1 Ntuj es, kheev kuv lub taubhau yog qhov dej thiab kuv lub qhov muag yog qhov dej txhawv kuv thiaj li quaj tau nruab hnub hmo ntuj txog kuv cov tibneeg tus ntxhais uas raug tua. 2 Ntuj es, kheev yog kuv muaj ib lub chaw so hauv ntuj nrag teb do rau cov tibneeg taug kev, kuv thiaj li tau ncaim ntawm kuv cov tibneeg thiab khiav kom dhau lawv mus, vim lawv sawvdaws yog cov ua nkauj ua nraug, thiab yog pab tibneeg uas ntxeev siab. 3 Lawv ua lawv tus nplaig nkhaus rawv ib yam li tus qhaub nee, txojkev dag tsis yog txojkev tseeb uas vam meej rau hauv lub tebchaws. Lawv ua ib qho phem tag kuj mus ua ib qho phem thiab, lawv tsis paub kuv. (יחוח)Yahweh hais li no ntag. 4 Cia sawvdaws ceev faj nws tej kwvtij phoojywg, thiab tsis txhob tso siab rau tus kwvtij twg li, rau qhov tias txhua tus kwvtij puavleej dag ntxias, thiab txhua tus phoojywg puavleej mus xyav luag.

5 Txhua tus dag ntxias nws tej kwvtij phoojywg, tsis muaj ib tug hais tseeb kiag li. Lawv qhia lawv tus nplaig hais lus dag. Lawv ua txhaum muaj txim txog siav kawg. 6 Lawv quab yuam tag los rov quab yuam thiab, lawv dag ntxias tag los rov dag ntxias thiab, lawv tsis kam lees paub kuv. (יחוח)Yahweh hais li no ntag.

7 Vim li no, (יחוח)Yahweh uas muaj hwjchim loj kawg nkaus hais li no tias, kuv yuav muab lawv nchuav li nchuav nyiaj thiab muab lawv sim. Vim kuv haiv neeg ua txhaum, kuv yuav ua tau lwm yam abtsi rau lawv? 8 Lawv tus nplaig yog xib xub uas tua tau tibneeg tuag, thiab hais tej lus dag. Txhua tus lub ncauj hais lus zoo rau nws tej kwvtij kwvluag, tiamsis hauv nws lub siab caws yej caws ntxiab cuab lawv. 9 (יחוח)Yahweh hais tias, lawv twb ua tej no los kuv yuav tsis rau txim rau lawv lov? Kuv yuav tsis ua pauj rau haiv neeg uas zoo li no lov?

10 Cia li quaj thiab quaj nyiav tej roob thiab quaj ntsuag tej tshav zaub hauv tebchaws moj sab qhua, vim yog raug muab tso tseg piam tag tsis muaj leejtwg hla mus hla los, tsis hnov tej tsiaj nyeg ua suab sab li. Tej nas noog saum nruab ntug thiab tej tsiaj qus khiav ploj tag lawm. 11 Kuv yuav ua kom Yeluxalees pob ua tej niag pawg cia, ua chaw rau hma nkaum. Thiab kuv yuav ua kom Yahdah tej moos nyob do cuas cia tsis muaj tibneeg nyob hauv.

