Yeluxalees Thiab Yahdah Lub Txim

1 Cia li khiav mus khiav los hauv lub nroog Yeluxalees tej kev, cia li saib thiab ua tib zoo tshuaj. Cia li tshawb nrhiav hauv tej tshav puam saib nrhiav tau ib tug tibneeg uas ua ncaj ua ncees thiab nyiam qhov tseeb los tsis tau, es kuv thiaj zam txim rau lub nroog ntawd. 2 Txawm yog lawv hais tias, muaj (יחוח)Yahweh uas muaj txojsia nyob pom, los lawv kuj twv dag xwb.

3 Au (יחוח)Yahweh, koj lub qhov muag nrhiav txojkev tseeb xwb los tsis yog? Koj twb nplawm lawv los lawv kuj tsis xeev li, koj twb muab lawv rhuav tshem los lawv tsis yuav li uas koj qhuab ntuas lawv. Lawv ua lawv lub ntsej muag tawv dua pob zeb, lawv tsis yeem ntxeev dua siab. 4 Mas kuv thiaj hais tias, cov tibneeg no tsuas yog cov pluag xwb, lawv tsis paub qabhau abtsi, rau qhov lawv tsis paub (יחוח)Yahweh txojkev thiab tsis paub lawv Tus Tswv txoj kevcai.

5 Kuv yuav mus cuag cov uas ua hlob thiab hais rau lawv rau qhov lawv paub (יחוח)Yahweh txojkev thiab paub lawv Tus Tswv txoj kevcai.

Tiamsis lawv txhua tus muab (יחוח)Yahweh tus quab lov thiab lawv nti thawv (יחוח)Yahweh kev tswjhwm. 6 Vim li ntawd tus tsov ntxhuav tom hav zoov yuav tom lawv tuag, thiab hma hauv ntuj nrag teb do yuav ua kom lawv puam tsuaj. Tsov pom txwv tabtom zov lawv tej moos, txhua tus uas tawm hauv tej moos ntawd yuav raug muab dua ua tej dwb daim, vim yog lawv ua txhaum ntau kawg thiab lawv fav xeeb loj kawg. 7 Kuv yuav zam nej lub txim tau li cas? Nej tej menyuam twb tso kuv tseg lawm thiab tau tuav tus uas tsis yog (יחוח)Yahweh lub npe cog lus twv. Thaum kuv pub lawv noj tsau lawv kuj mus deev lwm tus, lawv mus tsheej pab rau hauv poj muag cev lub tsev. 8 Lawv yog tej txiv nees rog hawj xav tshov maum, lawv txhua tus hee laws nrhiav luag tej pojniam.

9 (יחוח)Yahweh hais tias, vim li no kuv yuav tsis teem txim rau lawv lov? Thiab kuv uav tsis ua pauj rau haiv neeg uas zoo li no lov? 10 Cia li mus raws nws kab ntoo txiv hmab thiab muab ua puam tsuaj, tiamsis tsis txhob ua kom puam tsuaj tag nrho huvsi. Muab nws tej ceg txiav pov tseg rau qhov tej ntawd tsis yog (יחוח)Yahweh li. 11 Ixayees caj ces thiab Yahdah caj ces kuj tso plhuav kuv tseg lawm. (יחוח)Yahweh hais li no ntag.

12 Lawv hais tsis tseeb txog (יחוח)Yahweh thiab lawv hais tias, nws yuav tsis ua ib yam abtsi, yuav tsis muaj ib yam xwm txheej phem raug peb thiab peb yuav tsis pom hniav ntaj hniav riam thiab kev tshaib nqhis.

