua los txog niaj hnub nimno tias, cia li mloog kuv lub suab.

8 Txawm li ntawd los lawv tsis mloog lus tsis tig ntsej mloog, lawv txhua tus tawv ncauj ua raws li lawv lub siab phem nyiam. Tim li no kuv thiaj coj txhua yam raws li tej lus uas kuv kom lawv ua los lawv tsis ua, los poob rau saum lawv.

9 Thiab (יחוח)Yahweh hais rau kuv tias, cov Yahdah thiab cov uas nyob hauv Yeluxalees ntaus tswvyim fav xeeb. 10 Lawv twb thim rov qab mus ua lawv tej poj koob yawm txwv tej kev txhaum txim, yog cov uas tsis yeem mloog kuv tej lus. Lawv mus raws ncuj nciav luag tej dab thiab ua koom tu tej dab ntawd. Cov Ixayees thiab cov Yahdah twb rhuav tej lus cog tseg uas kuv cog rau lawv tej poj koob yawm txwv. 11 Vim li ntawd, (יחוח)Yahweh thiaj hais li no tias, saib maj, kuv yuav coj kev puam tsuaj los raug lawv, lawv yuav khiav tsis dim. Txawm yog lawv quaj thov kuv los kuv yuav tsis mloog lawv. 12 Mas tej moos hauv Yahdah thiab cov uas nyob hauv Yeluxalees yuav mus quaj thov tej dab uas lawv hlawv xyab teev, tiamsis thaum lawv raug kev txom nyem ceeblaj tej dab ntawd pab tsis tau lawv dim. 13 Yudas es, nej tej dab coob npaum li nej tej moos, thiab tej thaj uas nej txua teev tej dab phem qias mas ntau npaum li tej kev hauv Yeluxalees, yog tej thaj hlawv xyab rau dab Npa‑as. 14 Vim li no koj tsis txhob thov kuv pab haiv neeg no, lossis tsa suab hu thov pab lawv, rau qhov kuv yuav tsis mloog lawv tej lus thov rau thaum lawv raug kev txom nyem ceeblaj. 15 Tus uas kuv hlub thaum nws ua kev phem kev qias lawm muaj feem abtsi rau hauv kuv lub tuam tsev? Nws tej lus yeem tseg thiab tej tsiaj uas tua xyeem yuav tshem tau nws lub khuab lov? Yog zoo li no lawm nej tseem yuav xyiv fab thiab lov?

16 (יחוח)Yahweh twb txeev hu koj hais tias, tsob txiv ntoo aulib ntsuab tsaus nti uas txi txiv ncw, tiamsis nws yuav muab koj hlawv cig nrov voog yam li cua daj cua dub thiab tej ceg yuav kub hnyiab tag huvsi.

17 (יחוח)Yahweh tus muaj hwjchim loj kawg nkaus uas cog koj, tau hais tseg kom kev puam tsuaj yuav raug koj vim txhua yam kev phem uas cov Ixayees thiab cov Yahdah tau ua, yog qhov uas lawv hlawv xyab teev dab Npa‑as zes ua rau kuv chim.

Ntaus Tswvyim Txov Yeremyah‎

18 (יחוח)Yahweh qhia tej uas lawv ntaus tswvyim rau kuv, kuv thiaj paub, koj qhia lawv tej kev phem rau kuv. 19 Kuv zoo yam li tus menyuam yaj seej seej uas raug coj mus tua. Kuv tsis paub tias lawv ntaus tswvyim txov kuv ntag, lawv hais tias, cia peb muab tsob ntoo thiab tej txiv ua kom puam tsuaj, cia peb muab nws txiav tawm hauv cov tibneeg ciaj, kom thiaj tsis nco txog nws lub npe dua li lawm. 20 Au (יחוח)Yahweh uas muaj hwj-chim loj kawg nkaus, koj yog tus uas txiav txim ncaj ncees, koj yog tus uas tshuaj saib tibneeg lub siab thiab tej uas lawv xav. Thov cia kuv pom tej uas koj ua pauj rau lawv, rau qhov kuv twb muab kuv tshaj plaub cob rau koj lawm. 21 Vim li no, (יחוח)Yahweh hais txog cov tibneeg hauv Anathau‎s uas xav txov koj txojsia thiab hais tias, tsis txhob tuav (יחוח)Yahweh lub npe cev nws tej lus, yog koj tsis mloog, koj yuav tuag hauv peb tes. 22 Vim li no (יחוח)Yahweh uas muaj hwjchim loj kawg nkaus hais li no tias, saib maj, kuv yuav rau txim rau lawv, cov tub hluas yuav tuag hniav ntaj, lawv tej tub tej ntxhais yuav tuag tshaib tuag nqhis. 23 Yuav tsis tshuav ib tug li, rau qhov kuv yuav coj tej xwm txheej phem los rau cov tibneeg hauv Anathau‎s, yog xyoo uas rau txim rau lawv.