Yeremyah‎ Qhia Ntawm Lub Tuam Tsev

1 Tej lus uas (יחוח)Yahweh hais tuaj rau Yeremyah‎. 2 Koj cia li mus sawv ntawm lub rooj loog uas nkag rau hauv (יחוח)Yahweh lub tuam tsev, thiab piav cov lus no rau qhov ntawd hais tias, Ib tsoom tibneeg Yahdah uas nkag lub rooj loog no mus pe hawm (יחוח)Yahweh, cia li mloog (יחוח)Yahweh tej lus. 3 (יחוח)Yahweh uas muaj hwjchim loj kawg nkaus, yog Ixayees Tus Tswv, hais li no tias, cia li kho nej lub neej thiab tej uas nej ua dua tshiab, mas thiaj pub nej nyob hauv lub chaw no. 4 Tsis txhob tso siab rau tej lus dag uas hais tias, no yog (יחוח)Yahweh lub tuam tsev, yog (יחוח)Yahweh lub tuam tsev,

(יחוח)Yahweh lub tuam tsev. 5 Yog nej kho nej lub neej thiab tej uas nej ua tiag tiag, yog nej ib leeg ua ncaj rau ib leeg tiag tiag, 6 yog nej tsis txhob tsuj yuam lwm haiv neeg thiab tej menyuam ntsuag uas tsis muaj txiv thiab tej poj ntsuam, thiab tsis txhob muab tej tibneeg tsis txhaum tua tuag rau hauv lub chaw no, thiab tsis txhob raws ncuj nciav luag tej dab ua rau nej mob, 7 mas kuv yuav pub nej nyob hauv lub chaw no, yog hauv lub tebchaws uas thaum ub kuv twb muab pub rau nej tej poj koob yawm txwv mus ib txhis li lawm. 8 Saib maj, nej tso siab rau tej lus dag uas tsis muaj qabhau abtsi li. 9 Nej yuav ua tub sab, tua tibneeg, ua nkauj ua nraug, cog lus twv dag, hlawv xyab xyeem rau dab Npa‑as thiab raws ncuj nciav luag tej dab uas nej tsis tau paub li lov? 10 Nej yuav tuaj sawv ntawm kuv lub xubntiag hauv lub tuam tsev no uas hu raws li kuv lub npe, thiab hais tias, peb tau txais kev cawm dim lawm, ces ho mus ua txhua yam kev qias vuab tsuab no dua thiab lov? 11 Lub tuam tsev uas hu raws li kuv lub npe, mas nej xam pom tias yog lub qhov tsua uas tub sab nkaum lov? (יחוח)Yahweh hais tias, yeej yog kuv pom ntsoov ntag. 12 Nej cia li mus rau kuv lub chaw uas txeev muaj nyob hauv lub moos Silaus, yog thawj lub chaw uas kuv ua rau kuv lub npe nyob, mas saib kuv ua li cas rau lub chaw ntawd vim kuv haiv neeg Ixayees tej kev limhiam. 13 (יחוח)Yahweh hais tias, nimno vim nej tau ua txhua yam no huvsi thiab thaum kuv hais rau nej tsis tu ncua los nej tsis mloog, thiab thaum kuv hu nej los nej tsis teb, 14 vim li no kuv yuav ua rau lub tuam tsev uas hu raws li kuv lub npe thiab lub chaw uas nej vam khom ntawd, thiab ua rau lub chaw uas kuv muab pub rau nej thiab nej tej poj koob yawm txwv ib yam li uas kuv tau ua rau Silau. 15 Thiab kuv yuav muab nej laim pov tseg kom dhau kuv lub qhov muag, ib yam nkaus li kuv twb muab nej cov kwvtij laim pov tseg lawm, yog Efa‑is caj ces huvsi.

​

(יחוח)Yahweh Chim Rau Qhov Uas Pe Dab Mlom

16 Yeremyah‎, koj tsis txhob thov pab cov tibneeg no, tsis txhob tsa suab hu lossis thov pab lawv, tsis txhob taij thov kuv, rau qhov kuv yuav tsis mloog koj tej lus. 17 Koj tsis pom tias lawv ua abtsi rau hauv Yahdah tej moos thiab hauv Yeluxalees tej kev lov? 18 Cov menyuam mus khaws taws, leej txiv rauv taws thiab cov pojniam ntse hmoov puab ncuav xyeem rau tus dab poj vaj saum ntuj, thiab lawv muab cawv txiv hmab hliv xyeem rau luag tej dab thiaj zes ua rau kuv chim.

19 (יחוח)Yahweh hais tias, yog lawv zes kuv lov? Tsis yog lawv rov zes kom lawv raug poob ntsej muag lov?

