Yeluxalees Yuav Puam Tsuaj

1 Cov tibneeg Npeeyamee‎s es, cia li khiav hauv nruab nrab Yeluxalees mus thiaj li dim. Cia li tshuab raj kub yaj hauv lub moos Thekhau‑as, thiab tsa tus chij rau saum Npe Hakhelees. Vim yog xwm txheej phem tawm sab ped tuaj, yog kev puam tsuaj loj kawg. 2 Kuv yuav ua rau tus uas cev yiag ntxiag zoo nkauj puam tsuaj, yog Xi‑oo tus ntxhais. 3 Cov yug yaj thiab lawv pab yaj yuav tuaj tawm tsam nws, lawv yuav tsa tsev ntaub vij nws, lawv nyias nrhiav nyias noj hauv nyias lub chaw. 4 Peb cia li npaj ua rog rau nws, sawv tsees es peb cia li ntaus thaum tav su. Tiamsis khuvxim, hnub twb yuav poob qho, tus duab ntxoov ntxoo ntxoo uas thaum yuav tsaus ntuj twb mus ntev zuj zus lawm. 5 Sawv tsees, peb cia li ntaus thaum tsaus ntuj thiab muab vajntxwv tej vaj tse ua kom puam tsuaj.

 6 (יחוח)Yahweh uas muaj hwjchim loj kawg nkaus hais li no tias, cia li ntov nws tej ntoo thiab tsub chaw nce ntsa loog ntaus Yelu-xalees. No yog lub nroog uas yuav tsum muab rau txim. Nyob hauv nws tsis muaj abtsi tsuas yog muaj kev quab yuam xwb. 7 Lub qhov dej txhawv dej cag tsis tu li cas, mas Yeluxalees kuj txhawv kev phem tsis tu ncua ib yam li ntawd thiab. Tau hnov kev ua limhiam ntais ntuj thiab kev puam tsuaj nrov hauv nws, kev mob thiab tej qhov kiav txhab kuj tshwm rau kuv pom tsis tu ncua li.

8 Lub nroog Yeluxalees es, cia li mloog tej lus qhuab ntuas, ntshai tsam kuv yuav nrauj ncaim koj mus thiab kuv ua kom koj nyob do cuas cia, ua lub tebchaws uas tsis muaj leejtwg nyob. 9 (יחוח)Yahweh uas muaj hwj-chim loj kawg nkaus hais li no tias, sau zog cov Ixayees uas tseem tshuav nyob yam nkaus li muab tsob txiv hmab de du lug. Rov qab xuas tes xawb de tej ceg txiv hmab dua ib zaug ib yam li tus uas de txiv hmab.

10 Kuv yuav hais thiab yuav ntuas leejtwg xwv lawv thiaj tau mloog? Saib maj, lawv lub qhov ntsej txhaws lawm, lawv thiaj mloog tsis tau. (יחוח)Yahweh txojlus yog tej uas lawv saib tsis taus, lawv tsis txaus siab rau. 11 Vim li no (יחוח)Yahweh kev npau taws thiaj puv nkaus hauv kuv, kuv thiaj khaws tsis taus cia lawm. Cia li muab hliv rau saum tej menyuam tom tej kev, thiab rau saum cov tub hluas uas tuaj txoos ua ke. Tej pojniam txivneej, cov laus thiab cov uas laus heev kuj yuav raug muab coj mus huvsi. 12 Lawv tej vaj tse liaj teb thiab lawv tej pojniam yuav raug muab rau lwm tus, vim yog kuv yuav tsa kuv txhais tes tawm tsam cov tibneeg hauv lub tebchaws no. (יחוח)Yahweh hais li no ntag. 13 Tag nrho tej nyuag me tibneeg mus txog ntua tus uas ua loj kawg los txhua tus ua lub siab hlob xav tau tej uas los ntawm kev ua tsis ncaj, txawm yog cov xibhwb cev (יחוח)Yahweh lus thiab cov pov thawj los txhua tus kuj dag ntxias huvsi.

