(יחוח)Yahweh Thiab Dab

1 Ib tsoom Ixayees es, cia li mloog tej lus uas (יחוח)Yahweh hais rau nej.

2 (יחוח)Yahweh hais li no tias, tsis txhob kawm raws kua ib tsoom tebchaws, tsis txhob poob siab nthav rau tej txujci uas tshwm saum nruab ntug txawm yog ib tsoom tebchaws poob siab los xij, 3 rau qhov ib tsoom tibneeg tej kab ke yog cuav xwb. Lawv txiav ib tug ntoo tom hav zoov los thiab tus Kws ntoo txhais tes xuas taus txua. 4 Luag muab nyiaj muab kub los luam rau, luag xuas rauj muab saib hlau saib kom ruaj tsis txhob ua zog. 5 Lawv tej dab mlom kuj tsuas zoo ib yam nkaus li tej moj zeej hem noog hauv daim teb dib xwb, tsis txawj hais lus, luag yuav muab kwv mus, rau qhov tsis txawj mus kev. Nej tsis txhob ntshai tej dab mlom ntawd rau qhov tsis txawj ua phem thiab tsis txawj ua zoo.

6 Au (יחוח)Yahweh, tsis muaj ib tug twg zoo cuag li koj, koj loj kawg nkaus thiab koj lub npe muaj hwjchim heev. 7 Ib tsoom tebchaws tus vajntxwv es, leejtwg tseem yuav tsis ntshai tsis hwm koj? Rau qhov koj yog tus uas tsim nyog peb hwm. Tej tibneeg txawj ntse hauv ib tsoom tebchaws thiab hauv tej tebchaws uas tej vajntxwv kav, tsis muaj ib tug zoo cuag li koj. 8 Lawv sawvdaws tsis thoob tsib thiab ruam, tej dab mlom ntawd yog ntoo xwb tsis txawj qhia lawv ib yam abtsi. 9 Luag thauj tej nyiaj uas ntaus tau lawm tuaj ntawm lub moos Thasi tuaj thiab coj kub ntawm lub moos Ufa tuaj. Tej dab mlom ntawd yog cov Kws txawj tes haujlwm thiab yog cov Kws txawj ntaus kub txhais tes ua. Tej ntaub uas muab kauv tej dab mlom ntawd yog ntaub xiav thiab ntaub tsamxem, yog cov Kws txawj ntos ntaub ua.

10 Tiamsis (יחוח)Yahweh yog Tus Tswv uas tseeb tiag, nws yog (יחוח)Yahweh uas muaj txojsia nyob thiab yog tus vajntxwv uas nyob mus ib txhis. Thaum nws npau taws lub ntiajteb ua zog kais, mas ib tsoom tebchaws thev tsis taus qhov uas nws chim. 11 Koj yuav hais li no rau lawv tias, tej dab uas tsis yog tus tsim lub ntuj thiab lub ntiajteb yuav puam tsuaj ploj tag hauv lub ntiajteb thiab hauv lub qab ntuj. 12 (יחוח)Yahweh yog tus uas siv nws lub hwjchim tsim lub ntiajteb, thiab siv nws lub tswvyim tsim tsa lub qab ntuj, thiab siv nws txojkev txawj ntse nthuav lub ntuj.

13 Thaum nws tsa nws lub suab hu, tej dej saum nruab ntug nrov vig voog, thiab nws ua huab sawv tim qab ntuj kawg tuaj. Nws ua xob laim rau thaum nag los thiab coj cua tawm hauv nws tej txhab cua los. 14 Txhua tus tibneeg tsis thoob tsib thiab tsis paub qabhau. Txhua tus Kws ntaus kub yuav txaj muag vim tej dab mlom uas nws ua, rau qhov nws tej dab mlom yog cuav thiab tsis txawj ua pa kiag li.

15 Tej dab mlom ntawd tsis muaj qabhau kiag li, yog tej uas ntxim thuam luag. Thaum txog sijhawm teem txim, tej ntawd yuav puam tsuaj. 16 Tus uas yog Yakhauj Tus Tswv tsis thooj li tej dab mlom ntawd, rau qhov nws yog tus uas tsim txhua yam, thiab haiv neeg Ixayees yog nws qub txeeg qub teg, nws lub npe hu ua (יחוח)Yahweh uas muaj hwjchim loj kawg nkaus.

​

Yahdah Poob Tebchaws

17 Nej cov uas raug luag muab vij tag lawm es, cia li khaws pes nkaus nej tej qhov txhia chaw hauv pem teb. 18 Rau qhov (יחוח)Yahweh hais li no tias, saib maj, kuv muab cov tibneeg hauv lub tebchaws no laim tawm mus tamsim no, thiab kuv yuav coj kev txom nyem nyuaj siab los rau lawv xwv lawv thiaj li xeev tau. 19 Kuv raug txom nyem lauj vim yog kuv txojkev mob! Kuv tej qhov txhab kuj mob heev kawg, tiamsis kuv hais tias, qhov tseeb tej no yog kuv li kev nyuaj siab thiab kuv yuav tsum thev xwb. 20 Kuv lub tsev ntaub kuj raug puam tsuaj, thiab tej hlua khi tsev kuj tu tag huvsi lawm. Kuv tej menyuam kuj ncaim kuv tag lawm, tsis muaj lawv li lawm. Tsis muaj leejtwg tsa kuv lub tsev ntaub dua li lawm thiab dai kuv daim ntaub uas thaiv. 21 Cov uas yug yaj kuj tsis thoob tsib thiab tsis ua nug rau (יחוח)Yahweh, vim li no lawv thiaj tsis vam meej, thiab lawv tej pab yaj thiaj tawg ua sab ua sua tag lawm. 22 Cia li mloog, muaj ib tsab xov tuaj. Saib maj, tuaj txog lawm. Muaj ib lub suab nrov ntshu nrooj hauv tej tebchaws uas nyob sab ped tuaj, tuaj ua rau Yahdah tej moos raug nyob do cuas cia, ua chaw rau hma nkaum. 23 Au (יחוח)Yahweh, kuv paub tias tibneeg lub neej tsis yog nyob ntawm nws tus kheej, thiab paub tias tsis yog tibneeg coj tau tibneeg tshais kauj ruam. 24 Au (יחוח)Yahweh, thov koj qhuab ntuas kuv kom npaum li uas tsim nyog, tsis txhob qhuab qhia li uas koj chim tsam ces koj coj kuv mus txog kev puam tsuaj. 25 Thov koj nchuav koj txojkev npau taws rau saum cov tebchaws uas tsis paub koj, thiab rau saum tej tibneeg uas tsis tuav koj lub npe pe hawm koj, rau qhov lawv tau muab Yakhauj rhuav tshem, muab nws rhuav tshem tag thiab muab nws noj nqos tag, thiab muab nws tej vaj tse ua puam tsuaj tag.