20 Vim li ntawd (יחוח)Yahweh thiaj hais li no tias, saib maj, kuv txojkev chim kev npau taws yuav muab nchuav rau saum lub chaw no, rau saum tej tibneeg thiab tej tsiaj txhu, rau saum tej ntoo hauv tej teb thiab saum tej qoob loo. Kuv txojkev npau taws yuav kub heev tua tsis tau li.

​

Teem Txim Qhov Uas Yahdah Fav Xeeb

21 (יחוח)Yahweh uas muaj hwjchim loj kawg nkaus, uas yog Ixayees Tus Tswv hais li no tias, cia li tsav tej uas hlawv xyeem rau hauv tej uas nej muab xyeem rau kuv, thiab noj tej nqaij ntawd, 22 rau qhov hnub uas kuv coj nej tej poj koob yawm txwv tawm hauv Iziv tebchaws los, kuv tsis tau hais lossis qhia lawv txog tej kevcai hlawv xyeem thiab kevcai xyeem xwb. 23 Kuv tseem qhia rau lawv tias, yuav tsum mloog kuv lus kuv thiaj ua nej Tus Tswv thiab nej yuav ua kuv haiv neeg. Nej yuav tsum taug txojkev uas kuv tau qhia rau nej lawm nej thiaj tau noj qab nyob zoo. 24 Tiamsis lawv tsis mloog lus thiab tsis tig ntsej mloog, lawv tsuas yog ua raws li uas lawv xav tseg thiab lawv tawv ncauj ua raws li lawv lub siab phem nyiam xwb, lawv thiaj li thim rov qab tsis mus tom hauv ntej. 25 Txij hnub uas nej tej poj koob yawm txwv tawm hauv Iziv tebchaws los mus txog niaj hnub nimno, kuv twb tso kuv cov tub qhe uas yog cov xibhwb cev kuv li lus sawvdaws mus qhia lawv tsis tu ncua hnub tag hnub thiab. 26 Txawm yog li ntawd los lawv kuj tsis mloog kuv lus thiab tsis tig ntsej mloog, lawv ua lawv lub caj dab tawv. Lawv tseem ua phem heev dua lawv tej poj koob yawm txwv.

27 Koj cia li hais tej lus no huvsi rau lawv, los lawv yuav tsis mloog koj. Koj yuav hu lawv los lawv yuav tsis teb koj.

28 Koj cia li hais rau lawv tias, no yog haiv neeg uas tsis mloog (יחוח)Yahweh uas yog lawv Tus Tswv lub suab, thiab tsis yeem yuav tej kev nplawm qhuab qhia. Txojkev tseeb ploj tag lawm, raug muab txiav tu ntawm lawv lub qhov ncauj tag lawm. 29 Cia li txiav koj cov plaubhau thiab muab laim pov tseg. Cia li quaj ntsuag saum tej roob do hau, rau qhov (יחוח)Yahweh tsis txais yuav nws haiv neeg tiam no uas nws npau taws rau thiab muab lawv tso tseg lawm.

30 (יחוח)Yahweh hais tias, Yahdah caj ces tau ua phem rau ntawm kuv lub qhov muag saib ntsoov. Lawv muab tej dab mlom uas qias vuab tsuab txawb rau hauv lub tuam tsev uas hu raws li kuv lub npe thiaj ua puas tsuas lub tuam tsev.

31 Thiab lawv ua tej chaw siab teev dab uas hu ua Thaufe‎s, uas nyob hauv lub hav Npeehinoos, es lawv thiaj yuav muab lawv tej tub tej ntxhais hlawv rau hauv cub tawg, yog yam uas kuv tsis tau hais kom lawv ua, thiab kuv tsis tau xav tej ntawd rau hauv kuv lub siab li. 32 (יחוח)Yahweh hais tias, vim li no saib maj, lub caij lub nyoog tabtom los yuav txog mas lawv yuav tsis hu lub chaw ntawd ua Thaufe‎s lossis hu ua lub hav Npeehinoos, tiamsis yuav hu tias lub hav tua tibneeg, rau qhov lawv yuav muab tej tuag faus rau hauv Thaufe‎s mus txog thaum tsis muaj chaw faus lawm. 33 Thiab tej liaj dav saum nruab ntug thiab tej tsiaj qus hauv ntiajteb yuav noj haiv neeg no tej cev tuag, tsis muaj leejtwg yuav ntiab kom khiav mus. 34 Kuv yuav ua kom lub suab luag lub suab zoo siab thiab nraug vauv nkauj nyab lub suab tu nrho hauv Yahdah tej moos thiab hauv Yeluxalees tej kev mus, rau qhov lub tebchaws yuav raug muab tso tseg piam tag.