13 Cov xibhwb cev (יחוח)Yahweh lus tsuas yog cua xwb, (יחוח)Yahweh tej lus tsis nyob hauv lawv lawm. Thov cia lawv raug raws li lawv hais. 14 Vim li no (יחוח)Yahweh uas muaj hwjchim loj kawg nkaus hais li no tias, vim yog lawv hais tej lus ntawd, saib maj, kuv yuav muab kuv tej lus hauv koj lub qhov ncauj ua hluavtaws, thiab muab cov tibneeg no ua cov taws, mas cov hluavtaws no yuav hlawv lawv kub tag. 15 (יחוח)Yahweh hais tias, saib maj, Ixayees caj ces es, kuv tabtom coj ib haiv neeg deb deb tuaj tawm tsam nej, yog ib haiv neeg uas muaj zog heev nyob ntev los lawm, yog haiv neeg uas nej tsis paub lawv li lus, lawv hais li cas nej kuj tsis nkag siab. 16 Lawv lub raj xub zoo yam nkaus lub qhov ntxa uas qheb lug, lawv cov tub rog txhua tus siab loj siab tuab. 17 Lawv yuav noj tej uas nej hlais tau thiab noj nej tej zaub mov, lawv yuav noj nej tej tub tej ntxhais, lawv yuav noj nej tej yaj tej nyuj, thiab noj nej tsob txiv hmab thiab tsob txiv cev, thiab lawv yuav xuas ntaj ua rau nej tej moos uas muaj ntsa loog uas nej tso siab puam tsuaj tag. 18 (יחוח)Yahweh hais tias, txawm yog hnub ntawd los kuv yuav tsis ua rau nej puam tsuaj tag huvsi.

19 Thiab thaum nej cov tibneeg hais tias, Ua li cas (יחוח)Yahweh uas yog peb Tus Tswv ua txhua yam no rau peb? Mas koj cia li hais rau lawv tias, nej twb tso kuv tseg thiab ua koom tu lwm haiv neeg tej dab rau hauv nej lub tebchaws li cas, ces nej yuav tu lwm haiv neeg rau hauv lub tebchaws uas tsis yog nej li ib yam li ntawd. 20 Cia li tshaj tawm tej lus no rau hauv Yakhauj caj ces, cia li piav tej no rau hauv Yahdah, hais tias, 21 Haiv neeg ruam thiab tsis thoob tsib es, nej cia li mloog tej lus no, nej muaj qhov muag los tsis pom kev, nej muaj qhov ntsej los tsis hnov lus.

22 (יחוח)Yahweh hais tias, nej tsis ntshai kuv lov? Nej tsis tshee hnyo rau ntawm kuv xubntiag lov? Kuv yog tus uas tso tej xuab zeb ua ciam thaiv dej hiavtxwv, yog tus ciam uas nyob ib txhis dej hla tsis tau, txawm yog tej niag nthwv dej nphau los kuj kuav tsis tau, txawm yog tej niag nthwv hlob nrov vig voog los hla tsis tau. 23 Tiamsis haiv neeg no lub siab tawv thiab fav xeeb, lawv tau tig kiag thiab khiav mus lawm.

24 Lawv lub siab tsis hais tuj taws tias, cia peb ntshai thiab hwm (יחוח)Yahweh uas yog peb Tus Tswv, tus uas pub nag los raws lub caij lub nyoog, yog nag hauv xyoo qab xyoo, thiab tuav rawv lub caij uas teem cia rau peb sau qoob loo.

25 Nej tej kev phem ua rau txhua yam no plam ntawm nej, nej tej kev txhaum thaiv tsis pub kev zoo los rau nej. 26 Hauv kuv cov tibneeg kuj muaj tibneeg limhiam, lawv tos nrhw ib yam li cov uas cuab noog zov tos, lawv cuab hlua cia lawm, thiab lawv cuab tibneeg. 27 Lawv lub tsev puv nkaus kev ntxeev ntxias, ib yam li lub tawb uas noog puv nkaus. Vim li no lawv thiaj tau ua loj thiab nplua nuj. 28 Lawv thiaj rog rog kheej lam, lawv ua limhiam tsis paub txaus li. Lawv txiav txim tsis ncaj rau tej menyuam ntsuag tsis muaj txiv mas tej menyuam ntawd thiaj kov tsis yeej, lawv tsis tuav cov uas txom nyem txojcai.

29 (יחוח)Yahweh hais tias, vim tej no kuv yuav tsis rau txim rau lawv lov? Thiab kuv yuav tsis ua pauj rau haiv neeg uas zoo li no lov? 30 Muaj xwm txheej uas poob siab nthav thiab txhawj ntshai kawg li tshwm rau hauv lub tebchaws no.

31 Cov xibhwb cev (יחוח)Yahweh lus tau cev tej lus dag,  thiab cov pov thawj kuj kav raws li tej lus uas cov xibhwb cev dag ntawd. Thiab kuv haiv neeg kuj nyiam tej uas lawv ua no, tiamsis nej yuav ua li cas rau thaum txog hnub kawg?