​

Yeluxalees Yuav Puam Tsuaj Thiab Tibneeg Yuav Khiav Tag

12 Leejtwg muaj tswvyim txaus uas yuav nkag siab tau tej no? Thiab (יחוח)Yahweh tau hais rau leejtwg es tus ntawd thiaj tshaj tawm tau tej ntawd? Vim li cas lub tebchaws no raug puam tsuaj, muab tso tseg piam tag ib yam li tebchaws moj sab qhua, tsis muaj leejtwg hla mus hla los? 13 Mas (יחוח)Yahweh hais tias, lawv tso kuv txoj kevcai uas kuv muab txawb rau ntawm lawv xubntiag tseg, thiab tsis mloog kuv lub suab thiab tsis ua lub neej raws li ntawd, 14 thiab lawv tawv ncauj ua raws li lawv lub siab nyiam, thiab raws ncuj nciav tej dab Npa‑as ib yam li uas lawv tej poj koob yawm txwv qhia rau lawv lawm. 15 Vim li no, (יחוח)Yahweh uas muaj hwjchim loj kawg nkaus, yog Ixayees Tus Tswv, hais li no tias, saib maj, kuv yuav muab zaub iab zaub daw rau haiv neeg no noj thiab muab dej muaj taug rau lawv haus. 16 Kuv yuav ua kom lawv tawg ri sua mus nyob rau hauv tej tebchaws uas lawv thiab lawv tej poj koob yawm txwv tsis tau paub dua li, thiab kuv yuav tso ntaj caum lawv qab mus txog thaum kuv ua kom lawv puam tsuaj tag. 17 (יחוח)Yahweh uas muaj hwjchim loj kawg nkaus hais li no tias, cia li xam saib, thiab hu cov pojniam uas txawj quaj nyiav tuaj, cia li tso tibneeg mus hu cov uas txawj quaj nyiav tuaj. 18 Cia lawv maj nroos tsa suab quaj nyiav peb, kom peb tej qhov muag thiaj los kua muag, thiab peb daim tawv muag thiaj txhawv kua muag ntws nto. 19 Tau hnov lub suab quaj nyiav hauv Xi‑oo. Peb puam tsuaj tag lauj! Peb txaj muag kawg li lauj! Rau qhov peb tau tawm hauv lub tebchaws lawm thiab lawv twb muab peb tej vaj tse rhuav pob tag lawm. 20 Cov pojniam es, cia li mloog (יחוח)Yahweh tej lus, thiab tig nej lub pob ntseg mloog tej lus uas nws lub qhov ncauj hais. Cia li qhia nej tej ntxhais paub quaj ntsuag, thiab nyias qhia zaj nkauj tuag rau nyias kwvtij kwvluag,

21 rau qhov txojkev tuag twb nce tuaj nkag peb qhov rais thiab nkag rau hauv peb tus vajntxwv tej vaj tse, thiab muab tej menyuam txiav ploj tag tom tej kev thiab muab tej tub hluas txiav ploj tag hauv tej tshav puam. 22 Cia li hais tias, (יחוח)Yahweh hais li no tias, tej cev tuag yuav pawg lug ib yam li tej quav tsiaj tom tej teb thiab ib yam li cov teg qoob uas hlais tso pawg lug raws cov uas hlais qab, tsis muaj leejtwg khaws. 23 (יחוח)Yahweh hais li no tias, tus uas muaj tswvyim tsis txhob khav nws lub tswvyim, tus uas muaj zog tsis txhob khav nws lub zog, tus uas muaj tsis txhob khav qhov uas nws nplua nuj.

24 Cia tus uas khav tsuas khav txog qhov no, yog qhov uas nws nkag siab thiab paub kuv tias kuv yog (יחוח)Yahweh yog tus uas hlub ruaj khov mus li, txiav txim ncaj thiab ua ncaj ncees rau hauv ntiajteb, rau qhov kuv txaus siab rau tej uas hais no. (יחוח)Yahweh hais li no ntag.  

25 (יחוח)Yahweh hais tias, saib maj, lub caij lub nyoog tabtom los yuav txog, mas kuv yuav rau txim rau txhua tus uas lam ua kevcai txiav tsis yog ua tiag tiag,

26 yog cov Iziv, cov Yahdah, cov Edoos, cov Asmoo‎s, cov Mau‑as thiab txhua tus uas nyob hauv ntuj nrag teb do uas chais plaubhau raws npoo nplooj ntseg. Cov tibneeg no tsis ua kevcai txiav, thiab cov Ixayees sawvdaws los kuj tsis yog ua kevcai txiav hauv lub siab.