1 (יחוח)Yahweh hais tias, lub sijhawm ntawd tej vajntxwv hauv Yahdah tej pob txha, thiab Yahdah cov thawj tej pob txha, cov pov thawj tej pob txha thiab cov xibhwb cev (יחוח)Yahweh lus tej pob txha, thiab cov tibneeg hauv Yeluxalees tej pob txha yuav raug muab rho hauv tej qhov ntxa los, 2 thiab luag yuav muab ua ri sua cuab hnub cuab hli thiab tej hnub qub saum nruab ntug huvsi, yog tej uas lawv nyiam thiab lawv teev tiam, yog tej uas lawv mus raws thiab nrhiav thiab pe hawm. Yuav tsis muaj leejtwg muab tej pob txha ntawd sau ua ke lossis muab faus, yuav nyob saum npoo av yam li tej quav tsiaj txhu. 3 Tsev neeg phem no txhua tus uas tseem tshuav nyob rau hauv txhua lub chaw uas kuv ntiab lawv mus ntawd yuav nyiam tuag heev dua li nyiam ciaj sia nyob. (יחוח)Yahweh uas muaj hwjchim loj kawg nkaus hais li no.

​

Kev Txhaum Thiab Kev Rau Txim

4 Koj cia li hais rau lawv tias, (יחוח)Yahweh hais li no tias, thaum leejtwg ntog nws txawm tsis sawv los li lov? Yog leejtwg yuam kev lawm nws yuav tsis rov los li lov? 5 Ua li cas haiv neeg no uas yog Yeluxalees khiav ntawm kuv lawm tsis rov los ib txhis li? Lawv tsis tso tej kev dag ntxias tseg, lawv tsis yeem rov qab los. 6 Kuv tig ntsej ncuv mloog, tiamsis lawv hais tsis tseeb. Tsis muaj ib tug yuav ntxeev dua siab ntawm nws txojkev phem es yuav hais tias, kuv tau ua abtsi lawm? Txhua tus nyias yuam kev taug nyias txoj lawm, ib yam nkaus li tus nees khiav too hau lias rau hauv tshav rog.

7 Txawm yog dav npoj ya saum ntuj los tseem paub caij paub nyoog, txawm yog nquab taug thiab luv thiab os dej dawb los tseem tuaj raws li lawv lub caij lub nyoog. Tiamsis kuv haiv neeg tsis paub tej uas (יחוח)Yahweh qhia. 8 Nej yuav hais tau li cas tias, peb muaj tswvyim thiab peb muaj (יחוח)Yahweh txoj kevcai? Tiamsis, saib maj, cov tub sau ntawv uas tsis ncaj txhais tes twb muab txoj kevcai sau ntxeev ua lus dag lawm. 9 Cov tibneeg muaj tswvyim yuav raug txaj muag, lawv yuav poob siab nthav thiab raug muab ntes coj mus. Lawv tsis lees yuav (יחוח)Yahweh tej lus, es lawv muaj lub tswvyim twg? 10 Vim li no kuv yuav muab lawv tej pojniam rau lwm tus yuav, thiab muab lawv tej teb rau cov uas tuaj txeeb tau, rau qhov tag nrho tej nyuag me tibneeg mus txog tus uas ua loj kawg los txhua tus ua lub siab hlob xav tau tej uas los ntawm kev ua tsis ncaj, tsis hais cov xibhwb cev (יחוח)Yahweh lus thiab cov pov thawj los txhua tus kuj dag ntxias huvsi. 11 Lawv tau kho kuv haiv neeg lub kiav txhab loj ib qho nyuag me me xwb, lawv hais tias, muaj kev thaj yeeb, muaj kev thaj yeeb, tiamsis twb tsis muaj kiag li. 12 Thaum lawv ua tej uas qias vuab tsuab lawv txaj muag lov? Lawv tsis paub txaj muag li lauj! Twb tsis ntaiv lawv lub ntsej muag li. Vim li ntawd lawv yuav ntog kiag rau hauv nruab nrab cov uas twb ntog tag lawm. Thaum kuv rau txim rau lawv, lawv yuav puam tsuaj. (יחוח)Yahweh hais li no ntag. 13 (יחוח)Yahweh hais tias, thaum kuv yuav qaws lawv, kuj pom tias tsob txiv hmab tsis muaj txiv thiab tsob txiv cev tsis muaj txiv. Txawm yog cov nplooj kuj ntsws qhuav tag lawm, thiab tej uas kuv twb pub rau lawv kuj ploj tag lawm. 14 Ua li cas peb zaum twjywm? Peb cia li sau zog ua ke los, peb cia li mus rau hauv tej moos uas muaj ntsa loog ruaj khov, thiab puam tsuaj tag rau qhov ntawd, rau qhov (יחוח)Yahweh uas yog peb Tus Tswv twb npaj cia rau peb puam tsuaj thiab twb muab dej muaj taug rau peb haus, vim yog peb tau ua txhaum rau (יחוח)Yahweh. 15 Peb vam qas ntsoov yuav tau kev thaj yeeb, tiamsis tsis tau ib qho zoo kiag li, peb vam qas ntsoov lub sijhawm uas kho kom mob zoo, tiamsis tsuas yog ntsib txojkev txhawj kev ntshai xwb. 16 Hnov yeeb ncuab tej nees tshuab pa hauv lub moos Daj tuaj, lub tebchaws kuj ntseeg nkaws vim yog hnov lawv tej txiv nees lub suab hee. Lawv tuaj muab lub tebchaws thiab txhua yam uas nyob hauv noj nqos tag, tsis hais lub nroog thiab tej tibneeg uas nyob hauv huvsi. 17 Saib maj, kuv tabtom tso ib co nab muaj taug los rau hauv nej nruab nrab, yog tej nab muaj taug uas ua khaws koob rau los tsis seej li mas tej nab ntawd yuav tom nej. (יחוח)Yahweh hais li no ntag.

​

Yeremyah‎ Quaj Txog Yeluxalees Thiab Yahdah

18 Kuv txojkev quaj ntsuag loj heev kho tsis tau li, kuv lub siab mob heev.

19 Cia li mloog kuv cov tibneeg tus ntxhais lub suab quaj thoob plaws lub tebchaws txhua qhov hais tias, (יחוח)Yahweh tsis nyob hauv Xi‑oo lov? Xi‑oo tus vajntxwv tsis nyob rau hauv lov?

(יחוח)Yahweh teb tias, ua cas lawv pe hawm tej dab mlom, thiab pe hawm lwm haiv neeg tej dab zes ua rau kuv chim?

20 Lawv hais tias, twb dhau lub caij hlais thiab dhau lub caij ntuj qhua los peb tseem tsis tau dim. 21 Vim kuv cov tibneeg tus ntxhais muaj qhov txhab kuv lub siab thiaj li ua kiav txhab, kuv quaj ntsuag thiab txojkev poob siab nthav ntsiab tau kuv lawm. 22 Tsis muaj tshuaj kho mob hauv Kile‑as lov? Tsis muaj Kws tshuaj nyob qhov ntawd lov? Yog li ntawd, ua cas kho tsis tau kuv cov tibneeg tus ntxhais rov zoo li qub?