14 Lawv tau kho kuv haiv neeg lub qhov txhab loj ib qho nyuag me me xwb. Lawv hais tias, Muaj kev thaj yeeb, muaj kev thaj yeeb, tiamsis twb tsis muaj kiag li. 15 Thaum lawv ua tej uas qias vuab tsuab lawv txaj muag lov? Lawv tsis paub txaj muag li lauj. Twb tsis ntaiv lawv lub ntsej muag li. Vim li ntawd lawv yuav ntog rau hauv nruab nrab cov uas twb ntog tag lawm. Thaum kuv rau txim rau lawv, lawv yuav puam tsuaj. (יחוח)Yahweh hais li no ntag. 16 (יחוח)Yahweh hais li no tias, cia li sawv ntsug ntawm tej kev tshuam thiab tsa muag saib thiab nug saib tej qub kev thaum ub, txoj uas zoo tshaj plaws yog txoj twg, mas cia li taug txojkev ntawd, es nej yuav tau zoo nyob siab tus yees. Tiamsis lawv teb hais tias, peb yuav tsis taug txojkev ntawd. 17 Kuv tso tej tub faj xwm saib xyuas nej thiab hais tias, nej ua tib zoo mloog raj kub yaj. Tiamsis lawv hais tias, peb yuav tsis mloog. 18 Vim li no, ib tsoom tebchaws es, cia li mloog, cov uas tuaj txoos ua ke es, cia li paub tias yuav muaj xwm txheej abtsi tshwm rau lawv. 19 Lub ntiajteb es, cia li mloog nawj. Saib maj, kuv tabtom coj tej xwm txheej phem los rau saum haiv neeg no, yog lawv yuav saws raws li uas lawv ntaus tswvyim cia lawm, vim yog lawv tsis mloog kuv lus, thiab lawv tsis yuav kuv txoj kevcai kiag li. 20 Tej roj ntoos tsw qab uas xa ntawm lub moos Senpas tuaj rau kuv thiab tej tauj qaib qab zib uas xa lub tebchaws deb deb tuaj rau kuv muaj qabhau abtsi? Tej uas nej hlawv xyeem, kuv tsis txais yuav thiab tej uas nej muab xyeem kuj tsis hum kuv lub siab.

21 Vim li no (יחוח)Yahweh hais li no tias, saib maj, kuv yuav cuab tej uas haiv neeg no dawm rau tom lawv hauv ntej rau lawv dawm, tsis hais tej txiv tub thiab tej kwvtij zej zog phoojywg puavleej yuav puam tsuaj tag.

22 (יחוח)Yahweh hais li no tias, saib maj, ib haiv neeg tabtom tuaj sab ped tuaj, yog ib lub tebchaws loj uas raug txhib kom tuaj deb kawg hauv qab ntuj tuaj.

23 Lawv tuav rawv hneev thiab hmuv, lawv nyaum heev tsis khuvleej li, lawv lub suab nrov vig voog yam li dej hiavtxwv ntas. Lawv caij nees tuaj ua ib kab ib kab zoo yam li tej txivneej tuaj ua rog. Xi‑oo tus ntxhais es, lawv tuaj tawm tsam koj.

24 Peb twb hnov xov txog lawv cov ntawd mas peb txhais tes tsaug leeg tag, txojkev nyuaj siab lwj siab npog nkaus peb, mob yam nkaus li tus pojniam mob plab yug menyuam.

25 Tsis txhob tawm mus tom tej teb thiab taug tej kev, rau qhov yeeb ncuab muaj ntaj mas muaj kev txhawj kev ntshai heev rau txhua qhov. 26 Kuv haiv neeg es, cia li muab khaub seev tsaj los hnav, thiab da luj luam hauv cub tshau. Cia li quaj ntsuag yam nkaus li muaj ib tug tub xwb los tuag lawm, yog quaj ntsuag mob siab hlais siab kawg vim yog tib ntsais muag xwb tus uas ua kom puam tsuaj tuaj txog peb lawm. 27 Yeremyah‎, kuv kom koj ua tus uas sim thiab tshuaj saib kuv haiv neeg xwv koj thiaj paub thiab sim tau lawv lub neej zoo li cas. 28 Lawv sawvdaws tawv ncauj thiab fav xeeb, nyiam nkawg xaiv rau tom ub tom no. Lawv yog tooj thiab hlau, lawv txhua tus xyaum ua phem huvsi. 29 Lub pub kuj tshuab pa heev kawg mas tej quav txhuas kuj kub tag lawm. Yog pheej muab nchuav los kuj tsis tau qabhau rau qhov cov tibneeg phem tsis ploj mus. 30 Yuav hu lawv tias yog quav nyiaj, vim yog (יחוח)Yahweh tsis lees yuav lawv lawm.